القاضي والفاضي والقاتله…

722

“محكمه…”

اعلنها الحاجب بصوته القوي لدي دخول القاضي الي القاعه , جلس القاضي في مكانه و دار بنظره في القاعه .

القاضي : يا فتاح يا عليم يا رزاق يا كريم  .. استعني علي الشقي بالله  .. فتحتوا الساعه كام النهارده ؟

الحاجب : 8:00 بالدقيقه يا فندم .. و مسحنا القاعه و حمينا المتهمين و طوقت القفص

القاضي : عال عال .. نادي علي القضيه الأولي

الحاجب : القضيه رقم واحد .. قتل ياريس

القاضي : قتل علي الصبح كده .. مش ألف مره قلتلك خلي القتل بعد الفطار ما علينا … المتهمه و الدفاع و الشهود موجوديين ولا في حد مجاش؟

الحاجب : كله تمام يا فندم

القاضي : المدعي العام يتفضل …

المدعي : سيدي القاضي … حضرات المستشاريين … ان القضيه اليوم خطيره جدا … خطيره للغايه … بل و اكثر من ذلك فهي خطيره كيك … فقضيتنا … هي قضية كل يوم و كل ساعه و كل دقيقه …

القاضي : انجز يا عم … دي لسه اول قضيه … و البلد مليانه بلاوي … مش هنخلص بطريقتك دي …

المدعي (و قد احرجته كلمات القاضي) : القصد يعني يا سيادة القاضي … البنت المتهمه دي قتلت الولد المجني عليه … قال ايه ؟ … عشان عاكسها … (ثم يصرخ و قد اشتاط غضبا ) … و هو يعني عاكس كاميرون دياز…

(يميل القاضي للحاجب و يهمس له )

القاضي : هي حلوه ؟

الحاجب : ما هي قدامك في القفص يا باشا

القاضي : لأ قصدي كاميرون دياز يا غبي

(يقاطعهم المدعي العام بصوته الذي ملأه الغضب )

المدعي : و لذلك سيدي القاضي … و لردع مثل هذه … و حتي لا ينتهج نهجها الشاذ هذا فتيات اخريات … اطلب بتوقيع اقصي العقوبه علي المزة الماثله امامكم بالأعدام شنقا اربع مرات علي ذمة القضيه … اصل لو كل واحد عاكس واحده  قتلتوا تبقي مصيبه … ولا انت مش خايف سعادتك … و شكرا

القاضي : (بصوت لا يكاد يسمعه أحد) لا طبعا مش خايف ده انا مرعوب

(ثم ينظر الي المتهمه و ينظر اليها في توجس )

هو انتي قتلتيه ليه ؟

المتهمه : انا كنت مضايقه جدا يا حضرةالقاضي … و انا لما بضايق بحب اقعد علي البحر …

نزلت اقعدت علي البحر … راح الأستاذ جه عاكسني … قمت قتلته

القاضي : يعني انتي قتلتيه عشان كنتي مضيقه ولا عشان كنتوا علي البحر

المتهمه : لأ عشان … هو لمجرد اني ماشيه علي البحر لوحدي … افترض اني بنت لامؤخذه و بدأ يعاكسني … و بكده سرق ابسط حقوقي … اني اتمشي لوحدي … فكان لازم اقتلوا … عشان ادافع عن حقي ده … و عشان هو و الناس يعرفوا اني مش بنت كده ولا كده … و انا مبسوطه كده عشان اي واحد دلوقتي هيفكر الف مره قبل مايعاكس اي واحده … و ده الحل الأمثل و الرادع للتحرش اللي بنتعرضلوا

القاضي : نعم يا اختي …(ثم يوجه كلامه للحاجب و هو يشير الي التابوت الموجود بوسط القاعه)

افتحلي البتاع ده و طلعلي القتيل

(يفتح الحاجب التابوت … و يخرج القتيل … فيسأله القاضي في حزم)

قولي عاكست الهانم الساعه كام و كانت لابسه ايه ؟

القتيل : كانت الساعه عدت 12:00 بليل يا باشا … مش هقدر اقول كانت لابسه ايه عشان انا ميت و مش ناقص ذنوب … انت متعرفش بيتعمل فيا ايه تحت

المتهمه : اللبس انا نازله بي قدام بابي و مفيهوش اي حاجه

القتيل : (و قد خرج عن شعوره )… طب احنا ذنبنا ايه ان ابوكي راجل …

المتهمه : انا بعترض علي اسلوبه … و ياريت الكلام ده يتشال من محضر الجلسه

القاضي : اعتراض مقبول و تحذف كلمة قرني من مضبطة الجلسه

القتيل : بس انا مقلتش قرني…

القاضي : مش مهم كده كده حيحذفوها … المهم انت عاكستها قلتلها ايه جرح شرفها ؟

القتيل : و الله يا باشا ما جيت جنب شرفها … ده انا لسه بدلعها و بقولها حرام الجمال ده يمشي علي الأرض المفروض يمشي علي الحيطه … لقيتها قتلتني … و بعدين يا سيادة القاضي احنا رجاله زي بعض و اكيد انت حاسس بيا انا طول النهار شايف المحزق و الملزق … افتح التليفزيون الأقي اللي بتبوس الواوا و اللي بتحط النقط علي الحروف …وأنا قاعد فاضي لاشغله ولا مشغله بس باقول يا واد خليك راجل …امسك نفسك بكره تتجوز و تلاقي اللي تريحك بس بكره في البلد دي خاصمنا و مبقاش يجي… بس بردو كنت ساكت كنت بعشم نفسي بالحلال عشان يصبرني علي الحرام اللي بقي محاوطني … بصبر نفسي بالغالي … و اللحم حواليا رخيص و في كل حته … اقول يا واد عيب و حرام لا تبص ولا تدقق … بس لقيتهم علي يميني و شمالي و ورايا و قدامي حرموني اني حتي امشي و اتلفت حواليا … مستحملين كل ده … و هما زعلنين من كلمتين بنداري بيهم النار اللي جوانا و م

فيهاش حاجه معاكسه بأدب لاتوجعها ولا تجرحها و تفوك عننا … ولا نلبس طرح و نقعد في البيت يا حضرة القاضي…

(انهي القتيل كلماته … و كان قد فجر دموع كل رجال القاعه … فعلي البكاء و العويل علي حالهم … حتي القاضي … الا المتهمه فوجدت نفسها محل لعناتهم فقررت الدفاع عن نفسها … و لأنها أمرأه فسبقتها دموعها )

المتهمه : انا كمان تعبت … و اتحملت كتير اوي … انتو من حقكوا كل حاجه و انا مش من حقي ولا حاجه … متعمليش عشان انتي بنت … متنزليش عشان انتي بنت … كله لأ و عيب و غلط … حتي المشي في الشارع … بدل سيادته ما يمسك نفسه و يجاهد شيطانه … يقعدني انا في البيت … عشان هو ضعيف و مش قادر … رغم ان بضعفه ده مش هيفرق معاه انا لابسه ايه و حتي لو كل اللي انا بعمله غلط … مين عينك قاض في الشارع تحاكم اللي انت شايفوا غلط …

(يسكت القاضي الجميع … وينظر اليهم في حيره )

القاضي : كل مجتمع يحكمه واحد او اكثر من ثلاثه … اما دين و قد غاب لهروبنا منه و كأنه قيد او تم تغييبه بفعل فاعل لغرضا ما …

و ثانيهم قانون ضاعت هيبته و صار قانون الضعفاء … اما القوي فيتخطاه و يفعل ما يشاء … و الثالث العادات و التقاليد التي جعلتم منها مرادفا للتخلف و نقيضا للحريه … و بذلك لم يعد هناك ما يحكم الشارع … فأختلت الموازين و وضع كل انسان قوانينه الخاصه …و عليه فأن نجاتكم في العوده الي دينكم لو تعقلون … او تطبيق القانون ليشرع حياتكم … او التمسك بعادتكم و تقاليدكم و تعودوا الي هويتكم … و كم اتمني ان اري ثلاثتهم لعلكم تفلحون … و ان لم تفعلوا فلا تلوموا الا انفسكم و ليحكمكم قانون الشارع و ليرحمكم الله … اما عن المتهمه و قتيلنا فالحكم بعد المداوله …

(و عاد القتيل الي تابوته و وقف الجميع لدي مغادرة القاضي للقاعه و صرخ الحاجب)

“محكمه…”

Advertisements

18 تعليق

  1. خير الكلام ما قل ودل. قصة رائعة موجزة الكلام جزيلة المعانْ وفقك الله وفي انتظار المزيد

    • شكرا على مرورك
      وياريت المرة الجاية نعرف اسمك
      واهلا بيك صديق لسلمنا المتواضع

  2. معنى كلامك دة يا استاذ ابو صلاح … ان احنا منتظرين ثورة … يا من البنات … يا من الولاد ..
    بجد ….
    يبشرك بالخير يا صديقى .

    • والله يامافى الضغط يولد الانفجار
      وربنا يستر….واحنا مابنشوفش الخطر الا لما يدق على دماغنا

  3. عبقري يا بو صلاح القصة جميلة جدا و معبرة و كمان أصابت كبد الحقيقة و شرّحت الموضوع من البداية للنهاية ، بس الحل صعب و شامل كتير لأن دا حل للمجتمع يعني مش حل شخصي و إنت سيد العارفينى إن المجتمع فيه أشكال و ألوان …أنا بشوف إن الحل سيكون فرديا تجريبيا..لكن قبل أن نبدأ به أريد تجيبوني بصراحة ………إنتوا بتعاكسوا و لا لا ………الصراحة ياشباب….
    شكلك يا بو صلاح أديب متخبيورا السلم اتمنى تتحفنا بأعمال ثانية ، و احنا بنستنا ……..
    رايي/ الجزائر

  4. والله يا رايي انا مش متخيل السلم من غير تشجيعك
    بجد شكرا ليكى لكل ارائك على السلمنا…ومعلش على تأخر مواضيعنا
    بس يومين امتحانات وان شاء الله هيبقى فى موضيع اكتر قدام

    وبالنسبة للحل…فالحل فى كلام القاضى…لوكل واحد التزم بيه
    او بجزء منه…اكيد انه هيبقى احسن بكتير
    بس احنا كل كلام القاضى بالنسبة لنا قيود
    واحنا حاسين..اننا مخنوقين كفاية

  5. msh 3rfa 2a2olak eh ya ahmed bas fe kela el 7altin el tarafin daye3 7a2ohom , el welad msh 3rfa tegawez we 7ata b3d ma beyetgawezo momken ye5ono, te2dar te2oli kam ragel fe masr we fel 3alam bey5on merato , el moshkela msh moshkelet gawaz el moshkela en el welad ba2et shabah el 7yawanat betfakar be 3`rizetha bas , we fe nafs el wa2t bardo el banat msh 3at2a fe lebsaha , el moshkela kebira awi we 7alaha msh fe eid ay tarafwala el banat 7at3`yar lebsaha 3shan ma7alat el hedom betefred 3aliha no3 mo3ayan mn el hedoum we el welad msh 7atbatal tebos aw tet7arash , rabena yostor fe3lan

  6. allah yenawar 🙂 !

  7. بس ماقلتليش يا يابو صلاح و بصراحة من فيكم بيعاكس؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ جاوبوني و بلاش تهرب من الموضوع………
    رايي/الجزائر

  8. مش بتهرب ولا حاجة يارايي
    بس كان ممكن تكتشفى الموضوع ده من المواضيع اللى فاتت من غير ماتزنقينى
    بس ياستى و بمنتهى الصراحة
    ايكو وانا شخصيات قريبة اوى
    بس هو ملتزم اكتر منى شوية…ولينا مبادئ من اللى بيتقال عليها تخلف اليومين دول
    بس احنا متمسكين بيها للاخر

    مافى اكتر الناس على السلم تحرر
    بس مش التحرر بتاع اليومين دول بردو
    وهو قالك قبل كده للصبر حدود

    اما ابو عمر بقى…فهو بيحب الجمال
    ومبيقدرش ساعات يسكت قدام بنت جميلة
    بس حتى اللى على سلمنا بيعاكس
    ففى مبدأ وهو ان المعاكسة تكون بمنتهى الادب من غير تتطاول
    ومحدش مننا سيدنا يوسف

    اظن انك كده محتاجة تدعيلى عشان شباب السلم هيقتلونى

  9. ليلتك سودا يا ابو صلاح ….
    خلص الامتحان و كلمنى … عشان اجى اقتلك

    • ايه الظلم ده هو انا كل حاجة اعملها تقتلنى 😦

      • و يا ريتك بتموت … كان زمانى ارتحت من زمان 🙂

  10. a7yeek ya abo sla7 3la el post el hayel da , bgd fekra 7lwa geddan w mo3abbera geddan geddan .
    fekretak de fakkretny b masal sha3by by2ol ( edrab el marbot ye7’af el sayeb ) da 3’er el ganeb el comedy elly 3gbny awe . bs ana shayfa en kol mn el gany w el magny 3leh lehom 72 .el 3’lat mn el bdaya fe el tarbeya mn el s3’ar .e7na matrbbnash 3la el den w mbad2o w asaseyato ,w 3shan kda lmma kbrna mb2nash 2adren nmshy wara el den fe el tarek el sa7 . w kazalek b el nesba lel 3adat w el takaled , el bet ma7attesh fena el 3adat w el takaled w el osol elly el mafrod nttb3ha , e7na ektsabnaha kda bel fetra w lel asaf ektsabnaha mt7rrfa la heya m7ssala wala mwssala , w aked bardo dlw2ty lmma yettalab mnna en e7na nattb3 el 3adat w el takaled bta3et el mogtm3 el sharky 7yb2a s3b 3lena awe .enta 3ndk 72 fe el 3 7agat elly e7na moftkedenhom w elly el mafrod ntmassek behom fe nafs el w2t . bs men yenaffez.heya mashya b el baraka w rbna yostor 3la el agyal elly geya , elly 7yb2a mnhom ebny w ebnak .
    congratulations for this excellent post

  11. شكرا يابسمة على رأيك وعلى ردك
    هو فعلا الموضوع بقى صعب
    بس مينفعش نقول ربنا يستر ونسكت على كده
    على الاقل نبدأ بنفسنا ونسمع كلام القاضى وده اضعف الايمان
    ياكده ياهيبقى الحل بتاع المتهمة….او ممكن نمشيها زى ما القتيل عايزها
    والبنات تقبل الكلام وتستحمل 😀

  12. ماحدش يقرب على أبو صلاح هو في جواري …..أنا طبعا كنت متأكدة من أنكم ناس راقيين لأن شباب اليومين دول مش حيجتمعوا عشان بلوغ نقدي و كلاموا راقي و مبدع للدرجة دي …..و أنا سعيدة جدا لأنوا لسه فيه شباب مثقف على المستوى ده …انشاء الله تدوم صحبتكم و تتجتمعوا ديما و تسعدونا في البلوغ ده..
    رايي/الجزائر

    • شكرا جدا يا راييى على الكلاك الجميل دة … دى بس من زوقك .. و الناس دة موجودة كتير … و لو نورتى النور على السلم هتلاقى ناس كتير قوى قاعدة … و عشان كدة انا فعلا بتمنى انى اشوف كل الناس اللى على السلم …

  13. loooooooool….gamda fa7t yabu sala7….wel ragel el moda3a el 3am da mazago 3aaaaly molla 😀

    ana ra2yi ytala3 el bet bara2a w yo7kom 3la abooha bel e3dam


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬514 بنى آدم
  • أحسن مشاركات

  • التصنيفات