الانتماء .. و الوجة الاخر للعملة.

godfather-movie-023الاب الروحى …كلمة كتير بنسمعها و بتهز ناس مننا مش كلنا … قصدى الناس اللى فعلا اب روحى … و انا واحد من الناس دى … بس انا مش هتكلم عن فكرة الاب الروحى لان الموضوع دة وقع من على السلم اليومين دول .
لو حد شاف الفيلم العظيم ” الاب الروحى ” باجزائة الثلاثة … و ازاى واحد مدلع و المفروض ان هوة البسكوتة بتاعت العيلة يوصل لدرجة انة يعمل اللى عملة “مايكل كورليونى” فى القصة .. و الصراع النفسى بين الانتماء العائلى و الواجب المفروض عليك و الجزء الخاص بية فى شخصيتة اللى عايز يبنى عائلة لا بتاجر فى المخدرات و لا محتكرة القمار هيشوف الانتماء بشكل تانى غير اللى كلنا بنشوفة . يعنى بدل ما هنشوف فخر و اعتزاز. هنشوف واجب و التزام .
يعنى بوضوح … مين كان يتمنى انة يبقى مصرى؟ … مين كان يتمنى انة يبقى قاهرى او اسكندرانى؟ محدش و لكن النتيجة انة بقى التزام عليك انك تبقى منتمى لمصر . و ملتزم بردة انك تبقى فخور بالانتماء دة . و ملتزم بردة بانك تبقى مؤمن بالتوجهات بتاعت بلدك حتى لو انت مش مؤمن بيها (المقصود هنا التوجهات المجتمعية مش السياسية) عشان يبقى عندك انتماء. ودى نفس الفكرة اللى كانت جزء من قصة الاب الروحى . واحد اسف فالكلمة ” فرفور” بعد ما كان بدء خطوات اندماجة فى المجتمع الامريكى بشكل سلمى جدا. عشان خاطر عيون فكرة الانتماء للعيلة يتحول شكل و اسلوب الاندماج من منتهى السلمية لشكل من اعنف ما يكون .
يعنى انشاء الله كل واحد عندة انتماء لشىء , و غالبا مش بيكون الانتماء دة مش بمحض ارادتك المنفردة . هيجى عليك وقت لازم تضحى بحاجة فى سبيل الانتماء دى ولو حتى فكرة . بصراحة , حاجة فعلا تحبط . يعنى واحد زى “مايكل” اتورط فى الصراعات العائلية بتاعت اهلة لان مفيش حل غيركدة. واحد زى الطفل فى المدرسة مفروض علية كل يوم الصبح انة يقف و يضرب تعظيم سلام لعلم هوة مش بيحب الوانة وبيقول نشيد مش عاجبة .و الامثلة بين المرحلتين من التضحية لا تعد ولا تحصى. كل دة لية ؟؟؟
طبعا الكلام اللى انا بقولة دة حاسس فية بشوية تخريف .بس معلش عندى سؤال . لية ؟؟ و لية و انا صغير افضل اتعود على نشيد واحد و علم واحد لحد مغصبن عنى يبقوا جزء من حياتى . مش دة ظلم ؟ لية معيش اية حاجة بدون انتماء لحد ما اكبر و اميز و بعد كدة اقرر انا عايز انتمى لفين ؟ ولية كل اللى بيعمل كدة بنبصلة على انة مارق .
عارف ان فى بدل الاجابة الف على الكلام اللى بقولة . البلد دى هى اللى كبرتك و عملت منك راجل. العيلة دى هى اللى خدتك فضلها و من غيرها كنت هتبقى ولا حاجة . مش كل الناس حلويين زى الناس اللى حواليك .احمد ربنا على النعمة اللى انتى فيها وكلام كتيييير قوى . الكلام دى بقى صح ولا غلط . يعنى هل المفروض انى اقبل الفكرة لان ببساطة شديدة ” دى سنة الحياة ”
بالامانة … مع ان فعلا هى دى الحقيقة ببساطة . بس مش عارف اقنتع بيها . مش عارف التزم بالانتماء لحاجات كتير قوى . ابسطها انتمائى للمجتمع الشرقى .و هنا بقى اللى مش عارف اوصل معاة لحل. ياترى بقى فى ناس كتير كدة زى حلاتى . ولا يمكن اكون اتجنيت و انا مش عارف . بجد انا محتار .
على قد مالحيرة مسيطرة عليا على قد ماقتنعت بفكرة … افتراح بان كل واحد يراجع نفسة و يشوف هل هوة فعلا عندة انتماء للحياة اللى هوة عايشها ولا هوة عايش فيها كدة وخلاص . على الاقل لما يتاكد ان هوة فعلا عندة انتماء فعلا يعرف يكون مفيد فى حياتة . بدل المسميات اللى بقت موجودة فى كل حتة عالفاضية و عالمليانة . ولا اية ؟؟

Advertisements

5 تعليقات

  1. شوف يا سيدى
    الانتماء فى الفيلم ده يلخص فى جمله واحده
    لما حب مايكل يروح الجيش ، قالوله
    ( انت رايح تحارف من أجل ناس مش من دمك ؟؟؟؟ )
    هو ده الانتماء الوحيد ، لأن مافيش حد فينا مصرى من أيام تحتمس ، كلنا جينا من أصول متعدده و ما حدش نعرف ولا حد يقدر يثبت ان اهله مدفونين فى مصر من ألاف السنين.
    انك تنتمى لشئ انت شايفه بنفسك و هو أهلك ، هى الحاجه الوحيده انك تثق فيها
    ولو قلت ان أهلك جزء من وطنك ، حقلك كلام مش ولابد
    لأن وطنك فى وقت من الأوقات كان يمتد فى مكان ما متغير من وسط أسيا الى جنوب أوروبا الى وسط أفريقيا
    و أن الحروب و النزاعات التى خاضتها أى دوله ، هى انعكاس مباشر للصراع الذى يقوم به ولاة أمورهم و من يستفيدوا بشكل مباشر من الصراع
    و أن كل البشر سواء من أصل واحد
    أنا شخصيا ، انتمائى لذاتى فقط ، و عند موتى ستنتهى حياتى و انتمائى ، و هى الحقيقة الواحده التى نعيشها.

    • اقولك على سر …
      انت جيبت اللى انا عايز اقولة من الاخر… ناس كتير قوى عملة تردد فى شعارات كتير عن انتماءات مختلفة , سياسية على دينية على عرقية .. و لو قلت للواحد فيهم طلعلى دليل مادى واحد على انتمائك دة هيقف و هيرفع ادية لفوق. انا شخصيا بوافق خضرتك جدا فى رايك ان الانتماء الاول و الاخير هو للذات . اما الباقى كلة فاسف على اللفظ يعنى ” ضحك على الدقون”.

  2. انا رأيي…الانتماء تعود….لو انت مصري ابن مصري اتولدت في اليابان و ابوك رباك و عودك وعلمك من و انت في اللفة انك ياباني و اليابان دي بلدك و بتحبك و ليها فضل عليك…حتطلع منتمي لليابان بكل مشاعرك…
    لا في انتماء في الدم بقى ولا الشعر ولا الدقن ولا كلام الأغاني ده….

    thx, Don Fat7i Corleone

  3. بص انا موافقك اوى على موضوع ان المصريين خلصوا من ايام تحتمس ده . و بصراحة كده المنطق بيقول ان افيد حاجة واقعيا تخدم الانسان فى حياته هو انتمائه وحبه لنفسه وبس. لكن مع ذلك انا مثلا مش قادر انتمى و احب نفسى وبس لان موضوع الانتماء ده اولا و اخيرا موضوع بيختلف بين واحد و التانى حسب (ربايته و مجتمعه و حتى جيناته)

  4. اهلا يا صلاح وحشتونى والله……………اول حاجه انا بحب فيلم الاب الروحى جدا وولا مره اتفرجت عليه حسيت انن مايكل مجبر على اللى هو بقى فيه لان ده الجو اللى عاش فيه فمش صحب ان الانتماء يتغير……….اما انا مش بنتمى لحاجه غير اللى انا بحبه وعاوزه اقتنع فيه …بس اكيد فى الاخر عندك انتماء لبلد مش علشان هى بلدك لا علشان اهلك عايشين فيها والناس اللى بتحبهم فيها مش علشان شربت من نيلها المياه ممكن تستورد عادى يعنى………


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬514 بنى آدم
  • أحسن مشاركات

  • التصنيفات