إسأل مجرب ولا تسأل حبـيـــب

347292dikh_w
من غير فضايح
بما إني مش بحب الفضايح وبحب الموضوعية وبما إني معجب بمعظم مواضيعكوا اللي فاتت وكل مرة كان نفسي اكتب وقلمي يشوف النور “أو بالمفهوم الديجيتال كيبوردي يشوف النور” وبما إني شايف نفسي بقى فيلسوف عصري وأواني وسفير الكلام أيام الكلية -كانت أجمل أيام- وبما إن الحاج Echo of Silence مرضيش ياخد المقال ده عني وينشره بنفسه وخلاني أكتب باسمي… فأنا أتمنى أكون ضيف خفيف بقى عالسلم ولو إني نفسي أرتاح وأقعد معاكم كتير…

نخش فالموضوع بقى “الحب” الحب نفسه.. أصلي حقولقوا حاجه هو لو حب يبقى مش حيفشل… ممكن نقول إن أبو عمر مفشلش لأنه لسه لحد النهارده بيكلمها – الله أعلم بيكلمها هيا بس وللا بيكلم أمة محمد كلها – بس أهي العلاقة موجودة، آه هيا وقفت عند حد معين وموصلتش للنهاية المتوقعة بس هيه لسه فيه فرصة أكيد وتتصلح فيها الأمور، مين عالم، إعذروني لأني مؤمن بإن الجواز هو نهاية طبيعية لأي حب – مش مأساوية يا متشائمين – بس بقى يا عيني عالصبر، الصبر مفتاح الفرج والله.

“إن أكبر غلطة يرتكبها الرجل في حق نفسه، هو أن يتزوج من حبه الأول” –
د/ مصطفى محمود الراجل الطيب الجامد جدا – الله يشفيه ويعفو عنه – قال البق الجامد ده في كتابه “في الحب والحياة” – لازم تقروه لو عاوزين تحبوا وتتحبوا – قالك لأن الحب الأول أفلاطوني بحت عفيف كله أحلام وردية طايرة فوق في السما لدرجة إنك لو فكرت في حبيبتك كأنثى تشتهيها ممكن تلوم نفسك إيه قلة الأدب ديه إزاي أفكر فيها بالشكل ده.. يعني حب فشنك مش مكتمل المعاني ماهي لامؤخذه مش لوحة فبرواز
وللا تي شيرت فيه عرق بيكهام عاوز تعلقه عالحيط لحسن يتبهدل أوخايف تلبسه لحسن يتغسل ويروح العرق…

نرجع لعم مصطفى بيقولك إن الحب ده بينتهي بصدمة بس بتفوق البني آدم ويدخل بقى على مرحلة جديد ويحب تاني بس المرة ديه بيكون متفتح ويتكعبل كعبلة تانية وهوب الحب اللي بعده بقى يكون كامل النضج والمعاني بالقلب والعقل – حب كامل الدسم – وده يخليني أرجع أقولكوا إن الحب الحقيقي مش بيفشل إنما التجارب هيه اللي ممكن متكملش زي ما احنا متوقعين علشان هيا ناقصها حاجات كتير، إبراهيم الفقي بيقول مفيش حاجه اسمها فشل انما هي تجارب بتبوظ عشان تاخد منها خبرة تعلمك تنجح في التجارب اللي بعدها..

ده رأي دكتور مصطفى ويحترم وخصوصا بالنسبة لمعظمنا اللي ماشي يحب على روحه وبيقع في تجارب كتير، بس مش بيعجن يعني بيحب من طرف واحد وياخد بعضه بهدوء أو بيحب حب متبادل ويفترق بعده، لا بيعك ولا فاتحها عالبحري وعامل قلبوا سبيل.

إنما في رأي تاني.. للي عاوز السمو.. للي بيعتبر إن الحب من غير أوان والحب عمال على بطال والحب رايح جاي وبلد هنا وبلد هناك، وهم كبير بيضيع علينا فرصة الاستمتاع بالزواج أو الحب الحقيقي اللي بيبتدي فبيت، مش لازم بيت الزوجية إنما بيت الأسرة، بيت تدخله تحب في النور مش في بير السلم، بيت تتنقل منه بحب عمرك على بيتك علشان تبنوا حياه كامله مليانه حب، حب زوج لزوجته وزوجه لزوجها، حب أم لجنين في بطنها وحب أب لمولود على إيده شايل إسمه، حتة عجينة هشه كده يشكلوها زي مايحبوا، تخلد حبهم.

حتحب مره والتانية والتالتة وتتجوز الرابعة، وبعدين؟؟ كل ما يحصل منها حاجه تقول ياه ديه فلانه كان ممكن متعملش كده معايا، ياه عالموقف ده فلان التاني كان ممكن ينبسط أكتر ويحسسني بقيمة اللي عملته ده علشانه، ويبدأ العقل الباطن يفكر لحد ما فجأه وغصب عنهم مش بإرادتهم يكره مراته وهو مش عارف ولا هيا ليها ذنب، أو تكره جوزها ومتعرفش تعيش معاه حياه مستقره، ده كان رأي عمرو خالد للي فاتح قلبه عالبحري ويجري ورا الحب..

هو إنتوا يا بشمهندسين لما جيتوا تدخلوا كلية الهندسة كنتوا عاوزين تدرسوا هندسة كعلم وللا عاوزين بالعلم ده تبقوا مهندسين في المستقبل واللي دخل طب وعلوم وزراعة وخدمة اجتماعية مش كان عاوز بعدها يكونوا دكتور أو عالم أو أخصائي إجتماعي حتى – رحلات بقى وليلة وكل حياتهم ترفيه -؟ طيب اشمعنى الحب؟؟ اشمعنى الحب اللي عاوزينوا نتعلموا ومش عاوزين الهدف الكبير الطبيعي إننا نكون أسرة ده حتى ربنا هو اللي خلق لنا من أنفسنا أزواجا لنسكن إليهم، أيوا ويا سلام على عظمة ربنا سبحانه وتعالى وجماله لما يقولنا “هن لباس لكم وأنتم لباس لهن” ياااااااااااااه من كتر الحب حتكونوا كل حاجه لبعض.

حد فكر لو قال لواحدة كلمة بحبك حيقول لمراته اللي بيحبها بجد إيه؟؟ ولو قالها حتكون كلمة معبرة نقية وللا حاجه اتقالت لأي حد، سيبكوا من ان الجواز ده حاجه وحشه افرض حبيتها أو حبتيه بجد تميزيه بإيه؟؟ آه في أفعال وعلاقات مختلفة بس يا ترى الكلام حيكون مختلف إزاي وأجمل كلمة اتقالت لأي حد أو كذا حد كذا مرة، ده بغض النظر عن ناس تانية وحشة علاقتهم ولعياذ بالله كانت علاقة زوج وزوجة خرجت من الطهر والعفة للي أفظع من كده، ليه عاوزين ندخل الكلية واحنا لسه فابتدائي ما نستني لما نذاكر ونعدي مرحلة مرحلة عشان ننجح، ليه نحب على روحنا ما ممكن نحب فوقت الحب، ولحد ما يجي الأوان مطلوب مننا حب أكبر، حب ربنا وحب سيدنا محمد صلى الله عليه وسلم وآباءنا واخواتنا والناس، صدقوني والله العظيم ده اللي حيرقى بحبنا الأصيل الحب اللي بيحلم بيه أي واحد وواحدة لدرجة أسمى معاني الحب، علشان حيكون حب طاهر من قلوب نضيفة لسه شباب متبهدلتش في مدرسة الحب ووقعت ومقدرتش تتخرج وتبقى زوج عطووف وأب حنين، زوجة رقيقة وأم رائعة.

بجد ابعدوا عن الحب اللي فغير أوانه، ابعدوا عن العلاقات اللي ملهاش نهاية واضحة، وقفوا العلاقات الجميله اللي شايفينها حتنجح بالجواز لحد ميكون الأمور تحت النور أو اجروا بسرعة خدوا الخطوة وربنا عمره ما حيبخل عليكم برزق أو أي حاجه تحتاجوها في سبيل انكم مش عاوزين تغضبوه أو تعملوا حاجه غلط وتبهدلوا نفسكم وتبهدلوا ولاد الناس معاكم، واوعوا الشيطان يخليكوا تتشائموا وتشوفوا الدنيا سودا بالعكس والله ربنا كريم أوي وعمركك ما ممكن تتخيل كرمه وحتفضل تسأل نفسك بعدين هو أنا وصلت لكل اللي أنا فيه إزاي وأنا كنت شايفه مستحيل.. أصل اللي بأمره كل شئ كان معاك ما فارقكش لحظه عشان انت مكنتش عاوز تعمل حاجه تغضبه،،

تعالوا نعاهد نفسنا، نعاهد ربنا إننا نعيش بالحب وللحب بس في النور،،، لو بجد عاوزين الحب…. الحب نفسه..

توقيع
Pharaoh Artist

Advertisements

20 تعليق

  1. هو ده أخوووووووويا 😛

    نورت البلوج و مقال انا شخصيا اتأثرت بيه و مش مجاملة لانك اخويا يعني…..لأني في وقت بقيت حاسس فيه اني ماشي بدماغي في سكة و كل اللي حوليا ماشيين عكسي….و بدأت احس اني مش طبيعي…..او اني مزودها حبتين….
    بس الكلام ده هو اللي بيخلي الواحد يكمل في طريقه اللي رسمه لنفسه…و يمشي بدماغه و لو ضد كل اللي حواليه…احسن ما يمشي بدماغ حد تاني….

    • يا سلام…… أولا شكرا على الإستضافة،، وشكرا على العنوان اللي أضافته انت للمقال “اسأل مجرب ولا تسأل حبيب” وبما إن ديه أول مرة أعرف إنك إنت واخد النهج ده من البداية فبجد إنت صح “من ترك شيئا لوجه الله عوضه الله خيرا منه ولو بعد حين”
      ده عن تجارب ناس كتيييييييييييير أوي كلامهم عن الحب صادق لدرجة انك تتخيل مدى حبهم الحقيقي اللي جالهم فوقته وقد إيه مستمتعين بيه…

      ربنا يوفق الجميع ويا رب مقالي يعجب الناس وأشوف نقض من الآخرين…

      • ينصر ديـــــــــــــــــــــــــــــــــــــــنك يا استاذ…خليــــفــــــــــاااااااااااا

        “حد فكر لو قال لواحدة كلمة بحبك حيقول لمراته اللي بيحبها بجد إيه؟؟”

        فعلا….انا كتير فكرت فيها من المنظور ده….اصلك لو مش مصدق الكلمة و هي طالعة منك تأكد 100% ان اللي قدامك مش مصدقها….
        انا اعرف ناس كلمة بحبك اسهل عندهم من “صباح الخير”……ربنا يهدي

  2. اولا نورت البلوج

    ثانيا: اللى انت بتقولوا كله كلام زى اللوز
    وفعلا الحب كلمة بلت من كثرة استخدامنا لها

    بس الفكرة ان الواحد مبقاش عارف هيتجوز ويحب وكده امتى؟
    يعنى انا عن نفسى حاسس انى ممكن البس دبل قبل ماموت 😀

    وده اللى الرسول صلى الله عليه وسلم قاله
    ” إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير ” رواه الترمذي
    وده اللى حاصل دلوقتى والحب اللى عمال على بطال ده اقل الفتنة لان فيه اكتر بكتير واكيد انت عارف
    عشان الناس بطلوا يشتروا راجل وبقوا يشتروا شقة او عربية او حتى توك توك

    • “يعنى انا عن نفسى حاسس انى ممكن البس دبل قبل ماموت”
      😀 😀 😀 😀 😀

  3. ميرسي يا أبو صلاح بس منا بقول بعلو صوتي اعمل اللي عليك وسيبها على الله وخدها واحدة واحدة، أنا معرفش انت فين فالدنيا بتدرس وللا مخلص وللا وراك جيش وللا فمجال عمل معين بس أيا كان خدها واحدة واحدة ولو حبيت أو اتعلقت بواحدة وشايف انك إمكانياتك واستعداداتك تمام توكل على الله وربنا المستعان،، لكن للأسف الشيطان بيصورلنا دايما انه مفيش أمل عشان نقع في الغلط وخد بالك أيا كان مفيش حاجه بالساهل وبما إنك عارف كلام سيدنا محمد عليه الصلاة والسلام فكن واثق من كل الكلام وفوق كل شئ كلام ربنا سبحانه وتعالى “الشيطان يعظكم الفقر” وكمان ” أحسب الناس أن يتركوا أن يقولوا آمنا وهم لا يفتنون” صدق الله العظيم…

  4. نورت البلوج طبعا و بجد البوست حلو أوى
    بص أنا فعلا مقتنعه بكلامك وهو ده فعلا اللى أنا بعمله يعنى عمرى ما قلت الكلمه دى لحد و نفسى فعلا ماقولهاش غير للحد اللى حكمل معاه حياتى أن شاء الله عشان انا مقتنعه أن ده نصيب و وقت ما ربنا يكتب أن يبقى فى حد فى حياتى حيبقى فيه بس بطريقه صح كلامك فرق معايا كتير عشان كل اللى يشوفهم بيحسسونى أنى مش طبيعيه بس بجد أنا مش عايزه أبقى كده عايزه لما أحب أحب بجد و يبقى اللى بحبه ده أول و اخر حد و علاقتنا تبقى نقيه
    بجد مبسوطه أن فيه حد بيفكر كده يعنى مش بيحب على روحه زى أغلب اللى بشوفهم و مش كل اللى شغلوا البنات بجد ما شاء الله عليك و ربنا يسبتك و يسبتنا و يبعدنا عن كل حد كل حاجه وحشه….

    • اللهم آمين.. وبجد مش أكتر من الحمد لله الذي هدانا لهذا وما كنا لنهتدي لولا أن هدانا الله..

      أقولكم على حاجه؟؟ أنا كتبت الى بطبقه ومقتنع بيه وكمان لقيت أخويا بيقول نفس الكلام وأبو صلاح وحضرتك.. طيب يا جماعة هو احنا كنا محتاجين نلاقي بعضنا؟؟ عشان نطمن؟؟ ممكن والله لأن الجماعة بتثبت بس لو ملقناش حد يثبتنا على الحق في مبدأ لازم نتفق عليه “إذا كنت أنا حلو وكويس أنا مش الوحيد في الكون الناس كلها حلوة وكويسة وأحسن مني كمان لحد ما هما اللي يثبتولي العكس”
      ومش معنى ان في ناس وحشين يبقى كلوا كده، طيب ازاى بقى نصدق ربنا لما بيقول “الطيبون للطيبات والخبيثون للخبيثات” وبرده من حكمة ربنا إن في ناس كويسة تقع في ناس وحشة من باب الإبتلاء واصطفاء ناس عن ناس.
      صدقوني يا جماعة الحرامي مبيبطلش سرقة لأنه شايف كل الناس حرامية ولو مسرقش غيره حيسرق 🙂 طيب اشمعنى هو ثابت على الباطل واحنا خايفين نثبت على الحق مع ان الثبات على الحق اسهل كتير من الباطل..

  5. الحمد لله إن بجد الناس اللي بتفكر بالطريقة ديه كتير بدليل إنكم مش مستغربين الموضوع.. وبرده مستنيين موضوع خشاب الصغير (Echo of Silence) وللا انت خايف من حاجه أصلك متفق مع كل الناس مش راسي على بر..

    • ههههههههههههه…..هو المشمش بيطلع امتى؟

      و بعدين هو فرح 😛 مهو مندوب عن العيلة نزل الموضوع كفاية….
      ايه الناس اللي غاوية فضايح دي!!! عموما ده اول رد ليكي واجب نقولك نورتي البلوج برضه…لا تقولي ميعرفوش في الاصول 😛

  6. أنا أخت أبو صلاح و تقريبا كده أسرتنا و أسرتكوا متفقين على الموضوع ده عايزين حد من بره الأسرتين دول يقول رأيه و يارب نلاقى ناس كتير كده هو طبعا فى ناس كتير مقتنعين أن ده الصح بس مش بيعملوه…….

  7. اولا : بجد الله ينور عليك زى ما نورتلنا البلوج.
    ثانيا : انا مش هتكلم كتير على اللى انتى كاتبة .. انا بس هحاول اوصلك اللى انا عايز اقولة فى كلمة واحدة ” انتى وجعتنى”

    • “سلامتك من الوجع” والجراح سهل نداويها 🙂

  8. سلاااااااااااااااااااااااااااااام يا ناس السلم اللي هنا و الغايبين كمان .
    الحمد لله لأني سمعت اليوم كلااااااااااااااام عااااااااااااااقل ، و الله و لا الفلسفه و لا خطب الجامع ، كلام يفتح النفس و يعلو بيها للرقي ، الحمد لله أني وجدت من يوافقني الرأي في علاقات ما قبل الزواج اللي بتمتص العواطف و تستنزفها و بعدين مافيش حاجة تتبقى للزوجة أو للزوج مكلو وزعو شمال ويمين على المزز من كل نوع ، وحتى صديقاتي اللي بحكيلهم مقالات السلم و حكاياته حتى إنهم كل يوم يسألو عن ماتبقى من التجارب رايحين ينصدمو لما أفاجأهم بكره بالمقال ده ، أصلهم بيقولوا عني متخلفة عشان برفض علاقات قبل الزواج توزيع كلام الحب على اللي رايح واللي جاي أصلي مش عاوزة أتشوي في النار عشان كلام رايحة أندم عليه عمري كله بس اليوم لقيت دعم من السلم نفسو ، رغم أنهم حبو كتير تجربة الجـــــــــامد ” أبو صلاح ” الراقية اللي ولا في الأفلام ……….
    الحقيقة أنو الحب اللي بعد الزواج بيدوم أكثر عشان كده تشوف الأزواج اللي حبو بعد الزواج متفقين ولو بعد ميت سنة أما ماقبل الزواج فتشوف العياط يملى البيت لما تختفي الأشياء اللي حبو علشنها ” الجمال أو المال أو ….” و طبعا أنا ماقصدش أبو عمر عشان متأكدة أنو طيب أو “نية” زي ما بنقول في الجزائر ، و المهم أن كتاب السلم منورين البلوج بأروع الأفكار و التجارب …….

    سلام يا قاعدين ع السلم والدور على مين يكتب ؟؟؟؟ بستنى……رايي/ الجزائر.

    • الحمد لله… بس ماتنسيش إن الحب نفسه كحب لا عيب ولا حرام حتى وإن كان قبل الجواز فالقلوب دبيد الله يقلبها كيف يشاء، الفيصل هنا إزاي نواجه الحب ونوجه مشاعرنا للطريق الصح، لطريق النور، مش عيب أبدا نتعلق بحد ونستلطفه ونحلم بمشاركته الحياة المهم إننا نمشي في النور مش نحب في الضلمة، في حديث هو الحقيقة في بعض لعلماء أضعفوا سنده لكن خلينا نقوله “لم يُر للمتحابَين مثل النكاح”

      وكل شئ قسمة ونصيب.. وأدينا عالسلم بندردش ونفهم

  9. سلااااااااااااااااااااااام:
    كلامك صح و أنا مش ضد الزفت ولا حاجة بس الحب عندنا بيأدي على العموم لشيئ وحيد زي ما يقولو كل الطرق تؤدي إلى روما و عندنا أغلب الحب يودي في داهيه لأن كل طرف عاوز يستغل الآخر أكبر قدر ممكن الشباب عشان الغرايز السعار اللي حاكمهم و البنات عشان الكلام الحلو والهدايا و الطمع كمان و نستثني طبعا الحب العذري و دا نادر في الزمن الأغبر ده ، الحب مش عيب و لا حرام بس في النور زي ماقلت و يتتوج بالزواج أحسن وأحسن ، بس الكرسة أنو معايير الحب عندنا مش ولا بد اللي بحب عشان يغير جو واللي مش عارف بيحب إلا بالجملة و اللي يحب بنية مسبقة وتخطيط….وكل يوم تيجي موضة جديدة في الحب ……..

    بس قلولي فين إعترافات الباقيين ولا خايفين يكلموا بعد درس الشيخ Pharaoh Artist يالله و ربنا ماتخافوا أصل التوبة تمحي اللي فات رغم إني متأكدة أنكم والله إولاد ناس كويسين ومش من النوع الثاني يعني إنو قلبكم أبيض …

    سلاااااااااااااااااااااااااااااااااااااااااااااااااااااااااااام يا سلالم ………….رايي/ الجزائر ………….

    • هههههههههه….. يبقى العيب في الناس مش الحب نفسه،، ونرجع ونقول لو احنا كويسن حنثق ان في زينا كتير وأحسن مننا كمان….

      ثانيا أنا مش شيخ ولا حاجه بس كل الحكاية إن مش بعرف أفصل بين الدين والدنيا هيه كلها عندي شروة واحدة وومكن تلاقي ده فاستشهاداتي أنا مش جايب أمثلة من صحيح البخاري أنا بتكلم من الحياة..

      طلب صغير بمناسبة كلامك “كلمة الزمن الأخبر” محدش يا جماعة يشتم الزمن أبدا ده خطأ شائع بنقع فيه ربنا سبحانه وتعالى قال في الحديث القدسي “لا تسبوا الدهر فأنا الدهر” عفانا الله وعفاكم

  10. الصلي علي النبي يا معلللللللللللللللللللللللللم……………..والنعمه واحشني مووووووووووووت يا ابو حميد……………فينك يا عم من زمان حارمنا من مسجاتك ليه بس……………..لا بس بجد ما شاء الله موضوع شديد علي حق وكلام كبير علي حق………….بس انتا مش معايا يا محمد انك كاتب الكلام ده لانك الحمد لله ربنا وفقك ولقيت اللي حتملي عليك حياتك وحتحسسك بالاستقرار النفسي والعاطفي في حياتك…………صدقني انا ساعه مححس بالاحساس ده مش حبقا عاوز حاجه تانيه من الدنيا …………انا عن نفسي كل اللي بتمناه اني قلاقي الاستقرار مش اكتر مع الانسانه اللي فعلا ححس انها فهماني وشرياني . وفي ناس كتير زيي بيحاولوا يتعرفوا وينموا علاقاتهم لغرض انه يلاقي بنت الحلال اللي حيستقر معاها حياخدها ويجري بيها للحياه اللي ربنا كاتبهالهم …………..وبجد بجد نورتنا يا محمد باشا ووحشتنا واتمني اشوفك قريب جدا والاكورد الجديده جيا وبازن الله حزفك فيها احلي زفه ………….وان شاء الله تجيلنا بالسلامه

    • انت والله واحشني أكتر وديما ببعتلك سلامات مع الواد أحمد…

      معاك إني بتكلم على أرض صلبة بس قبل ما أقف عليها ماشكتش لحظة إن نصيبي حيجيلي إن شاء الله وكنت شايل كل حاجه حلوه لصاحبة النصيب… وبما إنكم غاويين تعرفوا تفاصيل وأنا مش حنولكم اللي فبالكم بس أنا فعلا حافظت على كل حاجه علشان خاطر صاحبة النصيب… الصبر يا حبايب الصبر أنا الحمد لله بفضل الله وصلت للي أنا فيه بعد معانااااااااااه مش بالسالهل وبرده توفيق كبييييييييييييييير من ربنا ماكانش فإيدي حاجه غير فضله سبحانه وتعالى ورضا الأهل وكل حاجه بتيجي أكيد بشويتين معاناه وتعب ومشاكل وكعبلة بس لأننا فالدنيا يا جماعة محناش ملايكة ولا الجنة فاتحة فرع عالأرض… الحياة حياة

      ربنا يرقكم جميعا بالزوج الصالح والزوجة الصالحة وتكونوا صحبة طيبة في الدنيا والجنة.. وإياكم.. آمين

      • امين يا محمد باشا امين…………..ويسمع من بقك ربنا ويديك علي قد مصبرت …………..ويصبرنا علي اللي احنا فيه يا رب


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬836 بنى آدم
  • أحسن مشاركات

  • التصنيفات