رحلة فى عالم الاراء

لما اتقف اهل السلم على الكتابة عن التحرش الجنسى مش عارف لية جالى احساس بالتوهان … ابدء منين؟ .. ولا اتكلم على اية؟… ولا اعبر عن وجة نظرى ازاى؟
171269949_d0f7b4b3c0
فقررت انى اخد بعضى و اروح ” اروح ” عن نفسى فى وكر من اوكار التحرش و احاول اكون صورة من هناك. ولا يمكن الاقى فكرة اكتب الموضوع بتاعى عنها. المهم , كلمت صاحبى اللى ساكن فى المعمورة . و كالعادة دخل علية بابتسامة المشهورة (دايما يارب) المهم بدانا نتمشى ناحية البيت , قلت لنفسى لما اخد راية فى موضوع التحرش … و اهو واحد من اهل المكان… اية رايك يا واد يا ابو حميد فى فكرة التحرش؟ … “بص يا تيحا ياخويا… البت الجدعة تعرف تخلى اى واحد يفكر يضايقها يقف عند حدة و تديلة بالجزمة على دماغة… انما اللى تبقى ماشية على حل شعرها لازم يطلعلها اللى يعكنن عليها…. يعنى تلبسلى الحزق و الملزق…. و ترجع تقولى تحرش…. يخى… ” بس بس يا ابو حميد, مش قصدى حاجة عشان تلبس عليا الوش دة يا عم, يا تيحا , انا دمى بيتحرق كل يوم فى البلكونة … متفكرنيش الله يكرمك.
قررت انى اصرف نظر عن صاحبى (المحتاس), و اعتمد على نفسى شوية او بمعنى اصح على عينى. المهم, اتضح ان كلام صديقى المحتاس صحيح, لقيت البنت اللى لابسة مش عارف اية و مدرك اية بتتعرض لمشاكل كتير, سواء بسبب لبسها او بسبب سلوكها … بصراحة, متعاطفتش معاها , لان من الاخر هى اللى جابتة لنفسها. و من هنا لقيت نفسى بشوف وجة اخر من اوجة الحرية . ” اللى عايز ياخد الحرية على الاخر لازم يدفع الثمن “. يعنى من الاخر المجتمع مش على مزاج الانسة … تلبس اللى هى عايزاة , و تعمل اللى هى عايزاة , و مطلوب منى انى اقعد اتفرج عليها .
بدا الدم يغلى فى عروقى … و الغيظ من الطمع عدى مرحلة الفلوس و خلى الناس دى مش شايفة الحقيقة و قررت انى اودع صديقى المحتاس و انهى جواتى فى المعمورة (دايما عمرانة) و اتجة الى مقر السلم الكائن فى ميامى العاصمة.
بنتين ماشين على البحر لا بيهم و لا عليهم … و يظهر فى الصورة عيل رزل يقعد يقول كلام و يرمى ايحاءات مش ظريفة… تقوم البنت تخرج عن شعورها و تشتمة و تمسح بية البلاط … و الله جدعة, الواد تصعب علية كرامتة و يقرر انة يرد الاهانة بالمثل, و فى اللحظة دى يتدخل الناس اللى موجودين فى الشارع و ياخد الولد علقة سخنة… فى اللحظة دى افتكرت البنت التانية اللى كانت فى المعمورة … فعلا كل حاجة فيها الحلو و فيها الوحش .
نسيت القصة كلها, ورجعت لاهل السلم على القهوة. و قلت خلاص بقى بلا تحرش بلا وجع دماغ. بس بصراحة اول ما شفت حسين القهوجى مقدرتش امسك نفسى و سالته على راية فى موضوع التحرش . و لقيت وش حسين اتحول وقالى بغيظ “ما هى ما تمشيش تتدلع و تتغندر (ودة طبعا مش النص الاصلى للحوار) والمطلوب اننا نسكت و ناخد على قفانا.. يا استاذ اللى بتمشى فى امان الله محدش بيتعرضلها , و لو حد اتعرضلها ربنا بيبعتلها اللى ينجيها و يحميها… اة فى ناس بتتاخد بذنب ناس . بس دة عشان الحسنة تخص و السيئة تعم … فاهم؟
فعلا يا حسين انت جبت من الاخر , معاك حق فعلا … هات شاى بقى .

Advertisements

19 تعليق

  1. من قبل ما اقرا…. شيل الصورة ديه الله يخليك

  2. مع ان صورة معبرة عن الفكرة اللى انا عايز اوصلها … بس حاضر … عينية ليك .

  3. ملاحظة : انا مش عارف معنى الكلام المكتوب فى الصورة … عشان محدش يحاسبنى علية

  4. و جه الشاي ولا وصل بعد ماقمت بساعتين زي كل مرة؟

    انت تقريبا نقلت نبض الشارع في موضوع التحرش..يعني نبض حسين و نبض المعمورة و نبض الناس اللي ساكنة في المعمورة….الله يكون في عونه انا لما باقف عنده في البلكونة 5 دقايق بـ………..ولا بلاش الستر كويس

    مبروك لبرشلونة يا ريس….و لو اني مش مسامح الحظ في اول 10 دقايق…..بس يالله…المهم تشلسي غار ايده فاضية جنب الاسماعيلي

  5. هو طبعا محدش فاهم الغلط عند مين زى كل حاجه غلط بتحصل بس لو البنات أحترمت نفسها حتصون نفسها ومش حتبقى السبب فى ذنب حد تانى وبردو لو الولد أحترم نفسه وقعد فى حاله وساب البنت تأخد جزاءها من ربنا عشان هو مش حيصلح الكون كان الموضوح حيبقى أرحم
    بس قولى يا فتحى أنت متأكد أن حسين قالك يا أستاذP:

  6. اولا كويس انك غيرت الصورة
    ثانيا معنى الكلام اللى على الصورة دى
    احترس النساء تقاوم….وهو مش ماشى مع وجهة نظرك خالص
    بس انا المرادى شايف انك انت اللى غلطان
    عشان روحت فأيد القرد وبتشمها
    اللى فى المعمورة مش تحرش ده قلت ادب

    انتوا عرضتوا كل وجهات النظر اللى احنا حسينها اكتر ما شايفنها
    وعشان كده انا بقى عايز اكتب الموضوع
    ويكون فيه حل…ومش عارف اعمل كده
    شكلها كده ملهاش حل…الا الحل اللى فدماغى

    ملحوظة:
    احنا طلعنا ترابيزة المذاكرة فى البلكونة عشان الشقة فى المعمورة حر اوى 😀

    • انا حخلص امتحانات و اجي اذاكر معاكو باذن الله

      • دة اقل واجب يابو الخشب

    • 3la fekra el 7ar leh 7al tany , el marwa7a aw el aircondition , msh lazem el blakona y3ny , walla heya tlakek 🙂

  7. لا مبروك لا للبرشلونة و لا للخايبة مانشستر جاتهم البلا ، حرقولي أعصابي الأولى بتستعرض العضلات و الثانية مستسلمة زي الحمار ….المهم أنا حمسك نفسي عشان ما تصادرش من ع السلم و أرجع للموضوع ..و أنا طبعا يا mavroxx

    مع الصورة أصلها عجباني و بتعبر بجد عن الموضوع و إوع تسمع للمش عجباه أنا عارفه إيه اللي فارسو فيها ..و أكيد أنا بأيد كلام حسين القهوجي أصلا مافيش بنت بتلبس من غير هدوم و مايكنش غرضها لفت الإنتباه و اللي بتقول غير كده بتكذب على نفسها أولا و على من حوليها كمان و اللي بتقول أن الشباب مش لازم يبصوا غلطانة كمان يعني حيمشوا مغمضين في الشارع عشان البنت تاخد راحتها …د أنا نفسي مش بقدر مابصش فما بالك بولد كل تفكيروا في اللي حنا عارفينو .
    بس رغم هذا الكلام ده مش مبرر للمتحرشين ، أصل غض البصر مش حسب الرغبة لاااااااااااااااااااااااااااا الكنترول لازم يكون و الولاد مش لازم يتبعو شهواتهم زي الحيوانات ، اصل العقل زينة الرجال ، و جهاد النفس في دي الأمور من أكبر أنواع الجهاد …طبعا أنا مش عاوزه أعمل شيخة عليكم و لا داعية بس في رأيي أنو الإلتزام هو الحل لمثل هذه الأمور رغم إنو صعب و أنا من أول المستصعبين للإلتزام بس نعمل إيه ..طمعانين نعوض في الجنة و ببساطة مش عاوزين نخسر الدنيا و كمان الأخرة و الله مش سهل عليا و لا عليكم …
    المهم يا mavroxx ابقى سلملي على كل الشباب الحلوين ” و ده مش تحرش” و خليهم يتحفونا بباقي المقالات بسرعة أصلي بدخل كل اليوم و نفسي ألقى مقالة جديدة على الأقل كل يومين……أحلى سلام
    رايي/الجزائر

  8. @ ابو الخشب … قبل البوست و كلام البوست اسمحلى اقولك هارد لك من كل قلبى.. بس للامانة رجالتكم كانت مخيبة للامال من بعد اول عشر دقايق ….و احنا من الاخر عرفنا نسرقكم … تتعوض يا صديقى … و فى الاول و فى الاخر المان و البارسا فريقين كبار … و مفيش بينا النفسيات البتيجى لضعاف النفوس محبى الفرق الضعيفة امثال تشيلسى …. مبروك للبارسا و انصار البارسا كلهم … و هارد لك للمان الكبير اللى هيفضل كبير .
    بالنسبة للبوست … فالمعمورة و للاسف الشديد سمعتها بقت زبالة مع ان فيها ناس امثال صديقنا المحتاس … و الشاى مجاش اصلا ….تخيل بقى .

  9. @ ايمو… كلامك هو الحل الفلسفى للموضوع … و مش هوة الحل الموضوعى … لان فعلا لو كل واحد و واحدة عمل كدة مش هيحصل مشاكل من حيث المبدا… و لا اية ؟؟؟
    و على فكرة … قالى يا استاذ.

  10. @ ابو صلاح ….
    اولا … هيسب الصورة دى مهما كان المعنى … عسان الفكرة و ضعها كورقة متعلقة على الحائط و مش فى البنت اللى بتضرب الولد .
    ثانبا … انتى لما بتقول ان اللى فى المعمورة دى قلت ادب يبقى انت كدة ظلمت كل الناس التانية اللى هناك , و منهم احنا. و الناظر لو قرأ الكلام اللى كاتبة دة هيهرييك ضرب . عشان انت كدة بتهينة فى سكنة .
    ثالثا… انا اسف انى هسببلك احباط بالجملة دى … بس الحل لموضوع التحرش دة هيتمثل فى واحد من الاتنين من الحلول فى رأيى هما الاكثر واقعية .. الاول يمكن فى الحصار على الجميع و يبقى الالتزام اجبارى … و الثانى يكمن فى الحرية المطلقة للجميع و كل واحد مسؤول عن نفسة …
    ثالثا … طول ما انت قاعد فى البلكونة انت و اللى معاك … مش هتفلحوا
    سامع يا خضرة الناظر

  11. @ راييى ….
    صديقتى العزيزة … اولا معلش ما كنش ليكى حد تشجعيه فى النهائى … بس معلش … البقاء للافضل . و على فكرة احنا سلم ديموقراطى جدا بانتماءات مختلفة … عندنا مشجعين للمان و للتشيلسى … و للبارسا.
    اما بالنسبة للقضية جهاد النفس , انت بتطلبى شىء صعب حدوثة … لان الشاب من دول لو صمد مرة و التانية هيجى على الثالثة و هيضعف . و البنات اللى ماشية كدة اكتر من ثلاثة بكتير … و لا اية

  12. و عدت ثاني ، طبعا مكنش لي حد أشجعو بالنهائي بس أنا بفضل الكرة الإنجليزية رغم إن فريقي المفضل هو اليوفي من 1997 بس كنت نفسي ماتربحش البرصة نكاية في” إيتو” بس …..
    المهم بحس يا mavroxx إنك عاوز تعذر الشباب دول و احنا مش عاوزين نبرر للخطأ تحت بند الإغراءات و الضغوطات، مش كل محتاج يسرق و لا كل باصص يتحرش و لا كل حابب يتجوز و لا كل صاحب رأي يتعصب …الدنيا إلها ألوان كتيرة و أحسن شي نعيشها بكل ألوانها و نخلق لأنفسنا لون جديد كل ماشفنا إن لون الخطيئة الأسود قرب علينا ….فيه كتير حلول للتحرش زي ماقالوا الجماعة بس يبقى المتحرش نفسو صاحب القرار الأول و الأخير ، و أنا عن نفسي بستنا حل المعلم أبو صلاح أصلو باين عبقري حلول ………..
    سلام يا عالم..السلم رايي/الجزائر

  13. ملاحظة : أنا اللي عصبني في ماتش امبارح هو المعلق بتاع القناة الفرنسية الأولي كان نفسي أقتلو لانحيازو الفضيع ..

  14. غزيزتى راييى …
    اولا … سيبك من الكورة ووجع الدماغ بتاعها علشان لو فضلنا نتكلم فيها مش هنخلص و لا حتى هنتفق .
    ثانيا … انا مش بدافع عن حد .. و لا بقول ان الولد مش غلطان لما بيتحرش . الفكرة كلها تكمن فى ان لكل فعل رد فعل . و ان الولد مش بيتحرش من تلقاء نفسة . اكيد بيظهر قدامة ما يستفز مشاعرة . و يحرك جواة الاحساس بالحاجة و الرغبة . و طبعا لو من اقل شىء عمل كدة بيقى ضعيف النفس و متخلف . لان زى ما قلتى ان المفروض يجاهد نفسة … بس بردة هنا لازم افكرك بقولة الست ام كلثوم … للصبر حدود . فهمتى قصدى ؟؟

  15. ya fathy , kol mkan feh el 7lw w feh el w7esh, el m3mora w barra el m3mora , m3 enny bnt bs 7a2ollk en f3lan lebs el bnat w shaklohom b2a molfet geddan l daraga t3assab w tastafezzak , bs bardo el shabab msh 3ate2 la el mo7aggaba wala elly bsha3raha , el shabab 7atta msh memayez ben el bnat w ashkalhom w anwa3hom , b2a solok by3mloh 3mmal 3la battal tol mahwa mashy , w ana r2ye en da nabe3 asasan mn el dma3′ el fadya , elly mafehash 7aga tfakkr feha ,m3zam el shabab msh kollohom dam3’hom tafha geddan , w fadya geddan geddan , lw a3dt ttklm m3ah 5 min. msh 7y2ol klmten mofedaten 3la b3d walla 7tta lw a7’dt r2yo fe ay mwdo3 7tla2eh tayeh , ma3andosh fekr wala r2y wala krar . nfsy a3rf dol 7yb2o abbahat el mosta2bal ezzay .

  16. كلامك صح جدا جدا يا بسمة …
    انتى جبتى اللى انا عايز اقولوا بس بسبب مختلف عن اسبابى … انا قلت ان ناس بتتاخد بذنب ناس تانية و دة بيحصل فعلا .. و زى ما دة بيحصل عشان الحسنة تخص و السيئة تعم . بيحصل من الجهلة الفاضيين اللى بقوا اكتر من الهم على القلب و سلوكهم عامل حالة من الارف فى الشوارع … سرقة و عنف و مخدرات و تحرش …. و ما خفى كان اعظم
    شكرا للتعليق ….


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬514 بنى آدم
  • أحسن مشاركات

  • التصنيفات