كشف المستخبى والمكنون….فى ديزنى وسبيس تون

a_doctor_a_day___four_by_polvoice

مكنتش مقتنع اوى بموضوع الدكتور النفسانى ده

بس الظاهر ان مفيش فايدة…العيال اللى قاعدين معايا ع-السلم مصممين انى اروحلوا مع انى مش محتاجله خالص

اخدت اسمه من واحد صاحبى بعد طبعا ماحلفت 100 يمين انى مش حقول لحد ابدا انه بيروح لدكتور نفسانى

عشان الفكرة الشائعة عنه….ومش عايزين ندمر للواد سمعته

كانت فكرتى عن الدكتور النفسانى متفرقش كتير عن فكرة اى حد

راجل كبير…شعره ابيض…وعيادة شيك…نور هادى ومدد ع-الشازلونج وكلام من ده

كنت رايحله وفدماغى الفكرة ان كل دكتور نفسانى جواه بيبقى مريض نفسى محتاج دكتور

بس الواد خشاب قاللى ان دكتور احمد حـــ……. ولا بلاش انا وعدتوا انى مش هسيح

المهم انه قاللى الدكتور ده مش كده خالص….وفعلا زى ماقاللى لقيته راجل فى الخمسينات

وشكله مريح فبسرعة قدر يفتح الكلام وفجأة لقيت نفسى سايب نفسى خالص بدلق اللى جوايا

“عارف يا دكتور…انا حاسس انى بقيت فاضى

ان جوايا بقى مفيش اى حاجة…لاحلوة ولا وحشة

مش حاسس بأى حاجة لامبسوط ولامضايق…ولامخنوق ولا مرتاح

ولا اى حاجة خالص…مش حاسس لابحب ولا بكره

حتى الاغانى مبقتش الاقى نفسى فولا اغنية

عندى حاجات كتير فدماغى بس مش عايز اتكلم

او مش عارف لو اتكلمت هقول ايه؟…او حتى اقول ازاى؟

بقى خلقى ضيق اوى ومبقتش استحمل كلمة من حد

حتى تصرفات الناس العادية بقيت اشوفها مستفزة

ومبقتش متحمس لحاجة..لا الكلية..ولا البيت..ولا حتى الصحاب والخروج

عارف…..كل الحاجات اللى كانت حلوة زمان دلوقتى بقيت اشوفها بمنظور مختلف

يعنى مثلا يادكتور………عارف باباى؟؟؟”

-“البحار….؟!!!!!!!!!”

ايون…انا زمان كنت فاكره راجل مية مية..وكان نفسى ابقى بحار زيه

بس اكتشفت انه كان خمورجى عشان كدة كان لسانه تقيل وبيقول الكلام غلط

وكان بيضرب السبانخ عشان يعلى”

“باباى..؟!!!!”

“ايون يادكتور يعنى انا هضحك عليك؟…الواحد ساعات بيتخيل حاجات مع الوقت والخبرةبيكتشف

الحقيقة طب تقدر تقولى ليه زيزى متجوزتش بطوط لحد دلوقتى ومعلقاه جنبها كل ده؟”

قاللى معرفش بس ملامح وشه ابتديت تتغير وتظهر عليه اعراض غريبة

انا قلت الدكاترة النفسيين دول بيبقوا ناس عجيبة المهم

انا اقولك يا دوك عشان هو حتة دكر بط لا راح ولا جه..بس اهو بيجيبلها طلبات البيت

وبيرحمها من وقفت الفرن…بس هتسيبوا عند اول ديك رومى تقابلوا

بس انا مش هسكت…انا هفضح كل ده فكتابى اللى هينزل قريب جدا

هسميه (كشف المستخبى والمكنون….فى ديزنى وسبيس تون)…هفضح الكل

من اول حكاية سندريلا لحد بكار….حتى مازينجر انا مش هخاف

وهقول كمان على عباس؟…”

“عباس مين يابنى..!!!!!!؟!”

قاللى الجملة دى وصوتوا بيترعش وعمال يلف فالاودة

كأنه بيدور على حاجة بس انا قلت ياواد اعمل اهبل وكمل كلامك

“ابن فرناااااس يادكتور….اللى بيقولولك انه كان السبب فى اختراع الطيارة

اهو ده كان بيشرب بانجو…”

“بانجو……؟!!!!!!!”

ايون…طب ادينى عقلك انت واحد ركب جناحات ونط من على جبل

يبقى ايه؟….اكيد كان عامل دماغ زى الزفت…بس هنقول ايه؟…الحكومة هى السبب

وعشان كده حاولوا يداروا على الموضوع وعملوه بطل قومى…بقى ده كلام ناس عاقلين؟”

– “والحكومة مالها يابنى…؟!!!”

– “يادكتور ماهو لو الظابط اللى بيقف على اول الجبل كان وقفوا وقاللوا قول حاحا

كان مسكوا وبييتوا فى الحجز ومكنش حصل اللى حصل”

– “عندك حق…..”

– “بس عموما انا عرفت اسم الديلر ونوع البانجو اللى باعوا لعباس”

– “وكان نوعه ايه؟”

-“ده كان نوع بانجو جديد اسمه انا طيييير ف-السما”

الدكتور سمع نوع البانجو من هنا وطلع يجرى من الاودة زى المجنون

وليه زى منا قلت من الاول الداكترة النفسيين دول بيبقوا خلل محدش صدقنى

بس لما اشوفك ياخشاب….بعتنى لدكتور مخبول

بس عموما انا بنصح كل واحد انه يروح للدكتور النفسانى عادى حتى لو كان زى الفل

زى حالاتى مش هتخسر حاجة….واقولك حاجة فسرك

رغم ان الدكتور ده رايحة منه خالص…بس انا استريحتله

ويمكن لو كنا قعدنا مع بعض شوية كنت فضفضتله بحاجات كتيييــــــــــــــــر

عموما…..ربنا يشفى

توقيع:

ابو صلاح

Advertisements

14 تعليق

  1. Gd 1.. bas ya tara httla3 2mta faday7 el disney’s bec. im waiting

    • مش عارف بدور على دار نشر يتحمسوا للفكرة
      او حتى جريدة صفرا وانا جاهز بالمانشيتات

      “عم دهب يحتكر انتاج الباكلاويز فى مدينة البط”

      “مينى تعترف: علاقتى بميكى كانت نزوة”

      “بالمستندات….تفاصيل العقد العرفى بين مازينجر وافروديت”

      “بالحق اقول…..بقلم بوكاهانتوس”….. 😉

  2. ههههههههههههههههههههه….ياعيني…مكنش قصدي يابوصلاح
    انت كنت كويس قبل ماتروحله….انا كده حاسس بعقدة ذنب فظيعة..
    عموما احنا يادوب جربنا واحد…لسه في كتير!

    تسمحلي اتقمص دور دكتورك النفسي لدقيقة:
    ————————-
    ((عندى حاجات كتير فدماغى بس مش عايز اتكلم
    او مش عارف لو اتكلمت هقول ايه؟…او حتى اقول ازاى؟))
    —-

    يمكن لو عرفت انت في دماغك ايه…عرفت انت عايز ايه…حتعرف انت عايز تقول ايه و هيبقى الكلام اسهل شوية…
    حاول تبقى صريح و مباشر مع نفسك الأول و حتلاقيها أوتوماتيك اتنقلت لكلامك…
    عموما انا باعتذر اني بعتك لدكتور أحمد حـ…….
    لأني اكتشفت ان احسن دكتور تلاقي عنده راحتك دلوقتي……..

    دكتور ابوصلاح!

    • ياخشبوز ايه اللى خلاك تسيح
      اهو الناس كدة هتعرف انك بتروح لدكتور نفسانى

      ــــــــــــــــــــــــــــــــــــــــــ

      ساعات يابوخشاب بتبقى مش عايز تفكر فى اللى فدماغك
      عملا بمبدأ “لا تسئلوا عن اشياء ان تبدى لكم تسؤكم”

  3. لا بجد جاااااااااااااااااااااااااااااااااامده طحن يا ابو صلاح…………..نفسي قلاقي حد طبيعي في ام الشله دي…………..استرها علينا يا رب ومشوفش الدكتور ده بنفسي…………….علشان انا بللي جوايا مش حخليه يجري في الاوضه بقا ……….حخليه يمثل دور عباس ابن فرناس ان شاء الله

  4. مينفعش يبقى فى حد عاقل فى الشلة دى يابوعمر
    يابني الطيور على اشكالها تقع

  5. 7elw mooooooooooooooooooooot ya ahmed
    bs 3shan 5atry msh tekteb 7aga 3n el mo7akek konan
    3shan ana ba7ebo gedn

  6. Kan badry 3lek Badry Ya HANDSA
    YA bAAAAAAAAYZZZE
    ya ged3an msh keda …….w knt bettraya2 3la karim enbarh ..huh!!!!!

  7. 3la fekra 2na 5alas 7abatal 2shouf disney w space toon w MBC3 ba3d makashaftooly 3an 2lmo2amra 2ly kont shakek fiha 2slan di . 2na men zaman wana shakek 2n kapten maged w yasin btorbothom 3laka men 2lnoo3 3’eir 2lmashrou3

  8. elwad da kant tfolto moshrada ana o5to w ashahd 3la kda:P:P
    la2 bs gamed moooooot w el7md enk mo2ltsh ay 7aga 3la tom&jerry kan mmkn aro7 fiha:):)

  9. laaaaa dh enta magnoon rasmi ba2a 😀

  10. 7lwa awi :D:D bs 2oli mafish 7al tyb lel 23rd dih l2ni i’ve the same 😦

  11. ana fe3lan 3yza aro7 le dr nafsani yemken yekon 3andy 3o2ad we ana msh 3rfaha aw yemken yesala7 shwayet 3eyoub feya

  12. انا كنت بقول انك عااااااااااقل لالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالا خاااااااااااااااااااالص انا غلطااااااااااااااااااااانة


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬836 بنى آدم
  • أحسن مشاركات

  • التصنيفات