حكاية بلد

untitled-2

لما عرفت اننا هنكتب عن حرية الرأى…احترت كتير لحد ماجت جدتى الله يرحمها عندنا…روحت قاعد تحت رجليها زى زمان وقلتلها احكيلى حدوتة عن الحرية وزى عادتها متأخرتش وقالتلى كان ياما كان ياسعد يا اكرام مايحلى الكلام الا بذكر النبى عليه الصلاة والسلام وموسى نبى وعيسى نبى وكل من لى نبى يصلى عليه…كان مرة فى بلد صغيرة بس كان فيها خير كتير فناسها اختاروا واحد منهم عشان يدير مصالحها ويوزع خيرها عليهم كل سنة…ومرت السنين والراجل ده بيدير البلد ويوزع خيرها على اهلها بس كل سنة كان خير البلد بيقل لحد ما الناس مبقوش لاقين ياكلوا…بس ناس البلد كانوا غلابة ومبيتكلموش…وفيوم ابن الراجل ده كان ماشى هو وصحابه فى البلد سمع شاب متنور من الناس اللى فى البلد بيقول لأهلها ان الراجل اللى انتوا اخترتوا عشان يمشى مصالحكوا بيسرقكوا..شوفوا بيته وشوفوا بيوتكوا…شوفوا عياله والعز اللى عايشين فيه وعيالكوا هيموتوا من الجوع شوفوا حتى صحابه واللى حواليه باين عليهم العز وانت مش لاقين لقمة العيش.

جرى الواد على ابوه وحكى الى حصل فسألوا ابوه..الناس كان رد فعلهم ايه…فقالوا محدش سمعلوا…فالراجل قالوا يبنى مدام محدش سمعلوا يبقى لي الحرية انه يقول اللى هو عايزوا ومرت الايام والشاب المتنور داير فى البلد يوعى الناس…فيه ناس خافوا وهربوا من كلامه…وفي ناس مصدقوش عشان هما خايفين يصدقوا عشان لو صدقوا يبقى المفروض يطلبوا حقهم…واللى قال عليه مجنون واللى قال عليه عايز شهرة…بس فيه شوية ناس سمعوا كلاموا وبقوا يقولوا اللى هو بيقولوا للناس..فعرف الابن وجرى على ابوه وقالوا يابا الناس بتعيد اللى هو بيقولوا…احنا لازم نمسكوا ونعذبه..فرد عليه الاب قالوا لا امسك اللى بيعيد كلامه وسيبوا هو وفعلا مسك الابن كام واحد من اللى كانوا بيقولو كلامه وعذبهم فى وسط البلد…فرجع الناس تهرب من الشاب المتنور تانى.

بس الشاب ده مخافش وميأسش وكمل عشان عارف ان ربنا مش هيضيع تعبه…وقدر تانى يلم شوية من اهل البلد حوليه وقالهم ان خير بلدكوا بيضيع ولو فضلتوا ساكتين الواد هيورث بلد ابوه وهيضيع حق عيالكوا زى حقكوا…جرى الواد على ابوه وقالوا الكلام وقالوا امسكوا يابا…قالوا يابنى لو مسكتوا هيقولوا بلدنا مافيهاش حرية وان احنا بنكمم الناس بس اشترى اللى يسمعلوا ويعيد كلامه ولو معرفتش تشتريه اسحلوا فى البلد عشان يبقى عبرة اما هو حطلوا السحر ده فى اكله…ونفذ الولد وصية ابوه اشترى اللى باع واللى مرضاش يبيع وداه ورا الشمس…اما الشاب المتنور لما اكل السحر اتسخط كلب ومشى يعوى فى البلد بس المرادى الناس مش بس مبقتش تسمعوا بس كمانبقى لما يقرب من حد يرميه بأكبر حجر قدامه وبقوا يحلفوا ان عمر مابلدهم كانت حرة كدة لدرجة ان الراجل الكبير سايب كلب زى ده يعوى فى البلد. بس الكلب المتنور ميأسش وكمل وفضل ماشى يعوى فى البلد على امل انه يلاقى ولو واحد يفهموا…

وخلصت جدتى الحكاية على كده…اول مرة تحكيلى حكاية وتنتهى كده كل مرة الشاطر حسن بيتجوز ست الحسن وملاكيكوا بياكل المكرونة….طب هى جدتى كانت عايزة تقولى ايه؟..اكيد مش قصدها ان مفيش فايدة…انا عمرى متعودت منها على كده..ولو مفيش فايده مكنش الكلب المتنور كمل..وبعدين دول قالوا زمان الناس من خوف الذل يبقى مش هسكت بس انا مش عارف كدة اعمل ايه؟…اتكلم واول ماحد يسمعنى اسكت بس كده ابقى بكلم نفسى ولا اتكلم وخلاص وانشالله الناس تقول عليا مجنون ولا بهوهو…طب لما اتكلم اعمل زى اللى بيتكلموا براحة اوى حاجة كده زى معلش عظمتك فخامتك انا واخد على خاطرى عشان مش لاقى حريتى…ولا اللى يكمم بوقى ويكتف قلمى اقولوا وجهة نظرى باللى فرجلى. انا هتكلم بس هكون مؤدب مع المؤدب ومؤدب مع قليل الادب ايوة طبعا عشان انا اهلى ربونى…ومحدش هيستفيد حاجة وانا بهوهو او ورا الشمس…انما انا هتكلم بعقل من قدام الشمس واللى يسمع والحاضر يعلم الغايب بس متقولش انى انا اللى قولت.

توقيع:
ابوصلاح

Advertisements

16 تعليق

  1. haw haw !!

    • انا كده اطمنت ان رسالتى وصلت الحمدلله 😀

  2. ممممممممممممممممممممممم…………….نو كومنت يا ابو صلاح………………….بس اوعدك انك حتشوف ردي في البوست اللي حينزل قريب اوي …………….. وربنا يسهلك

    • ياعم ارحمنى من الله يسهلوا بتاعتك دى

  3. انت قولتلي اسمك الثلاثي ايه يابو صلاح ؟
    طب انت شاب و تستحمل
    ذنبها ايه جدتك اللي حتتسحب من تربتها دي؟
    ولا هي عايشة و انت بتقول الله يرحمها باعتبار ما سيكون؟ 😛

  4. لا هى لو مش الله يرحمها كانت قالت اللى قالته ده
    بس هو تقريبا شكلى وحشتها…:D
    بس انت حسابك معانا بعدين 😀

  5. بعد ما أنت مشيت بقي تاتا قالتلي أن بتوع البلديه أخدوا الكلب 😀
    ما طبعا القانون لازم القانون ياخد مجراه وطبعا أنت عارف مجراه فين P:

    • قفايا بيوجعنى لما بسمع موضوع ان لازم القانون ياخد مجراه

  6. ووووووووووووووووووووواااااااااااااااااااااااااااااااااااوووووووووووووووووووو
    تسلم أفكارك يا ابو صلاح و الله المقال دي المرة على هوايا ، و تكيفت مع القصة آخر تكييف ..دا الكلام و لا بلاش ….أصلنا في الهم سوا ….و انت ضربت عالوتر الحساس ..و ماتخفش إحنا معاك في أي ثورة أو انقلاب أو حتى نهوهو معاك معلش …أصلنا في مزرعة واحدة
    سلاااااااااااااااااااااااام يا ناس السلم و لي عودة رايي/الجزائر

    • ههههههههههههههههههههههههههههه ألبس يا ابو صلاح………………. لا يا رايي هو بيتكلم وبس ده اخره وملوش في اي حاجه تانيه…………….احنا بنحب الناس كلها وكل الناس علي راسنا من كبيرهم لصغيرهم…………….وبلاش تخبيط في الحلل الله يكرمك…………….وبجد الف شكر ليكي زيارتك الدايمه للبلوج بتاعنا وتشريفك لينا بردودك الجميله دي

    • شكرا جدا يا رايى والله مش عارف المدونة من غيرك كانت هتبقى عاملة ازاى
      ديما كده متبعانة وبتطلى علينا عموما مبسوط ان الموضوع عجبك
      بس متعملوش حسابى فموضوع الثورة دى عشان مش فاضى خالص اليومين دول
      بس لو حتهو هو…قشطة انا معاكوا
      ياريت تسبيلنا اللينك بتاع مدونتك عشان نبقى نعدى عليكى
      شكرا

  7. انا ملاحظ حركات ندالة انتشرت في البلوج….انا جبان ااااااااااااااااه….بس مش ندل…عمري ما حتخلى عنك يابوصلاح يا استاذي…
    بس خلي حد يمس شعرة منك و انا حولع ف……….

    شعرك كله

    • انا عارف ياصديقى انك مش ندل
      وعشان كدة ساعة مايحصل حاجة كده ولا كده
      هفتكرك على طوووول 😛

  8. Ya Tara min el 7akem w min 2bno! … w Min elKalb!
    U should b clearer 3ashan ngblak el 3ish wel 7alawa fel ………. Bit tb3an 😀

  9. والله ممكن نسأل جدتى على الحاجات دى
    عشان اللى بيعرف الحاجات دى مكانه مش هنا
    مكانه فوق….مع القديسين والشهداء 😀

  10. تسلم ايدك يابوصلاح
    هو ده حالنا فعلا وربنا قادر على كل شئ


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬836 بنى آدم
  • أحسن مشاركات

  • التصنيفات