هــذه بـــــلاد….لم تعـــد كبــــــــلادي

الهجرة غير الشرعية
بعد حالة من الملل و الفتور الشديد…و بعد فترة من مخاصمة الكتابة…و هجرة القلم…و قد قاربت حبارتي على الجفاف..
– ثم أنا أصلا بكتب عالـ word لا حبارة ولا نيلة -…قررت أن أعود للكتابة…لكن أكتب عن ايه…و لمين؟؟؟

قررت أكتب عن الإنتماء…..انتمائي لأمتي العربية… أمتي العظيمة….اللي هي فين معرفش؟؟ هي فين الأمة صحيح؟….”يا أمــة”…. مش بترد عليا الأمة!!

طلعت من اوضتي لقيت أمي في المطبخ…سألتها “هيا فين الأمة يا ماما؟”
أمة ايه دلوقتي انت مش شايف ايدي مشغولة…تعالى ساعدني في شغل البيت ولا انتو فالحين بس تقعدوا قدام الكمبيوتر و انا اللي……دب دب دب دب…الاسطوانة بتاعة كل يوم اشتغلت…
قلت اسيبها في جو الحلل اللي هي فيه ده…
طلعت لقيت أبويا قاعد في الصالة بيتفرج عالتلفزيون قلتله بابا…فبصلي بانتباه….سألته…”فين الأمة يا بابا؟”
قاللي “أمك جوة في المطبخ” ….قلتله “الأمة يا بابا…الأمة ؟”
رفعلي عينه من تحت النضارة ” انت سخن ياله ولا إيه؟”

قلت لأ بقى…كفاية تهزيق كده أوي….و سبت البيت و نزلت….و انا خارج لقيت عم فاروق البواب قاعد يقرا الجرنال على باب العمارة….قلت بس…عم فاروق ده راجل مثقف هو اللي حيجاوبني….اتجهت ناحيته بكل لهفة و شوق…و تطلع للإجابة اللي مستنيها من بدري…وقفت قدامه و قلتله “عم فاروق….فين الأمة يا عم فاروق؟”
بصلي عم فاروق…و فضل مركز في عيني…و عدم اجابته بتسرع و تريثه و تفكيرة العميق قبل الإجابة…خلاني ملهوف أكتر…إلى ان نطق..
“أقولك ولا تزعلش!”

حتى انت يا عم فاروق…كتير كده أوي….انا اتهزقت…….ايه الناس دول!

و ساعتها افتكرت مقولة بتقول “خدوا الحكمة من أفواه المجانين” و افتكرت عم “عبده كلاماتا”….الراجل الغلبان ابو هدوم مقطعة اللي مش لاقي ياكل و قاعد على اول شارعنا جنب اشارة المرور…لا يملك في حياته غير حتة راديو ترانزيستور…و البطانية اللي بتغطيه و هو نايم عالرصيف…

قررت أروحله…مبدهاش بقى…عالأقل حيرد عليا أي رد….مش حيهزقني زي باقي الناس…
رحت و وقفت قدامه….و سألته….”عم عبده….كلهم بيضحكوا عليا…كلهم بيستهفئوني….محدش راضي يرد عليا…هي فين الأمة يا عم عبده…رد عليا يا كلاماتا”
بصلي عم عبده و ضحك ضحكة سخرية…و فجأه لقيته بيشاورلي على مجلة مرمية في الشارع!!!
قلتله ” ايه يا عم عبده…انت مخبي الأمة تحت المجلة ولا ايه؟” …فضل يشاورلي عليها لحد ما رحت و جيبتها…
لقيت واد مُز كده على الغلاف سألته “مين ده يا كلاماتا؟” فاللي
“متعرفووش؟؟؟ …ده مهند…الواد الخايب بتاع المسلسل التركي”
سكت شوية…باحاول أفهم و ده ايه علاقته بسؤالي؟!….و بعد نفكير…فهمت…و بانبهار شديد بصيت لعم عبده اللي كان عنده الاجابة اللي مكنتش لاقيها عند العاقلين ولا المثقفين…
“ياااااه يا عم عبده…فهمتك يا عبقري…بقى انا كل ده بادور عالأمة…و الأمة بتتفرج عالمسلسل التركي!!”

و رجعت البيت و انا كلي يأس من حال الأمة….لكن كان لسة عندي شوية تفاؤل ان الأمه لسه فيها حد زي عم عبده…
و قعدت قدام الكمبيوتر…افكر تاني انا حاكتب لمين……بس!!! لقيتها….بلاها أمة
انا حكتب عن انتمائي لبلدي…
بس هي فين البلد؟……يا بلد!!…مش بترد عليا البلد؟!!….و لأني اتعلمت الدرس….قررت مسألش لا أمي ولا أبويا…ولا حتى عم فاروق قليل الأدب…
و دغري رجعت لعم عبده….لقيته زي ماهو قاعد ببطانيته عالرصيف بيسمع الراديو…وقفت قدامه و سألته…”عم عبده….هي فين بلدنا يا عم عبده؟”
بصلي عم عبده و مردش…و رجع بص للراديو بتاعه…و قعد يقلب في محطاته لحد ما جاب محطة و وقف….و لقيت واحدة بتقول: إذاعة الأغاني من القاهرة…موعدنا الآن مع رائعة العندليب عبد الحليم حافظ “عدى النهار”….
و لأني تعبت من اللف…قعدت جنب عم عبده اسمعها…. “عدّى النهار .. و المغربية جاية…تتخفّى ورا ضهر الشجر…و عشان نتوه في السكة….شالِت من ليالينا القمر…و بلدنا ع الترعة بتغسل شعرها”

و اول ماسمعت اخر جملة اتنطرت من مكاني و بصيت لعم عبده…
مش معقول!! البلد سايبانا لايصين كده و رايحة تغسل شعرها عالترعة!…طب ده كان زمان ايام حليم…انما البلد فين دلوقتي؟! زعقت زي المجنون”يا بلــدي……….ردي عليا يا بلدي!!”
هيا اتزحلقت في الترعة ولا ايه؟
و رجعت من عند عم كلاماتا العبقري حالي ميفرقش كتير عن أول مرة…
طب أكتب عن انتمائي لايه!….. انتماء مين يا عم انت و هو….إنتماء لأمة مش فاضية…بتتفرج عالمسلسل التركي…ولا انتماء لبلد وقعت في الترعة من ايام الثورة و لسة محدش طلعها…

…و أكلم مين…مين حيرد عليا…مين حيقولي بلدي فين؟ ….مين حيقولي أمتي فين؟ طيب انا مش حتقل عليكوا…انا مش عايز اعرف هما فين…..بس حتى محدش حيقولي امتى راجعين ؟؟
في عصري ولا في عصر ولادي؟
في زمني ولا زمن أحفادي؟
قولولي انهم راجعين…انشالله في زمن أحفاد أحفادي الجايين….
كفاية اموت وانا عارف انهم راجعين…كفاية أعرف إن أحفادي حيبقوا عايشين…كفاية يعرفوا ان أجدادهم ضحوا عشان يعيشوا مرتاحين…كفاية يعرفوا ان كلمة انتماء مش كلام مجانين..كفاية مش حيعيشوا وسط عصابة حرامية و نصابين….كفاية يفهموا ان الحق حينتصر و لو بعد حين…كفاية حيبقى لهم صوت مش حيعيشوا مكتومين…كفاية حيتعلموا صح مش هيطلعوا متخلفين….كفاية حيلاقوا رعاية مش حيعيشوا مهملين…كفاية حيلاقوا احترام مش حيعيشوا متهانين…كفاية حيعرفوا طريقهم مش حيفضلوا تايهين…كفاية حيطلعو كاس العالم مش حيتعادلو مع بنين :D….كفاية حييتقدروا في أرضهم مش حيعيشوا مهاجرين….كفاية اني احس ان انتمائي حيجني ثماره و لو بعد سنين….
كفاية يلاقوا مستقبل كويس مش زينا ع-السلم مرميين…
بس يرجعوا….هما فين ؟؟

ما تردوا عليا ؟؟؟ انتو فين ؟؟ لسة بتشوفو المسلسل ؟ …. زعلتوا أوي لما إتقال
“كنا أمة محمد..أصبحنا أمة مهند” ؟
مش أخبار نور و مهند بقت أهم عندنا من أخبار بلادنا و بلاد المسلمين…. يبقى ليه زعلانين؟

خليكوا قاعدين!! خليكوا نايمين!! و هي يعني فارقة مع مين؟ هي بلادنا ولا بلاد الناس التانيين؟

قـَدْ كـَانَ آخِرَ مَا لـَمَحْتُ عـَلـَي الـْمَـدَي
وَالنبْضُ يخْبوُ .. صُورَة الجـَلادِ
قـَدْ كـَانَ يضْحَـكُ وَالعِصَابَة حَوْلـَــــــهُ
وَعَلي امْتِدَادِ النَّهْر يبْكِي الوَادِي
وَصَرَخْتُ ..وَالـْكـَلِمَاتُ تهْرَبُ مِنْ فـَمِي:
هَذِي بـِلادٌ .. لمْ تـَعُـــدْ كـَبـِلاد

توقيع
Echo of Silence


———————————————

Advertisements

13 تعليق

  1. sa7ee7 nseet a2ool en el she3r elly fel a5er da qasida L faro2 gwida katabha 3n shababna elly bymoto bel koom fel hegra 3’eer el shar3iya…harbaneen mn 7al baladna….harbaneen L 3isha a7san…my3rfoosh enohom harbabo L 2borhom!

  2. كويس ان لسه فى حد على الاقل فاكر كلمة انتماء
    انا كنت فاكرها اتلغت من الارض للسماء
    جاى يقوللى انتماءز…وانا اصلا كلى استياء
    بلد حالها مايل…..والشعب منها شايل
    هموم على الناس بتدور….وناس ماشيه تتدور…..لقمة عيش تكفى يوم ولا اتنين
    حرام..البلد مش لاقينها….والانتماء تاه وسط الزحام
    ياترى يابلدى مخبيالى ايه………ياترى يامتى مخبيا لبلدى ايه

    وعجبى

    • yup w 3agaby 😀
      thx 4 stopping by, bro

  3. gamda moooooooot bgd 7lwa awi w bnsba lel 2omma hya msh rg3a nw 5als 3shn nour w mohanned da 154 7l2a w b3den da 7sb el 2omma mtb3ah 3la anho knah 3’er kol da mohanned 3ml moslsl gdid esmo merna w 5aleel:D
    3lik el 3wd b2a fi el 2omma 😀

    • thx a lot ya Eman….w allah ytamennek ya o5tchy 😀 …3al a2al wesletny egaba w 3reft homa emta rag3een…..kolaha 154 7ala2a 3la mas2oleetek wel 2omma 7alha yensele7….ya mosahellllll

      w eh “merna w 5alil” da kaman !! akeed Mohannad a5ed Door Merna….mynf3sh 5alil 5ales…dana elly 5aleeel gamboh

  4. سلااااااااام :
    فجأة اليوم وقعت على مدونتك التي كنت بحثت عنها كتير بس ربنا وفقني اليوم ………ونعود للأمة أنا حتى كنت نسيت من أي أمة نحن وأصلا عمري ما حسيت بالإنتماء لا للعروبة ولا لشي ثاني واليوم حتى الإنتماء للوطن مابقاش زي الأول وأصلا مافيش أول ….و لن أكذب عليك أني احس أن إنتمائي لهذا الكمبيوتر أكثر من إنتمائي لأي أمة على وجه الأرض وأنا أدعو لثورة بس مش على شكل الثورات العربية اللي بقت موضة قديمة …قلت أدعو لثورة نطلق بها أمة المدونين وأمة الكرة وأمة الكمبيوتر و كمان أمة الخبز ودي أهم طبعااااااااااااااااااااااااا.
    المهم ما أنساش أقول هارد لك رغم أنو التعادل مع زمبيا مش خسارة بس انشاء الله تعوضوها وطبعا مش على حسابنا ….سلام.

    تحية من بنت الجزائر.رايي.

    • معاكي حق….بس بلاش موضوع الثورة ده….احنا سلمنا ماشي جنب الحيط….

      و ان شاء الله نعوضوها…..في 2014 لو ربنا أذن….

      سلام رايي و ممكن تدخلي عالرابط ده اسهل عشان متدوريش علينا كتير
      http://www.elselem.tk
      و السلم سلمك بقى تنوري في اي وقت

  5. الله عليك يا خشاب … موضوع فوق الفظيع

    مش عارف ليه موضوعك ده فكرني بحوار مع والدتي .. اصلها عقبال عندك طلعه عمره .. قولت استغلها

    فبقولها … عايزك بقي ياا م مصطفي تدعيلي مخشش الجيش … عايزك تقطعيني دوعا

    فردت عليا بكل جديه …لـــــيـــه يا حبيبي ده واجب وطــنــي

    ناااااااااااااااااااااااااااعم يا ختي وطني ايه يا حجه ، نهارك تيت … هوا انا مش ابنك ولا ايه … في ام كده

    ولسه بحاول اقنعها … بس اخر محاوله بقي اني اقريها الموضوع ده … وربنا يجعل في كلامك الشفا يا خشاب

    • ايه ده…في أم كده ؟؟؟!! الست دي يا طيبة زيادة عن اللزوم…يا كرهاك زيادة عن اللزوم
      عموما انا مستعد اقوم بواجب وطني و أكلمها بنفسي….احنا عندنا كام حوووووده…..

      و ربنا مايكتبه لا عليك ولا علينا…كفاية سنين عمرنا اللي ضاعت عالسلم….قصدي في الكلية

  6. ياريت تدينى نمرت موبايل عم عبده عشان شاكله شاب (كووووول) وعايز اخد بطانيتى واروح اعد جنبه

    • عم عبده محلتهوش غير بطانية و راديو ترانزيستور….انما لو تحب أعرفك عليه آخدلك منه معاد عالرصيف و ندبرلكوا لقاء

  7. و على فكره عم عبدو ظلم نص الامه لانهم مبيشفوش مهند عشان متابعين ستار اكاديمى

    • صحيح….ان بعض الظن اثم!


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬514 بنى آدم
  • أحسن مشاركات

  • التصنيفات