عايز اعرف ….

of_all_things_sad-12فى ليلة مش ظريفة تماما … و جو ملبان نكد و كأبة سيطر عليا فجأ’ة .. وكملت بان السنوية الاولى لحبى (الضايع) الاول على الابواب . شايف الحب الضايع بنظرة عجيبة جدا . يا ترى هو الذكرى الحلوة ؟ ولا الجرح الكبير اللى مش هيتقفل ( زى منا حاسس) ولا هوة خطوة على طريق العلاقة العاطفية المضبوطة بالقلب و العقل اللى تقدر تكمل بيها حياتك مع الانسانة اللى تفهمها و تفهمك .. فعلا مش عارف .
يكمل النكد بانك تفتكر اليوم اللى قررت فية انك تحط الماضى ورا ظهرك و تكمل مشوار حياتك من غير متبص وراك .. ما تفتكرش اليوم اللى كان ليك فية حبيبة بغض النظر عن مين هى . او قصتك معاها كانت حلوة ولا سيئة . و تعيش بقى وانت وحيد . مش عارف انت رايح على فين ولا انت عايز اية . و ياترى ملامح حياتك بعد المرحلة دى هتبان امتى … يكمن ناس عدت من المرحلة دى بسرعة . انما بالنسبة لواحد من عينتى الموضوع دى هيكون من اصعب المواضيع اللى ممكن يواجها فى حياتة . و فعلا و عن تجربة السلم كان الحل المثالى لكسر الحالة النفسية اللى بتركب الواحد فى المرحلة دى .
من ناحية تانية بقى .. الوحدة فعلا بعد الحب الاول بتقتل . بتقفد الثقة فى نفسك و فى الناس اللى حواليك. و يسيطر عليك احساس انك مش هتحب تانى او مش هتتحب تانى زى مكان حبيبك الاول بيحبك . حتى و لو كان شخص سىء او النهاية فى حد ذاتها سيئة لازم هتلاقى دقيقة بينك و بين الشخص دة هتحس ان محدش هيقدر يديك زييها .و الاحساس دى بقى هوة قمة الاحساس بالعذاب لو سبت نفسك لية .
حاسس ان فى حاجة وحشانى … يا ترى حبى الاول ؟ ولا احساسى بالحب ؟ ولا اية بالضبط … فعلا مش عارف . فعلا مش عارف انا عايز اية ولا بدور على اية .. ياترى بدور عليها ولا على الاستقرار ولا على نفسى .. فعلا مش عارف . لما تحس انك عايش لمجرد انك الفروض تبقى عايش انهاردة و امبارح و بكرة . لية و ازاى معرفش . السؤال اللى عايز اسألة دلوقتى . هل الحب الاول بيعمل كدة فالناس كلها؟ ولا انا بس اللى عبيط و مش عارف اسيطر على نفسى ؟ فالناس اللى اعرفهم مشوفتش حد حالة من حالى . ولا خيبتة زى خيبتى .
على اى حال و مهما كانت الاجابة يطلع منها سؤال تانى و هو دة فعلا السؤال الاهم اللى ممكن نستفيد منة فعلا . ازاى نطلع من الحب الاول باقل الخساير ؟ كل واحد مننا فى حبة الاول كان شايف الدنيا وردى وانة اقوى من اى حاجة تقدر تقف قدام حبة و كانت النتيجة مع معظم الحالات ان كلة اخد المقلب المتين و ركن جنبنا على السلم . بس للاسف فى ناس انهارت و ضيعت حاجات كتير جدا مع الحب الاول . يمكن ناس تشوفهم اغبياء او ضعفاء . بس انا بصراحة و ان كنت بحملهم جزء من المسؤلية الا انى فعلا بشفق على اى واحد بعد الحب الاول . لان اقوى مدخل للشيطان هو فى الحالة دى و الحالات المشابهة .
فعلا … نعمل اية؟ نلغى قلوبنا يوم من شوف حد و من اول نظرة نرتاحلة نمشى و نسيبة ؟ و لا نعمل خريطة الطريق قبل اى خطوة ناخدها لحد مرتاحلة. و لا نعيش على طريقة زمان و نمشى على سكة الصالونات . انا واحد من الناس عايز احب و مش عايز اتجرح عايز الاقى الانسانة اللى اكمل معاها حياتى و مش عايز الاقيها فالصالون . عشان بقى انا عايز كدة هفضل كل فترة احب و اتجرح ؟ و لنفرض . قلبى دة هيستحمل الجرح كام مرة ؟ و لا الدنيا ماشية على نظام ” اللى عليز الورد يستحمل الشوك “؟؟ فعلا اتمنى انى اعرف …

Advertisements

7 تعليقات

  1. من اكتر سينجلاوى متعايش مع الفكرة ومرتاح
    الى اكتر سينجل كئيب وغير متأقلم نهائيا
    لا تبحث عن الحب فلن تجده ابدا ان بحثت عنه او انتظرته
    انساه هتلاقيه قدامك وساعتها هتقدر كمان تقرر
    مش حتى ترضى بالي يجيلك وخلاص

  2. “عندما يغلق الله بابا يفتح أبوابا كثيرة ولكننا نظل طويلا ننظر إلى الباب المغلق”

    وبما إنك عارف إن الشيطان سهل يتحكم فيك ويعمل فيك كده يبقى إلجأ بقى للي يخرجك من الهم ده… “ربنا سبحانه وتعالى”

    حب ماتتجوزش من الصالون بس إوعى تحب قبل متكون على استعداد إنك تتقدم وتبدأ المشوار لكن لو لسه بدري يبقى حافظ على نفسك..

    يا جماعة ربنا خلقنا لهدف في الحياة والحب أجمل وسيلة للنجاح في الحياة لكن مينفعش يكون غاية
    لو محبتش ربنا مش حتبقى مؤمن ومش حتنفذ تعاليمه
    لو محبتش سيدنا محمد مش حتقدر تسمع كلامه
    لو محبتش الصحابة مش حتقدر تعمل زيهم
    لو محبتش بابا مش حتقدر تحترمه ومتطيعه
    لو محبتش ماما مش حتقدر تشيلها على راسك من فوق
    لو محبتش إخواتك مش حتقدر تعيش في هنا وسعادة
    لو محبتش دراستك مش حتنجح ولو محبتش النجاح نفسه وكرهت الفشل حتفضل محلك سر….

    إحنا ربنا خلقلنا الحب يساعدنا على الدنيا مش يكسرنا ويمرمطنا ودماغنا متفكرش فغيره وحياتنا تضيع بسببه….. أي فرس معرض لكبوه إحنا مش أسود لكن الشاطر اللي يقوم يجري حتى وإن كان مجروح يجري ويكمل السباق ويداوي جرحه في الطريق.. وأقسم لكم عمر الكآبة والانعزال ما بيخرجوا الواحد من همه ولا بيداوا الجرح ….. بيكون بطيييييييئ أوي

    أنا لما بمرض مبحبش النوم فالسرير لأنه بيخلي المرض ياخد راحته عالآخر…. وأنا بقى مش فايقله لو هدني يوم لازم أنا اهده… خدها تحدي يا مان قول للحب الضايع أنا اللي حكسرك وأنا اللي نهيت بمزاجي وأنا بقى اللي حكئبك مش إنت اللي حتكئبني وكمل حياتك وإنجووووووووووي……….. “نصيحة حاسب نفسك كويس على اللي فات واعرف الانفصال سببه إيه عشان تبقى استفدت ومتكررش نفسك”….

    سلامات يا صاحبي… أتمنى أن أراك عصي الدمع شيمتك الصبر

  3. سلااااااااااااااااااااااااااااااام يا ناس السلم …..
    أسفة على التأخير في التعليق على التدوينة الجديدة أصلي نسيت كلمة السر لدخول الإنترنت من حاسوبي و استغرقت يومين تجريب و دعاء حتى تذكرتو أخيرا …صحيح ده زمن النسيان .
    نرجع للتعليق و أنا شايفة mavroxx بيعاني كتير و الظاهر إنو حب بجد بس التجربة كانت قاسية شوي رغم أني عتبانه عيك لأنك ما فهمتناش إيه الحكاية و لا عاوز تاكل بعقلنا حلاوة ؟؟، لا و الله حتحكي يعني حتحكي و أنا بحرض أبو عمر و أبو صلاح و Echo Of Silence أن يدفعوك لتحكي و بلاش عموميات …..بس المهم إنك و ضعتنا بجد أمام مفارقة الحب و الماضي ، طبعا كلنا نتفقين على أن الحب حلال في عمومه ، أما الماضي أو بقايا الحب غير الناجح و مخلفاته هو المشكلة عند الإنسان صاحب الضمير و اللي بيدور على الحلال زيك يا mavroxx يعني بيحب عشان يتجوز مش عشان المتعة ، و الحل طبعا سبقنا ليه شيخنا Pharaoh Artist و هو إنك تواجه الماضي وتصارحنا و تصارح نفسك إيه اللي صار بالضبط و ليه كان الفشل …و طبعا اللي بيعرف المطبات أمامو صعب يقع فيها من جديد وزي ما قال الرسول صلى الله عليه و سلم ” لا يلذغ المؤمن من جحر مرتين ” و المرة الثانية أكيد حاتكون مفتح و جاهز لتتويج الحب بالزواج و بلاش الحب لأجل الحب بس ، أصلي بكره نظرية “كانط” و الواجب لأجل الواجب ..
    المهم أن الجميل في التجربة دي إنها مامرتش بدون أثر كحكاية وبس ، لكنها درس بيعلم و الشاطر مين يستفاد من صفحات حياتو وأملي فيك إنك شاطر ………
    يالله طولت عليكم كتير وإنتو مش ناقصين دروس و مواعظ ، سلام يا ناس السلم .

    رايي/ الجزائر

  4. اولا .. شكرا جدا جدا على المشاركة بالتعليق ..
    ثانيا .. و دة شىء انا لم اصدقة الا لما قولتى انك عايزة تعرفى القصة .. ان كان المفروض تبقى موجودة فالبوست . لذلك دى غلطة عندى و اوعدك هصلحها عن قريب ان شاء الله .

  5. الأخ أبو صلاح قرأت تعليقك على موضوع سؤال برئ أولا أشكرك على زيارتك المدونة وأهنئك على مدونتك الجميلة بمواضيعها الراقية فقط لى ملاحظة أنك ظننت أنى أدخلت الموضوع فى الطائفية بالعكس أنا ضد الذين يريدون أن يلبسوها رداء الطائفية وبخاصة هؤلاء الذين يطلقون عليهم أقباط المهجر وأرجو أن تتطلع على هذا الرابط لترى هل إذا كنت أريد أشعللها أم لا على هذا الرابط : http://lokmetaesh.blogspot.com/2009/04/blog-post.html

  6. بص انا زيك بلظبط بس انا بحب واحد اوى وهو بيخنى وانا عارفه كده بس مش بقدر ابعد عنه حاسه ان محدش هيحبنى قده انا محتاره اوى وعارفه الى بعمله ده غلط انا سبته فتره وقولت يمكن يتغير واستحملت وقولت يمكن يتغير بس لاسف مش يتغير ولسه بيخنى وانا عارفه بس انا معرفش انا بحبه ولا متعلقه بيه صدقنى انا زيك ومحتاره جدا

    • بصي يا مريهان….اسمك حلو قوي الاول
      اولا أنا ابوصلاح….أحد كتاب المدونة
      بالنسبة للي إنتي بتقوليه بقى
      مفيش حد بيحب حد ويفكر يخونه
      واحساسك إنك عايزة تكوني جنبه….مجرد تعود
      ولازم ينتهي…..لازم تقولي لنفسك إنك أغلى من كده
      وتدوري على حد يقدر اد إيه إنتي غالية
      ويمكن يكون هو الحد ده …..ساعات بتبقى الخيانة داء
      ومش بيخون يعني عشان مبيحبكيش

      جربي تقسي على نفسك وتبعدي….ياإما هيحس إنه محتاجك بجد وهيرجع
      ويأما هتبقى نهاية الحكاية…..ساعتها صدقيني هتبقي كسبانه

      شكرا لزيارتك مدونتنا…..ومستنيين زيارات تانية 🙂


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬514 بنى آدم
  • أحسن مشاركات

  • التصنيفات