أصحاب العقول في راحه…و المجانين في نعيم….و انا لا طايل ده ولا ده

insomnia1

رغم اننا عايشين في مجتمع بينظر للي بيتردد على دكتور نفسي انه بني آدم مش طبيعي….

و ده من منطلق انه عيب انك تمر بازمة نفسية…او جايز ان ماشاء الله كل واحد فينا عالم نفسي مش مستني استشارة او مساعدة من حد (عنطـظه فارغة) و ر غم ان النظرة دي خلت عندنا قصور الى حد كبير في الدكاتر النفسيين الكفئ….الا اني قررت انهارده أن أكسر كل هذه القيود الغير مبررة…و أروح لدكتور نفسي..
و ده لأني باعاني من مشكلة أرق مؤلمة في أيام الإمتحانات…

المهم…اتجهت للعيادة….حسب الوصف اللي اتوصفلي…و انا على مشارف الشارع اللي فيه العيادة…و هو شارع سعة 2 توكتوك….مليئ بالبيوت المخيفة.. …حتى الشمس خايفة تدخله!….راودني احساس غريب و بدأ صدري ينقبض….لكني لغوشت على احساسي و طنشت….قلت يا واد انت جاي هنا لسبب…روح اقضي مصلحتك و اتكل على الله…بلاش تلاكيك..المهم….
دورت على اسم الدكتور في وسط يفط كتير متعلقة لحد مالقيته بسهوله….و اتجهت ناحية باب العمارة…
و انا على مشارف باب العمارة اللي يبدو ان كان طالعلها قرار ازالة و الخديوي اسماعيل وقف تنفيذه….و أول مادخلت بير السلم و شفت منظر الحيطان…قلت يا واد عادي يمكن تكون حريقة قديمة ايام الفتوحات الإسلامية…..
مرة تانية راودني نفس الاحساس الغريب….و لكني تمسكت بمبدأ “لغوش لغوش”
المهم…طلعت السلالم….و غير الاربع يفط اللي حاططهم الدكتور برا على أول الشارع و جوا الشارع و على باب العمارة و على البلكونة اللي فيها العيادة….تقريبا كان حاطط كل 3 سلمات و انت طالع يافطة بتعرفك طريق العيادة…
ساعتها بس عذرت نظرة الناس المغلوطة للمترددين عالدكانرة النفسيين…اذا كان الدكتور نفسه بيعاملهم معاملة المتخلفين عقليا…..ما علينا…..قلت يا واد ماتدفش….
اتجهت بسرعة لباب العيادة….زي اللي بيجري من حد عايز يقتله و نفسه يلاقي مكان يخبيه…و كأن العيادة هي المكان اللي اول ماأدخله حأحس بالأمان و الراحة اللي محستهومش في الشارع ولا مدخل العمارة…
و اوال مالقيت الباب في وشي جريت عليه و دخلت منه!! عشان ألاقي اللي مفكره ورايا و بجري منه خايف يقتلني….قاعد و مستنيني جوا!! و اتاريني بجريله!!
كنت رايح للدكتور يعالجني من الأرق….لكن و بعد ما دخلت العيادة اللي لولا وجود الجاذبية الأرضية مكنتش عرفت أرضها من حيطانها!….اكتشفت اني محتاج علاجين…واحد للأرق..و التاني للإكتئاب!
المهم…دخلت على الممرضة…..و كانت ابتسامتها هي الشيء الوحيد الذي يبعث عالتفائل في ذلك اليوم المريب…(زي ما اكون بتفرج على فيلم “دعاء الكروان” و فجأة قلبت القناة

لقيت كليب نانسي الجديد)….سألتني عن اسمي فأجبت ثم سألتني عن ما هو أهم (فلوس الكشف) فدفعت…و لسة باقعد استنى دوري…فجأة لقيتها قامت منطورة من مكانها و سألتني عن اسمي مرة تانية…قلت “يا خسارة…حتى الحاجة الوحيدة الحلوة في اليوم طلعت هابلة” …طيب…خليني معاها للآخر…و قلتلها اسمي مرة تانية….و فجأة لقيتها بترجعلي فلوس الكشف و بتقوللي اتفضل يا استاذ الدكتور في انتظارك….و ساعتها اتمحى تماما شكي في انها هابلة…
بقى يقين!!
و ساورتني شكوك مريبة بأن تكون تلك الفتاه احدى المرضى النفسيين تتقمص دور ممرضة!
المهم…خدت على كلامها… و دخلت و فعلا لقيت الدكتور في انتظاري…و بعد سلام حار مكنتش اعرف مغزاه….اتضح وجود معرقة مسبقة و وثيقة للدكتور بالعائلة….- انا برضه كنت حاسس انها عيلة خـٌـلـل- (بضم الخاء) …و اطمنت اولا ان فلوس الكشف حتفضل في جيبي…وثانيا ان البت طلعت عاقلة..
المهم باختصار شديد حكيت للدكتور عالموضوع و فهمته ان اهم مشكلة اني مبعرفش انام في فترة القيلولة و ده عاملي لخبطة في حياتي….و كان هذا قبل ان يخرج علي الدكتور الخبير بالحل الأمثل اللي بجد مش عارف كان تايه عني فين و قاللي: “بص يا سيدي…انت مش حتنام فترة القيلولة…و حتكتفي بالنوم بالليل بس”
فارتسمت على وجهي علامات الارتياح و الرضا المصطنعة في الوقت الذي كان يتأجج في أعماقي صوت عالي يصيح “نعم يا روح أمك؟؟” و لكني الحمد لله قدرت امسك لساني….و بعد ما كتبلي الروشته و قاللي اعدي عليه بعد شهرين (في المشمش طبعا) اتجهت مسرعا للخارج…
و بالرغم من النتائج المخيبة للآمال… خرجت من اليوم بأكبر درس مستفاد:

المال الحلال عمره مايضيع!

توقيع:

Echo of Silence

———————————

Advertisements

11 تعليق

  1. first i like ur way awi
    w peace asln enna etmna 3la bnt enha msh habla w enk mskt lsank
    w 3gbtni awi conclusion ely fi ela5r….

    • Glad u like it!
      kont 7ases en da a5er post 7ayet2araly fel blog b3d ma el nas 3rfet eny ro7t Ldoctor nafsany…bas yabdoo en lsa fi amal
      😀

      thx 4 passing by “sellemna”, emooz

  2. شوفت بقى الناس مش بتروحلهم ليه ياصديقى
    وان الناس عندها حق
    بس مكنش لازم تسيح انك…….لامؤخذة
    كده هتشبهلنا البلوج
    بس البت كان ايه نظامها…..هه؟

    بس بينى وبينك انا محتاج دكتور بس مش من ده
    وبيتهيألى فى ناس كتير محتاجاه

    • عندك حق…واحد عامل بوست “راجعي و متخلف” و التاني رايح لنفساني…البلوج سمعته بقت في الحضيض…احنا نلم حاجاتنا و نروح يابو صلاح

  3. ههههههههههههههههههه…………..الله يسهلكوا يا رجاله…………….يلا لموا حاجتكوا ودخلوني انا واخويا كيشو نقوم بالواجب…………..لا بس بجد يا واد يا ايكو اسلوبك جااااااااااامد طحن رافع راسنا دايما يا معلم………….عقبالي بقا يااااااااااااا رب

  4. hhhhhhhhhhhhhhhhhh zay elfol yam3alemy
    etada7 enak mareed nafsy…..ana men zaman ba2ol 3aleek keda
    rabena yeshfeek yarab :d
    salam
    law 3ayeet tany ta3alaly hadeek 3elag bebalash

  5. وصفولي الدوك.. لقيتو خيال وكلام عالحيط .. كلام عالحيط… يدوب.. يدووووب يتشاف….

    أهرب من أرقي وأروح على فين… إذا كان الدوك بتاع المجانين.. أكتر واحد مجنون يا حرام… والممرضة “خٌلل” تيارالالالا “خٌلل” تيارلالالا “خٌللللللللللللللللللللللللللللللل ودماااااااااااااااااااااغ
    عيني عيني عالمجانين…. حيارى مظلومين… عالدوك مش واخديييين… عالدوك مش واخدين…

    مع تحيات “الست أم كلثوووووووووووم”

  6. اللــــــــــــــــــــــــــــــــــــــه…..اللــــــــــــــــــــــــــــــه

  7. هههههههههههههههههههههههههههههههههههه…مش قولت عيلة خلل…..لا بس موهوبين 😀

  8. ههههههههههههههههههههههههه ” المال الحلال عمره ما يضيع ” ….. الحمد لله

    بس والله الدكتره دول طلعت شغلانتهم حاجه فل

    علي كده امي طلعت واخده ماجيستر ويجي اتنين تلاته دكتوراه … الحق بقا ائمن مستقبلها وافتحلها عياده

    • wana awel zboon 😦


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬836 بنى آدم
  • أحسن مشاركات

  • التصنيفات