لسنا احرار

Prisoner_by_Nickej88بعد حاله الاكتأب العظيمه اللي مريت بيها الفتره اللي فاتت من جراء الموضوع الرائع اللي كان مقترحه ابو صلاح بيه…………قلت افوّق بقا وانزل اشربلي واحد زرده واشملي شويه دخان  المعسل من اللي مفتقدها دلوقتي علي الفراعنه وبالمره اقابل الاصدقاء واشوف الدنيا ايه اللي اتغير فيها لاني بقالي كتير معرفش عنها حاجه قمت ظبط الأداء وبتاع وقلت اسمعلي حاجه كده في الراديو علي منزل………لقيت عمك عبد الحليم طالعلي من الراديو وبيقولي طريقك مسدود مسدود يا ولدي ….. قلت ايه القرف اللي علي المسا ده وقررت اني مستسلمش للمشاعر اللي انا فيها دي ورحت قافل الراديو ونازل…….قعدت مع الاصدقاء واتفجئت ان في مواضيع كتير بقت علي الساحه وكلها مصايب ما شاء الله مفيش اي حاجه عدله حصلت .

اولا : الخنازير جالها برد……… قلت الحمد لله احنا ملناش دعوه بالحوار ده………مش حنموت منغيره يعني  .

ثانيا : اتفجأت ان الاهلي خرج من بطوله افريقيا…….. قلت يادي المصيبه بس كده كده احنا خدناها كتير ومن حق الناس التانيه انها تحاول تاخدها برده.

فجأه برشلونه ابن المحظوظه فاز علي تشيلسي في اخر دقيقه… طبعا اتخنقت وقمت من مكاني وبكل علو صوتي قلت حرااااااااااااااام احنا لينا ( بلنتيين ) متحسبوش يقوموا ولاد المحظوظه دول يتعادلوا معانا كده… فجأه لقيت القهوه كلها عليا ولولا الاصدقاء التشيلساويه اللي كاانوا بيلعبوا حديد كان زمااني اخدت علقه تماااااااام من اخواتي البرشاويه

قلت لنفسي ده انا لو كنت في الاستاد هناك وقاعد وسط اخوانا الاسبان نفسهم مكنش حيحصلي كده…. اكتشفت فجاه ان مفيش حاجه عندنا اسمها حريه وده لسبب صغير جدا اننا مش عارفين معناها ايه؟….ولو عرفنا معناها مش عارفين نطبقها علي حياتنا…ولو عرفنا نطبقها الاكيد اننا حنستغلها غلط الا طبعا فئه قليله جدا هي اللي حتقدّر معناها وحتعرف تستغلها صح علي قد متقدر…. زي مثلا مساحه الحريه اللي بقت موجوده للصحافه في الفتره الاخيره واللي منقدرش ننكرها…..في ناس استخدمتها صح في مناقشه قضايا مكناش نقدر نفكر نتكلم فيها زمان…بس في نفس الوقت في ناس استغلتها غلط وطلعت تشتم في رئيسها في ايام الانتخابات قدام العالم كله وخلت شكلنا بقا زباله قدام الرأئ العام العالمي وايامها طلع سيادهالمرشد العظيم للاخوان وقال بعلو صوته في كل الجرايد ( طز في مصر) وكذلك فجاه ظهرت جرايد صفرا وعملت مشاكل كبيره زي جريده النبأ وطبعا كلنا فاكرين المشكله الكبيره اللي عملتها في البلد من حوالي 3 سنين كده وحوار الشريط اللي كانوا منزلينه ….طيب ونبي ادوني عقلكم ازاي واحنا لغايه دلوقتي مش عارفين لا نفهم ولا نستخدم الحريه صح نطلب انها تزيد اكتر من كده….احنا ناقصين

نيجي بقا نتكلم عن الحريه السياسيه اللي برده للاسف فاهمينها كلنا غلط خالص سواء الحكومه او المعارضه او حتي الشعب بجميع فئاته… لان الحكومه للاسف بتفكر انها تمارس الحريه من منظورها هي يعني مثلا هي اللي تفكر بنفسها في مشروع قانون جديد وتحاول تعمل عليه استفتاء فتعمل الاستفتاء بين اعضاء الحزب الموقرين اللي هما بيمثلوا الحكومه فياخدوا اجماع طبعا تيجي الحكومه بعد كده تدّخل مشروع القانون ده مجلس الشعب اللي الحكومه ليها فيه مالا يقل عن 66% من اعضائه فأول ميتناقش القانون تلاقي الدكتور احمد فتحي سرور من غير ميشوف مين رفع ايده ولا مين جري من القاعه اساسا يقولك موافقه لانه عارف ان كده كده ال66% من الاعضاء رفعوا اديهم …وبكده يبقا مشروع القانون مر بكل الطرق الرسميه بس طلع بمزاج الحكومه وهي دي الحريه بالنسبالهم….تيجي تبص علي المعارضه تلاقي كل اللي عندهم شخيط وزعيق وشتيمه وسواء بسبب او من غير سبب عاوزين يطلعولك الحكومه غلطانه في كل شئ وده في حد ذاته غلط كبير لاني حتي لو اسمي معارضه المفروض اعارض في الغلط انما الصح اقول عليه صح واكيد اكيد الحكومه مش كل اعمالها غلط يعني… نيجي بقا للشعب الغلبان اللي مش عارف يمارس حريته لانه للاسف في ناس عماله تضحك عليه سواء بالكلام او بالفلوس …الخ الخ

وفي ناس بقا نلاقيهم طالعين بكل قوه وبكل عنفوان وبكل صوت عالي ومن غير ميفهموا يقولولك لا للتوريث         ( وطبعا هو عارف نفسه كويس اللي انا قصدي عليه ) وبجد اتمني انه يسمحلي اني اعترض معاه شويه….لأني بكل بساطه شايف ان اي حد من حقه يرشح نفسه للرئاسه حتي لو كان ابن الرئيس….وحرام جدا اني احكم علي انسان من تصرفات ابوه سواء كانت كويسه او وحشه…لاننا ياما شوفنا شيوخ طلع اولادهم حراميه وياما شوفنا حراميه طلع اولادهم شيوخ…فمينفعش نقول لا للتوريث

لو كنت قلت لا للتزوير كنت حقول معاك لا والف لا…انما لا للتوريث اللي قصدك عليه فمعلش اسمحلي اقولك لا والف لا ليك انت…لانه ممكن جدا يكون هو اللي بايده الحل وممكن يكون مش هو….ربك هو اللي عالم بالنفوس والنيات

وفي الاخر احب اقولكم اننا لسنا احرار….لاننا منستهلش نبقا احرار طالما اننا مش فاهمين معني الحريه السليم….ولغايه منفهم المعني السليم للكلمه احب اقولكم تصبحوا علي الف خير وخلينا نايمين  في العسل احسن بدل منستغل الكلمه دي غلط وتتقلب فوق دماغنا في الاخر.              ( ويجعله عامر )

Advertisements

20 تعليق

  1. حلو و عاجبنى عشان أتكلمت عن الموضوع من كل النواحى و كل حد فاهم حريته أزاى بس أنا أختلف معاك فى الموضوع التوريث ده لأن اللى معترض على الموضوع ده مش معترض على فكرة التوريث لأ هو معترض على الشخص نفسه لأن طبعا معروف هو ايه , زى بالضبط لو جييت قولت أحنا حنمسك أحمد عز(الممثل طبعا….أوعى تفهمنى صح) الرئاسه الناس حتعترض مع أنه مش أبن الرئيس يعنى مافيش توريث بس كل واحد معروف هو ايه….

    • علي عيني وراسي كلامك يا ايمو…………… بس صدقيني مينفعش اني احكم علي الانسان من خلال تجربه حد تاني مهما كان الحد تاني ده قريب منه…………….زي مثلا ميكون قدامك طبق مليان لحمه وانتي جعانه وانا وانتي موجودين علي السفره وجيتي تسأليني هي اللحمه دي حلوه ولا وحشه…………..ومستنيه ردي واكيد لو كنت انا كمان جعان حقولك وحشه فحتسبيها وتمشي مع انها ممكن تبقي جميله اوي…………..متجربي وتدوقي انتي بنفسك وتشوفي حلوه ولا وحشه لو حلوه كملي اكلها ولو وحشه خلاص سيبيها وامشي…………كذلك احنا حرام اننا نحكم علي اي انسان من خلال تجارب ناس تانيه قريبه منه كل انسان وليه فكره وعقليته الخاصه اللي من حقه انه يتحكم عليه من خلالها……………ولا ايه يا ايمو؟

  2. اعتراااااااااااااااااااااااااااااااااااااااااض……

    “ولو عرفنا معناها مش عارفين نطبقها علي حياتنا…ولو عرفنا نطبقها الاكيد اننا حنستغلها غلط”
    دى الحدوتة اللى ديما بيقولوها عشان يضحكوا علينا…وانا مع فكرة الكبير انيس منصور
    ان الحريه بلا نظام‏:‏ فوضي ….بس برده هو اللى قال النظام بلا حريه‏:‏ طغيان‏

    وبص لبلد زى مالى اللى هى من افقر دول العالم واجهلهم و اختاروهم من اكتر دول العالم فى حرية الصحافة والتعبير عن الرأى….واعتقد اننا مش اقل منهم….ولو انت على حق هتسيب اللى يتكلم يتكلم لانك هتقدر ترد عليه بالفعل قبل الكلام
    بس لو انت ضعيف هتستسهل انك تكتمه وتقول ده مش قد الحرية

    “لسنا احرار….لاننا منستهلش نبقا احرار طالما اننا مش فاهمين معني الحريه السليم”
    والحرية مش منحة زى مانت مصورها….دى حاجة انت بتتولد بيها ومش من حق حد فى الدنيا انه يحرمك منها
    او حتى يديهالك ومفيش حد فى الدنيا ميستهلش يبقى حر غير لو عمل جريمة…قولى ايه جريمتنا عشان نبقى مش احرار زى مبتقول

    وبعدين ايوة…لا للتوريث….الميراث سعادتك بيكون للملكية الخاصة يعنى بيت ابوك, الكردان بتاع الحجة ولو ابوك عنده بلد ابقى اورثها ياسيدى ومحدش هيقولك حاجة….انما يبقى كل اللى عندك زيادة انك ابن رئيس ده يبقى حرام مش اعتراض على الشخص بس اعتراض على تحويلنا لملكية خاصة

    وبالنسبة لموضوع اللحمة…انا معاك بس انا وانت وكلنا جربنا قبل كده من الاكل ده ولو فرضا انه مختلف
    كلنا برده عارفين اننا هنكمل اكل بالعافية لحد لما اللحمة تخلص او احنا نخلص
    ويجعله عامر

    • اولا يا ابو صلاح كلام العظيم انيس منصور علي عيني وراسي من فوق ومقدرش اتناقش معاه لاني اكيد مستحيل فكري يبقا زي فكره…………….. وانا عن نفسي ضد فكره اني اقارن نفسي بحد تاني علشان ابقا زيّه يعني هما بكل سهوله قدروا يفهموا معني الكلمه ويستخدموها بالطريقه الصحيحه فبقت اساس عندهم ومنهج بيستخدموه علشان يتقدموا بيه………….انما للاسف احنا لما بنلاقيها قدامنا زياده عن اللزوم بنستغلها للرجوع للعصور الوسطي ايام الصوت العالي والشتيمه علي الفاضي والمليان…………وبعدين يا صلاح الحريه مش شئ احنا بنتولد بيه ولا حاجه لانك بكل سهوله بتنزل الدنيا لا انتا مختار اسمك ايه ولا مختار اهلك مين ولا مختار بلدك ايه ولا مختار اي حاجه يعني مكنتش حر في الاختيار وده لسبب صغير جدا ان احنا ماشيين علي اساس حاجه كلنا مؤمنين بيها اسمها القدر ………..كذلك من حق النظام اللي ماسك مصير مجتمعات كامله انه يحط اسس معينه ونظم معينه للحريه انها تمشي علي اساسها طالما انه لسه في ناس في المجتمعات دي ممكن تستخدمها غلط وتوقع بيها المجتمعات دي……………….. ومين قالك انه حيورثها كده مهو لو ورثها كده ابقا انا كمان ضده ……….. بس انا حبقا معاه قلبا وقالبا لو رشح نفسه في الانتخبات القادمه لاني فعلا مؤمن بفكره وعقليته الكويسه وخبرته اللي اكتسبها من حياته وده اللي حيخليني اديله صوتي ولو نجح يبقا كسبنا انسان يمكن يقدر ينفز اللي فشلوا فيه اللي سبقوه ولو منجحش يبقا مبروك للي كسب وحندعيله من كل قلبنا ان ربنا يوفقه ………….. يعني العمليه مش عمليه توريث يا صلاح دي عمليه انتخاب حره وديموقراطيه وهو زي اي مواطن من حقه انه يقدم اوراق ترشيحه والشعب يقول كلمته

  3. انتخابات حرة ويورث بيها؟!!!!
    مش قادرة اقول غير انك بتفكر بمنتهى السذاجة والسطحية
    وكأنك عايش فى دنيا غير دنيتنا
    اعذرنى بس الكلام مستفز وانا مستفزة فعلا
    ومعاك فى حاجة واحدة اننا فعلا منستهلش الحرية لو كل الناس بتفكر كدة

  4. اولا يا مي كلامك برده حضطر اقولك انه علي عيني وراسي ………….. بس اعتقد ردك نفسه باين عليه اوي اننا م فاهمين معني الحريه …………. ومعني اننا نقول علي اي حد يعارضنا في ارائنا انه سازج او تفكيره سطحي فده اعتقد انه اكبر دليل علي ان فعلا وجهه نظري سليمه واننا فاهمين معني الكلمه غلط ومبنعرف نسمع الغير ولا نرد عليه………….. كلنا بنشوف استفزاز كل يوم وفي كل حته بس لو قعدنا نغلط في الناس اللي بتستفزنا كده يبقا حنغلط كتير اوي وحنخسر كتير اوي………..وعلي العموم انا قلت في موضوعي اني ضد التزوير طبعا لو الانتخابات اللي بتكلم عليها اتزورت انما اكيد كل مواطن من حقه يقدم اوراق ترشيحه ولو حتي كان ابن رئيس الجمهوريه ولو حتي كان الزبال اللي بجي يشيل الزباله من تحت بيتك كل يوم كلنا مصريين في الاول وفي الاخر ومن حقنا اننا نقدم كل واجبات المواطنه وناخد في نفس الوقت كل حقوق المواطنه ……………. ونصيحه مني يا مي اتمني تتحكمي في اعصابك شويه وتقدري تسمعي الغير وتردي عليه وتناقشيه في فكره ويا تقنعيه يا تقتنعي بكلامه بس بهدوء………………واتمني تفضلي منورانا علطول في البلوج بتاعنا

  5. السيد / ابو عمر …
    تحية طيبة و بعد …
    بعد قراءة مقالكم المنشور فى هذا البلوج الموقر .. تبين لنا و بوضوح ان اثار الهزيمة المنكرة و المستحقة لفريقكم المنبوذ شكلا و موضوعا المسمى بتشلسى قد اثرت على امكاناتكم العقلية . و قد بداتم ترمون الناس الباطل و تصفون المجمتع الذى انتم منة بصفات لا تنطبق علية .
    فقد طننتم ان المجمتع لا يستحق الحرية .. و طننت ان بامكانك انت و من فى فأتك ان تقرر من يستحق الحرية و من لا يستحقها . لا انت و لا غيرك يستطيع ان يعطى الحرية . و لا انت و لا غيرك يقرر ان كنا اهلا للحرية او لا .
    احضر حالا لمستشفى المجانين .. تعالى بالذوق بدل منجيبك بالعافية …

    الادارة العامة لمساندة ضحايا برشلونة .

  6. عزيزي العميل……………تبين من ردكم الفاكس ………….كم انتم محروقون من داخلكم ويملأكم السواد الحالك من اخوانكم التشلساويه ……………..الذين حرقوا دمائكم الي ان جائت الدقيقه اال93 بالنبأ السار لكمالذي جعلكم تتنطتون وتحلقون في الهواء من هول فرحكتكم………….لانكم كنتم قد فقدتوا الامل في الاوصول للنهائي…………..ولكن في النهايه مبروك لكم التعادل………….. وللاسف واضح انكم من جواكم مش عاوزين تنظروا مجرد نظره لفحوي كلامي عن الحريه لانكم مبهورين جدا بالحريه في الخارج…………..مع اننا هنا عايشين حريه برده بس مقننه ويه واعتقد لو زادت عن كده حنلاقي مضايب سوده بتحصل في كل حته ضد مبدأنا واخلاقنا ومعتقداتنا……………الحريه كلمه كبيره يا رجاله وداخله في مواضيع كتير اوي مش السياسه والصحافه وبس…………..انا بتكلم عن الكلمه من منظور عااااااااااااااااااااام بس اخدت الصحافه والسياسه كمثال عليها مش اكتر……………وعلي االعموم تشكر يا عم mavrox ومن كل قلبي اتمني ليكم الفوز بالبطوله

  7. لو امنت على كلامك ياسيدى اننا شعب قاصر
    فمين اللى قرر الحكومة وصى علينا ياسيدى الفاضل
    ومتقوليش اننا اخترناها عشان احنا اتولدنا لقيناها كده
    ومش عشان هى اللى فأديها زمام الامور يبقى هى اللى تقرر مين يتكلم ومين يسكت
    والا يبقى من حقى انى امسح كلامك بصفتى ولى امر المدونة واما اللى عاملها
    وشايف ان كلامك فى نوع من الفوضى والتعارض مع السياسة العامة للمدونة 😛

    • يا ابو صلاح انا مقولتش ابدا ان من حق الحكومه انها تدينا حريتنا او تمنعها عندنا……………انا بقول النظام هو اللي من حقه يقيد حريتنا شويه………..النظام ده كلمه كبيره شامله معتقداتنا وآرائنا وعادتنا وتقاليدنا و تديننا………………………..وبعدين يا ابو صلاح انا مقدر ازعلك اوي يا جدع……………( احنا معندناش حريه وضايعين وطالع عين اهلنا ) وكل اللي انتا عاوزه صح………………بس بلاش تهديد

  8. حبيبى يا ابو اشرف
    اى يا واد الحلاوة دى كلها ……اى ياد الحرية دى كلها واخد راحتك وبتشتم فينا طيب احنا صحابك هنستحملك انما الناس دى هتستحملك لييييييييييييييييية……ياض مش كل الناس قاعدين السلم فى ناس فاهمة حرية فعلا …..مش الحرية تقول بعلو صوتك الجهييييييير حرااااااام لينا بلنتييين ياااض انت احترم حرية الاخرين
    ويعنى اى اعتراضك على يقول لا للتوريث ……واحد بيقول من دلوقتى انه مش هيدى صوتة لحد معين ودى وجهة نظرة ويمكن بيقول من دلوقتى علشان ميبقاش مجبر علية لما يلاقى مافيش حد غيرة الناس بتشجع ان يكون فى اكتر من منافس وبتعرض رأيها من دلوقتى
    انا وانت الى مش عايزين نكون احرار مسؤلين حتى مش على قد الحرية الى عاطيهلنا اهلنا ودا مش معناه ان احنا مينفعش نكون احرار
    واكيد انت مش مبسوط لما تتعامل على انك حمار مجرور
    بسبب انك مش عارف معنى الحرية او مينفعش تكون حر علشان انت شايف ان احنا شعب بيزيط فى الزيطة واخد بالك يا صاحبى ….زى ما انتا بتقول

    • بص ياض يا توت…………………انا مش حرد عليك لسبب صغير جدا …………….اني لو رديت حفضحك يا صاحبي واحكي بقا الحاجات المحظوره…………….ابعد عن طريقي يبني احسلك………………وبلاش انتا ……………..يلا من هنا ياض

  9. kalamak gamil gdn y 3omr wmwdo3 f3ln gamed. w2na shyfa eno kwyes 2wy. wf3ln nas kter gdn msh fahmen m3na el 7orya 2w fahmen wmsh 3rfen ytb2hoha 3mtn yarb tkon fkrtk wslt lekoll.tl3na kotab 2ho wbnktb mwade3,alah ysahelo y3ny .

    • ههههههههههههههههههه يخليكي ليا يا سمسمه……………انتي عارفه طبعا ان دي اقل حاجه عندي حكايه الكتابه دي………………وبعدين تشكري يا سمسمه علي الكلام الجميل ده والف شكر ليكي

  10. سلااااااااااااام يناس السلم :::::::::
    أولا مش عاوزه حد يكلم على ماتش تشيلسي و برشلونة لأن الحرقة بنفسي لازالت لحد النهارده و اسمحولي أصادر الحرية الرياضية هنا زي مابتتصادر الحرية السياسية في بلدانا و الحرية الإجتماعية في منازلنا و حرية العلم في مدارسنا و و الباقي على نفس القافية …..
    طبعا كلام كبير يا أبو عمر بس أنا بعترض لأنوا لو كان زي مافهمت إننا شعوب قاصرة كان عمرنا ما حانشوف الحرية في زمنا و ده اللي بتمارسو علينا حكوماتنا المقدسة و كمان انتقاد الريس مش جريمة يعني هو ملاك منزه أصلا و أنا عن نفسي مش بقصر …يعني يخلوا اللي بينتقدوا الرسول”ص” يقولوا اللي عهاوزينو بس لما ييجي الدور على صاحب القداسة الرئيس نوقف؟؟؟ منطيق إيه دا ….
    يا أبو عمر الحرية لازمة سواء استغليناها صح أو غلط فيه قانون هو اللي بيحكم في الأخير …أصلنا بنخلط بين الحرية و الخروجة عن القانون و الدليل حرية الرأي في الجزائر أيام التسعينات ..التلفزيون انفتح على المعارضة و كل شي سار بنظام لولا الإنزلاق في عدم احترام القانون و الدستور ، فالحرية مسؤولية أولا ……و لي عودة أصل وقت خروجي من البيت قرب سلااام

    رايي/الجزائر

    • يخليكي لينا يا رايي يا منورانا دايما ومنوره البلوج بتاعنا كله………………..اولا يا رايي انتي معاكي حق في كلامك وانا عن نفسي اكتشفت شويه اخطاء في موضوعي ومش عيب اني اقول اني فعلا اكتشفت اني فاهم حاجات غلط…………….بس في نفس الوقت انا مصر جدا علي افكار الناس عارضتني فيها ………………وعلي العموم الف شكر علي مرورك الجميل علي الموضوع عندي وعلي الكومنت الجميله منك …………..وبجد منورانا

  11. HI YA OMAR , ANA AWL MARRA AKTEB LEK W AWL MARRA A2RA LK BS ISA MSH 7TON A7’ER MARRA
    3AGEBNY AWE FE AWEL EL REPORT EL TFA2OL ELLY ENTA FEH YA OMAR.BGD OSLOBAK LAZEZ GEDDAN W 3AGEBNY AWE W HWA ELLY 7’LLANY AKAMMEL EL REPORT LE EL A7’ER
    BSRA7A ANA MALESH FE EL SYASA WALA EL KLAM EL KBER DA BS 3AMMATAN EL 7AGA ELLY LAFATET NAZARY W SHADDET ENTBAHY KLAMAK FE A7’ER EL REPORT LMMA BT2OL ” 7RAM A7KOM 3LA 3LA ENSAN MN TSAROFAT ABOH SWAA KANET KOISA AW W7SHA ”
    3NDK 72 3SHAN MA7DESH BY7’TAR OMMO W ABOH LAKEN EL ENSAN HWA ELLY BY3ML NAFSO BNAFSO W HWA ELLY BY2DR Y3’YR MAGRA 7YATO KOLLAHA .
    GAMDA MOT YEG3ALO 3AMER ELLY FE EL A7’ER .

    • بجد الف شكر يا بسمه علي كلامك اللي زي العسل ده وربنا يخليكي يا قمر علي المعنويات اللي وصلتيها للقمه بكلامك الجميل ده………………ويا ستي لو عاوزه تعرفي سر التفاؤول الشديد اللي كنت فيه في اول الموضوع ده راجعي موضوع ( الحب الضائع ) في قسم ( قصص حب فاشله ) …………….وبعدين يا بسمه احنا مواضيعناا اللي فاتت كلها هيس تقريبا وده اول موضوع جد نتكلم فيه ……………مره من نفسنا يعني وربنا يستر………………بس علي العموم اتمني تفضلي متبعاني علطول كده ومتحرمنينش من كومنتاتك ابدا……………..ولو كان ليكي مواضيع معينه تحبي نتكلم فيها تقدري تدخلي ( احنا مين ) وتكتبيلنا اي موضوع تحبي نكتب فيه ……………..ويا رب نشوفك قريب اوي بكومنتات جديده في مواضيعنا القديمه والجديده

  12. انت حر فى اللى انت بتقولوا
    وانا حرة متعجبنيش ولا كلمة فيه 😀

    • هاي يا بسنت………………هي دي الحريه اللي قصدي عليهاا…………….ان انا كان من حقي اني اكتب وجهه نظري اللي حاسس انها صح………………وانتي كمان من حقك تقري موضوعي او لا ………….وكذلك من حقك بعد متقريه انه يعجبك او ميعجبكيش …………….وانا طبعا بشكرك جدا انك قريتي الموضوع وبشكرك اكتر علي الكومنت بتاعك……………واتمني انك تزوري كل مواضيعي السابقه والقادمه وتقوليلي رايك فيها بمنتهي الصراحه……………وبجد نورتينا واتمني تنورينا تاني قريب اوي


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬514 بنى آدم
  • أحسن مشاركات

  • التصنيفات