محطـــــــة…بلا قطـــــــــــــار

huge316654
كنا اتفقنا انه بمناسبة اليوم العالمي لحرية الصحافة…حنكتب عن حرية التعبير…..و بما ان الموضوع ده غالبا حيقلب بسياسة….و ان قلب بسياسة حيقلب بتخبيط…و ان قلب بتخبيط حنتقلب كلنا على مكان ما….و ان اتقلبنا على هذا المكان حنتخبط شلوط في مكان ما…و حيطلع عين اللي خلفونا لحد ما…
ما يبانلنا صاحب
و بما اني راجل جبان…و الاعتراف بالحق فضيلة….فانا قررت أمشي جنب الحيط…و لو أطول أمشي جوا الحيط حمشي…..أهم حاجة ابعد عن سلومة الأقرع….
و عملا بمبدأ حرية التعبير….فانا قررت ماتكلمش عن موضوع حرية التعبير اللي اتفقنا عليه…و اتكلم عن حاجة تانية خالص….حرية تعبير بأه!

نظرا لظهور نتيجتي المحبطة من دقائق…و وقوعها كالصاعقة عليا….قررت أكتب…..أكيد متخيلين انا حكتب ايه دلوقتي……حكتب قد ايه الدنيا وحشة….و قد ايه الناس ظالمين….و قد ايه احنا عايشين في وسط بشر فاقد لادنى صور الاحساس…قد ايه انا حاسس بالظلم…..و قد ايه انا تعيس…و قد ايه مفيش حاجة حواليا تبشر بخير…

لا لا لا…تخيلكم مش في محله….انا مش جاي اتكلم على أي حاجة من دي…أنا جاي أتكلم عن أهم حاجة عندك….أنا جاي اتكلم عاللي شاغل تفكيرك 24 ساعة في ال 24 ساعة….انا جاي اتكلم عن حلمك الوحيد…انا جاي اتكلم عن السعادة….اااه السعادة غريبة دي؟….هو احنا عايشين ليه غير عشان نبقى سعداء……هاتلي بني آدم واحد على وجه الأرض عايش لهدف تاني….هاتلي حد عايش لغرض تاني….مع اختلاف منظور السعادة عند كل الناس الا انهم كلهم عايشين عشانها….يعني الأكيد ان السعادة هدف مشترك….كل واحد بيدور عليها بس بطريقته…

في واحد سعادته في الخروج و الفسح و الهلس…في واحد سعادته في النجاح والشهرة….في واحد سعادته في جمع الفلوس….في واحد سعادته في اسعاد ناس تانيين….و واحد سعادته في ارضاء ربنا….كل واحد و دماغه…

بس الملاحظ و الغالب اننا دايما بنربط السعادة دي بهدف معين…الوصول اليه يعني لنا الوصول للسعادة….
و انا طفل صغير قلت امتى بقى اكبر و اروح المدرسة زي اخواتي…و لما دخلت ابتدائي قلت امتى بقى اخلص من هم الواجبات و القرف ده و ابقى زي اخواتي الكبار لا بياخدو واجب في المدرسة ولا أي التزامات….و لما دخلت ثانوي قلت امتى بقى تعدي ايام حرق الدم دي و ادخل كلية الهندسة اللي نفسي فيها و يستريح بالي و اكون اطمنت على مصيري و اتحرر شوية من وصاية أهلي عليا….و لما دخلت الهندسة (اللي مش عارف أطلع منها دي) بقيت بقول امتى بقى اتخرج من الزفتة دي و اشتغل في شركة كبيرة و اجيب عربية حلوة….و ان خلصت و اشتغلت في أكبر شركة و جبت احسن عربية حقول امتى بقى حتجوز و استقر…..و ان حصل و مع أول عيل حخلفه و يوجع دماغ اهلي حقول امتى بقى يكبر شوية و استريح مالدوشة دي…و لما يكبر و مصاريفه تزيد حقول امتى بقى اقدر اؤمنله معيشة و مستقبل كويس و اجوزه و اطمن عليه….
ياااااااااااااااااااااااااااااااه….هو انا حفضل مستني السعادة دي لحد امتى….ده انا كل ما افكرها قربت الاقيها بتبعد….و بعدين!!
لما انا حعيش حياتي كلها أدور عالسعادة و موصلهاش….يا فرحتي….كسبت ايه غير الهم والتوتر و القلق و الارهاق و عدم الاحساس بالأمان طول عمري…
طب ليه ماقررش ابقى سعيد دلوقتي..ايه اللي يمنع يعني….و انا ايه ضمني اني حعييش لحد ما تيجي هي بسلامتها…
منا فيها اهه…منا عايش و بايدي دلوقتي ابقى سعيد….و ماشيلش هموم يومي و هموم سنين قدام…
اعيش اليوم بيومه…اعيش سعيد و ايه اللي مانعني…و ايه اللي حكسبه لو عملت العكس…

ليه دايما نخلي السعادة غاية…..ليه متكونش هي الطريق….
ليه نخلي السعادة محطة…..ليه متكونش هي القطار…..

لو كنت زيي….عايش و رابط سعادتك بشيء يا عالم حتحققه في المستقبل ولا لأ…..انسى انك توصل للسعادة….اعرف انك كل ما حتعدي تحدي….حيظهرلك تحدي جديد…هي دي الدنيا…
فاعرف انه القرار بايدك دلوقتي…انت اللي حتقرر تعيش سعيد….برغم كل حاجة…و أي حاجة حواليك…
يا تختار تعيش سعيد من اللحظة دي بكل بساطة…و تغير نظرتك للدنيا….يا تستنى زي اللي بيستنوا…نصك عايش مهموم بماضي كئيب….و النص التاني مستني خايف من مستقبل مجهول….و ابقى قابلني ان وصلت للسعادة….ولا اقولك بلاش تقابلني…انا مش عايز اقابل ولا اشوف حد كئيب بعد النهارده….انا عايز اعيش سعيد….انا عايز استمتع بكل لحظة في حياتي…..انا مش عايز اشيل هم يوم انا جايز اموت قبله…
انا تعبت مالحسابات…تعبت مالخوف…تعبت مالقلق…تعبت مالتفكير…..انا عايز ادوق السعادة اللي ياما أجلتها….و جه وقتها….اه هو وقت غريب حبتين…لكن و عسى أن تكرهوا شيئا و هو خير لكم…

توقيع

Echo of Silence

Advertisements

15 تعليق

  1. اولا فعلا الاعتراف بالحق فضيحة
    وانت لازم تتعاقب على الطريقة اللى انت استخدمت بيها حرية التعبير
    من غير ليه……ممكن تعتبره سلو بلدنا

    ثانيا مشكلتنا اننا بنربط سعادتنا بحاجه مش موجوده ومش فأدينا
    ولما بنوصلها مبنتمتعش بيها انما بندور على غيرها
    مع اننا لو افتكرنا تعبنا قد ايه عشان نوصلها…هنقفش فأمها و هنفرح بيها اوى
    هى الفكرة ان السعادة قرار….لو قررت تبقى سعيد هتبقى سعيد
    بس اللى احنا بنعملوا ده ايه معرفش
    ممكن تعتبره سلو بلدنا برده 😀

    • فعلا الظاهر العيب مطلعش فينا…طلع سلو بلدنا…
      و ياريت لا تقسوا عليا اوي في موضوع العقاب ده….و راعوا ان الموضوع اتكتب تحت تأثير كيميائي…
      و محدش يفهمني غلط في كيميائي دي…

  2. nothing more than nice post as usual;)

    • thx ya Eman…glad u like it

  3. عندك حق في كل اللي انتا قولته يا خشاب …. ليه منفرحش دلوقتي …. ونكبر من اي حاجه تانيه … ونرضا باللي احنا فيه

    الشيخ عائض القرني بيقول كلام حلو اوي عن السعاده

    • اسعد الآن فليس عندك عهد ببقائك ، وليس لديك أمان من روعة الزمان، فلا تجعل الهم نقداً والسرور ديناً.

    • السعيد من اعتبر بأمسه ونظر لنفسه وأعد لرمسه وراقب الله في جهره وهمسه.

    • أمس مات،واليوم في السياق، وغداً لم يولد ، وأنت ابن الساعة فاجعلها طاعة ، تعد لك بأربح بضاعة.

    • فعلا….الكتاب ده مينفعش ميتفراش…..نورت يا حودة و مبسوط انه عجبك….
      و الحمد الله

  4. سلااااااااااااام يا سلميين …..
    ذكرتني بمقال كتبتو من مدة في مدونتي عنوانو “البحث عن السعادة ” و أنا طبعا عملت نفس المناحة و الدوشة و استعرضت مسار حياتي اللي ماعرفش إزاي عدت و أنا أدور ع بنت اللزينة اللي يسموها السعادة و المهم إني وصلت لنفس النتيجة فالسعادة في الأخير ليست إلا حلم نظل نسعى ليه يوم ورا يوم و سنة بعد سنة ، بس أنا أدركت أخيرا أن سعادتي حتتحقق بالرضا على حياتي زي ما هي …و طبعا مع السعي لتحسينها و من جهة ثانية سعادتي الفكرية مهمة كتير …و رغم أني فرحت لما بديت أقرا المقال و ظنيتو سياسي يعني على هوايا بس إنت زوغت و دخلت بينا في موضوع ثاني رغم إنكم مكملتوش الموضوع بتاع الحب الفاشل و عيزاك تبلغ mavroxx إنو يكمل قصتو و انت كمان ..أصلنا مش عاوزين ملفات مش كاملة و من جهة ثانية صحباتي بيستنو بقية التجارب و طبعا مش حترضولي إني أتبهدل بعد العمر ده …
    ما نساش أقول هارد لك للأهلوية فيكم عشان رابطة أبطال إفريقيا و بالنسبة للزملكوية فيكم لا داعي للشماتة ….بهزر ماتزعلوش….
    ســـــــــــــــــــــــــــــــــــــــــــــــــــــلام يا أحلى ناس سلم………

    رايي/الجزائر

    • والله نفسي أكتب في السياسة يا رايي بس انا آرائي تودي ورا الشمس…..و طبعا انتي في الجزاير محدش طايلك…انما عندنا نص ساعة بعد المقال و حلاقي الباب بيخبط…و بلاش احكيلك عالباقي بأه 😀

      اما بقى موضوع mavrox انا مش عارف هو عنده النية يكمله ولا لأ….بس الاكيد اني هربت من مقالي…و مغلش بأه ممكن تسرحي باصحابك و تحكيلهم قصة من خيالك بالنيابة عني….

      بالمناسبة احنا الاربعة اهلاوية…..للاسف 😥

      سلاااااااااااااام يا احلى قرائنا

  5. سلام يا ناس السلم :::
    مرة ثانية رجعت ليكم ، خيبت أملي و أنا بستنا مقالك السياسي يا عم ، بس ماعلهش أنا عذراك ، بس بالنسبة لقصص الحب الفاشلة أنا مش حتنازل عن طلبي ….و حتنزلوا المواضيع يعني حتنزلوها …مش حتنازل أبدا مش حتنازل ..ترن ..ترن ..

    سلاااااااااااااااااااااااااااااااااام… رايي/الجزائر

    • لا لا لا حتعملي فيها شادية حعملك فريد الاطرش…
      ولا كأني سمعت حاجة 😛

      • الله عليكي يا رايي …………..ايوه ونبي خليه يكتب بقا ويبطل الرعب اللي هو فيه ده احنا في بلد حر وديموقراطي…………طالما انتا بتتكلم بس……………واحنا الحمد لله مقضينها كلام وشكرا…………يبقا تخاف من ايه…………..وبعدين خلي فكرك حلو كده وتعالي جمبي علشان متلاقي حد بيخبط عليك الباب

  6. nice….i wish u happy life
    but….wala a2olak balash wala but wala wiz 😀
    etbeset ya 3am we hayas

    • thx ya pico nawwart beetak 😀

  7. ليه دايما نخلي السعادة غاية…..ليه متكونش هي الطريق….
    ليه نخلي السعادة محطة…..ليه متكونش هي القطار…..

    عجبينى اوى الجملتين دول بجد نفسى اعرف اطبقهم

    • أمس مات،واليوم في السياق، وغداً لم يولد ، وأنت ابن الساعة فاجعلها طاعة ، تعد لك بأربح بضاعة

    جميل اوى انك حاتتها يا حودة
    نيس بويت يا هندسة وانا فوت على السماح والعفو علشان البوست دا جاااااامد

    • و انا كمان نفسي اطبقهم حرفيا….نورت يا توت يا عسل….


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬836 بنى آدم
  • أحسن مشاركات

  • التصنيفات