يا انتمائي ياني

asdsdsd

من يومين او 3 كده  بالكتير صحيت من النوم الساعه 7 الصبح كالعاده علي طابور الصباح اليومي اللي بحضره كل يوم مرتين فتره صباحيه وفتره مسائيه ………….تخيلوا معايا واحد كل يوم بيسمع تحيه العلم مرتين وبيسمع النشيد الوطني مرتين ويجي 3 او 4 اغاني وطنيه كده علي الماشي والطلبه طالعه الفصول بتاعتها منا بعيد عنكم بيتي لازق في مدرسه بقا وانتا كده كده طالما صحيت مستحيل تنام لان بعد فقره الاغاني تلاقي العيال طلعوا الفصول بقا وظيطه وظمبليطه وكأنك عايش في فيلم لتوم وجيري……….المهم اني قومت عملت كوبيه النسكافيه بتاعه الصبح وقعدت وافتكرت بقا ايام زماااااااان ايام العز لما كنا بننجح في السنه بسهوله وبنتحدي بعض علي المجاميع مش علي اللي حيعدي بمادتين واللي حيقع………..افتكرت ايام مكنا بنحي العلم واللي كان بيسكت ساعتها او بيكسل يقول التحيه كان بيطلع عين اهلوا من مدرس الالعاب بتاعنا ويا ويله يا سواد ليله اللي ميقولش النشيد وكل يوم نفس الاغاني الوطنيه هي هي طيب ليه منغنيش حاجه حلوه كده لمنير ولا لعمرو محدش فاهم……….فلما جيت اسال في مره ليه بنعمل كل ده جاتلي الاجابه في كلمتين ( بنحسسك بالانتماء ) سمعت الكلمه ومفهمتش منها حاجه وسكت

وكبرنا شويه وطلعنا من المدارس ودخلنا السجن (الكليه) وبدانا بقا نخرج ونسهر ونهيص بقا………لقيت فجاه الحاج بيقولي :

الحاج: انهارده hلاقيك في البيت الساعه 12 . لو الساعه عدت 12 وانتا لسه مرجعتش حعرف شغلي معاك (وبعيد عنكم انا عارف شغله كويس اوي ومش عاوز اعرفه تاني )

انا: يا حاج انا كبرت بقا خلاص مش لسه عيل صغير يعني ومن حقي اعيش حياتي زي منا عاوزها

الحاج: لاااااااااااااا ده لما يكون ليك بيتك انتا وانتا اللي بتتحكم فيه انما طول منتا لسه منتمي لبيتي ده يبقي تمشي علي قوانيني انا .

لقيت كلمه الانتماء جاتلي تاني بس المرادي علي بيتي………….الله قعدت افكر شويه مع نفسي كده في الانتماء ده هو معناه ايه ؟ وبيتقال علي ايه ؟ وبيعمل ايه ؟

اكتشفت ان الكلمه ما شاء الله كبيييييييييييييييييييره اوي وليها انواع كتير زي الانتماء السياسي والانتماء الاقتصادي والكروي والعقائدي وحااجات تانيه كتييييييييير……….. بس المشكله اني لقيت اننا فاهمين الكلمه دي غلط خالص وبنتعامل معاها بمنتهي التفاهه………… يعني مثلا بنحاول نزود انتماء الشباب والاطفال باننا نخليهم يغنوا النشيد ويحيوا العلم ونخنق اهاليهم كل يوم بكام اغنيه وطنيه وشكرا ومفكرين بكده ان العيال حيطلعوا يحبوا مصر……..ايه التفاهه دي…………ولا لما ابويا يجي يرغمني اني ارجع البيت بدري هل بكده هو فكر انه خلاص بيزود انتمائي للبيت وبيحميني من الخطر اللي بره برده لا لاني لو عاوز اغلط حغلط وبالعكس انا لما ارجع البيت بغصب عني حكره البيت مش حيزيد حبي ليه يعني………… وهكذا وهكذا بقا

لو فكرنا صح في كيفيه الانتماء سواء للبلد او للدين او للبيت او لاي حاجه المفروض اننا نحبها حنلاقي ان في حاجات تانيه خالص هي اللي بتزود انتمائنا ده يعني مثلا علشان ننتمي للبلد لازم نلاقي بلد بتحترمني كمواطن باخد حقوقي قبل مبديها واجباتي لما ادخل المدرسه الاقي الفصول نضيفه واقعد علي كرسي مريح والفصل يكون مكيف وعدد الطلبه فيه يكون مناسب ومش زحمه ولما اتخرج الاقي مكان مناسب ليا اشتغل فيه بتخصصي واقدر ابدع فيه والاقي نفسي ويكون مرتبي مناسب واقدر اكون نفسي واتجوز بدري مش لازم استني لما اطلع المعاش علشان اتجوز واقدر اربي ولادي واعلمهم تعليم نضيف بكده ححب البلد وانتمي ليها مش تقولي شويه اغاني وهجص هما اللي حيحببوني في البلد وكذالك لو اخدنا االانتماء الديني مثلا نلاقي ان في 3 ديانات اليهوديه والمسيحيه والاسلام وفي غيرهم كتير بس ملناش فيهم انا بتكلم علي الديانات السماويه اللي بعترف بيهم بس المهم ان كل واحد بيكون منتمي لدينه تلاقيه من بره يا سلاااااااااااااااام قمه في الانتماء للدين مستعد يقتل نفسه في سبيل ان دينه يفضل الاقوي بس من جواه او من ورا الناس بمعني اصح تلاقيه مقضيها احلي تقضيه ولا عامل حساب لدينه اساسا طيب انتا اازاي منتمي ليه متفهمش بقا . وقيس علي كده بقا في باقي المواضيع

يا جماعه الانتماء الحقيقي بيجي من الحب وعلشان تحب حاجه يبقا لازم تقدرها ولو قدرتها حتعمل اي حاجه وتضحي باي شئ في سبيل حريتها وقوتها وسعادتها …………يبقا لازم نعرف بقا اننا علشان ننتمي للبلد يبقا لازم نحس بتقدير البلد لينا علشاان نقدرها ………..وعلشان ننتمي لديانتنا يبقا لازم نتقيد باوامرها ونواهيها ونحترم معتقادتها علشان يبقا انتمائنا ظاهري وباطني ويكون انتماء سليم………..وكذلك لو حبينا ننتمي لبيوتنا يبقا لازم نلاقي الاحترام المتبادل في التعامل بين الاباء والابناء ونلاقي الثقه المتبادله في التعامل ده حيخلينا نحب بيوتنا وننتمي ليها بقلوبنا قبل ميكون بغصب عننا

Advertisements

5 تعليقات

  1. يا جبرووووووتك يا أخي….عايز فصل مكيف….
    صدق اللي قال غليكوا شعب نمرود صحيح…..ده ناقص تفولي بقى عايز المتاهج تتعدل…و نعمتد عالفهم مش الحفظ…و نخلي الاساتذة تشرح في فصولها بدل ماتشرح في بيوت الطلبة…..ايه يابني الافترا ده….و هي البلد حتعملك ايه ولا ايه

    مش كفاية بتلاقي طرق مكسرة تمشي عليها….مش كفاية بتلاقي خلق تبص ف وشك و تضحك و تقولك الرخصة يا عسل…

    يا شعب نمرود

    nice post 😀

  2. مش عارفه بستغربك اوى لما بتتكلم بجد و بعدين صح ايه الحاجات الغريبه اللى انت طالبها فصول مكيفه ايه و بلد ايه دي اللى تحترمنا……….طب قول نوفر للاطفال سندوشتات حلاوه بالقشطه ده انت غريب يا هانى P:P:
    بس جامد و الله يا عممممممممور استمر بقى D:D:

  3. يابنى اتن شوفت فصولنا اصلا عشان تتكلم عليهم . احب اطمنك ان الفصول عندنا احسن من اى حته تانيه فى العالم . والطرق نضيفه و مفيهاش كوارث ولا حوادث . و فى 5000000000000000000000000000000 وظيفه الحكومه موفراها للشباب البطلان واللى مبيشتغلش . والاجور حتزيد فى الخطه الخمسيه الجاية بنسبة 700 % . و الواحد يقف اودام المرايه و يقول ( انا كويس انا حديد انا زى البمب) و حيوقف اصدى يوفق على طول انشاء الله

  4. سلاااااااام:
    آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه وأنا بقول؟؟؟ منين جابولنا موضة تحية العلم في الصباح والمساء، ماحنا كنا ملاح والولاد بيحيو العلم مرتين في الأسبوع بس كل يوم صباح ومسى ده كتيييييييييييييييييييييييييييير وأنا حاسة أنو الولاد كرهوا بلدهم بسبب النشيد وأصبح مع الوقت مستهلك ودقة قديمة وكمان ماعدش حد يحترموا أصلا ………وبعدين يشتكو من ذهاب أصوات التلاميذ مطبعا كل صباح نباح ومواء وحتى نقيق ولما يدخل للقسم يدخل يرتاح من الصراخ والله حقهم يصومو طول النهار عن الكلام ……….

    تحية من بنت الجزائر .رايي.

  5. بالنسبه لضفيتنا الجميله رايي…………………… ده انا مرضتش ادخل في التقيل يا رايي ده انا قلت ابقا سطحي واتكلم عن المواضيع من فوق بدل مندخل في اماكن ملها اي لازمه وحتجيب الوجع لراسنا وقفانا……………..وطبعا شكرا ليكي يا ايمو يا قمر وبعدين لازم برده شويه جد كده ………………نيجي لعمرو باشا شتله………………..شكلك بتتمحلس لاخوانا اللي علي المكاتب علشان توصل بتبيع قضيه بلدك يا جزمه ليك يوم يا ابن النخله……………..وبالنسبه للمعلم خشابوز بعد الكلمتين اللي قالهم مقدرش انطق معلم طول عمرك يا خشابوز……………وشكرا ليكوا كلكم


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬514 بنى آدم
  • أحسن مشاركات

  • التصنيفات