رئيس ( البط )

1242819115-image

يا فتاح يا عليم يا رزاق يا كريم………..لسه مخلصين امتحانات وطالعين من اسبوعين مقرفين ومتعبين وملهومش اي لازمه ………..قلت خلااااااااص بقا اخيرا خلصت وحعرف ارتاح  وانام  واصحي  انزل علي الفراعنه بقا اشرب الزرده بتاعي  و اشيش بمزاج  ومن غير استعجال علشان نلحق نجري علي البيت نحفظلنا كام  قانون و نبرشم الباقي يمكن ربنا يرزق بواحد في الامتحان تاخدلك من وراه درجتين 3 يا دوب يدخلوك علي الرفع وربك يكرم في الباقي بقا ………المهم يا دوب خلصت وروحت علشان انام بقا وارتاح لقيت عم الحاج ( ابو صلاح ) بيتصل بيا ويقولي وكله انبساط وسعاده احنا حنكتب الاسبوع ده في السياسه………طبعا انا اخدت الكلمه في وشي كده مره واحده مش حضحك عليكم اول انطباع جه في دماغي اننا حنكتب عن الحكومات العربيه او قضيه فلسطين بقا وتداعياتها وحواراتها والكلام الحمصي ده ……….قلت في عقل بالي هي العيال دي اتجننت ولا الامتحنات هطلتهم هي ناقصه تفاهه يا عم ( ابو صلاح ) محنا كده كده عارفين اخرتها…………رد عليا بكلمه ويا ريته مرد عليا بيها وقالي يا حماااااااار حنكتب عن امريكا من منطور سياسي يتمثل في رئيسها عمك (اوباما)……… طبعا انا اتنرفزت واتعصبت جدا ووشي جاب مليون لون مش علشان كلمه حمار مده بقا العادي بتاعنا دلوقتي ده احنا لما بنبعد عن الفول يومين بنقطع جسمنا من الهرش وكانه بقا هيروين بالنسبالنا ………..بس الصراحه اول مسمعت كلمه منظور سياسي دي حسيت ان قفايا وجعني اوي وده اللي نرفزني ……بس لما قعدت مع نفسي قلت العمر واحد والرب واحد والارزاق علي الله.

في البدايه كده وقبل اي حاجه احب اقر واعترف قدامكم وقدام عم الحاج والمعلم الكبير( اوباما ) اني بشهدله بالزكاء الشديد وقدرته الكبيره جدا علي غزو عقل اي انسان قدامه لدرجه انه بيحسسه انه حيعيشه فوق سابع سما وهو كده كده حيخليه عايش علي نفس الارض في الاخر وبنفس الاوضاع وبنفس الفكر المتخلف يعني لا حيساعده ولا نيله ده يمكن يقلبه في اللي يحتكم عليه اساسا بس الاختلاف الكبير اللي بينه وبين اللي قبله هو لسانه الحلو وانه بيديك بريستيجك شويه.

الغريبه ان كلنا ايام مسمعنا عن واحد اسمه ( باراك حسين اوباما ) قلنا بس هو ده اللي حيخلصنا من زمن العبوديه اللي احنا عايشينه وهو ده اللي حيحسن شكلنا بره وهو ده اللي حيفتح باب الهجره الجماعيه للعرب والمسلمين علي امريكا وهو ده اللي حيرجعلنا حقنا من الجزم اللي جنبنا ويرجعلنا فلسطين بقا  وهو…….وهو……….يااااااااااااااااه علي كميه الاحلام اللي حلمناها ايامها لمجرد اننا سمعنا كلمه حسين في اسمه وعرفنا انه كان ليه اصول مسلمه في العيله عنده…………. بس المشكله اللي مفكرناش فيها وتقريبا ماخدناش بالنا منها انه في الاول وفي الاخر امريكي كل اللي عاوزه هي مصلحه بلده وكده كده هو مستعد يحط ايده في ايد ابليس لو مصلحه بلده معاه………… يعني مش فارقه برده . ( علي رأي اللي قال ما اسخم من ستي الا سيدي )

بس الصراحه يوم ما اوباما جه مصر وقالوا انه حيقول خطابه للوطن العربي والاسلامي من مصر احترمت اختياراته اوي لانه اختار تاني اقوي بلد في المنطقه العربيه دبلوماسيا حاليا واكبر بلد تاريخيا وكمان ايه ده اختار انه يقول خطابه في قاعه مؤتمرات جامعه القاهره اقدم جامعه في الشرق الاوسط تقريبا وانه حيزور جامع السلطان حسن اقدم جوامع مصر المحروسه ويعتبر من اقدم الاثار الاسلاميه  ( الصراحه راجل فنااااااان ) …………… بيقولنا قبل ميتكلم اساسا  ( انا اهو جايلكم لغايه عندكم في منطقتكم مخصوص وجاي ازور اثاركم الاسلاميه واثاركم الفرعونيه كمان………يعني من الاخر اياكم تقولوا عليا اني ضد الاسلام ولا كلام من ده ). مش بقولكم معلم

انا سمعت الكلام ده بقا قلت بس انا لازم احضر الخطاب ده واسمع الراجل ده بيقول ايه ده شكله حيجي يرسم علينا احلي رسم…………. ورغم ان كان عندي امتحان تاني يوم في ماده ولا اعرف عنها اي حاجه الا اني اصريت اني اسمع خطابه ( وربنا يرزق بقا في اللجنه تاني يوم )…………وفتحت التليفزيون واتفرجت علي المعلم وهو نازل من الطياره في ارض المطار نازل عادي جدا ولا كأنه رئيس اكبر دوله في العالم والغريبه ان الريس مكنش بيستقبله في المطار الصراحه الحوار ده استغربته اوي بس قلت يمكن اوباما طلع بالطياره ونسي يبعتله مسج بمعاد الوصول ولا حاجه ما علينا…………لقيت الراجل ما شاء الله طلع من المطار بسرعه لا اتفتش ولا اتشاف جوازه ولا عدا علي المكنه العجيبه اللي بتصفر علي الفاضي والمليان وبتحسسك انك ارهابي وانتا مش واخد بالك وعربيته دخلت من غير لا جمارك ولا اي حاجه ( معلم والمصحف ) ………..طلع الباشا علي جامع السلطان حسن ومن ذكائه الشديد انه معملش زي ناس كتير قبله ودخل بالجزمه وبتاع……….لا مزاكر كويس ده حتي مرضاش يلبس الكيس علي الجزمه قلعها خالص وكمان خلي ( الوزه ) هيلاري كلينتون تقلع جزمتها ومشيوا حافيين جوا الجامع………الصراحه احترمته جدا بعد حركه الجنتله الكبيره دي لان محدش كان حيلومه لو كان لبس الكيس بس علي الجزمه انما طلع راجل محترم وجنتل الصراحه.

وصل المعلم الكبير للجامعه وكان خلاص محضر الرأي العام العربي والاسلامي لمصلحته تماما بانه جالهم لغايه عندهم وزار واحد من اقدم المساجد عندهم وقلع الجزمه احتراما لمقدساتهم ( الصراحه عمل احلي واجب ) ……….فاضل بقا السستمه ( يعني البرمجه ) انه يبرمج عقول الشعوب اللي بتتفرج عليه دلوقتي علشان يخليهم يصدقوه ويبقوا معاه ويقدر يكسبهم في صفه ………. وطبعا مش غريبه علي ذكائه انه يبدأ كلامه بكلمه ( السلام عليكم ) ورغم انه في رؤوساء قبله قالوها برده بس الصراحه هو قالها باسلوب احلي بكتير لدرجه ان القاعه كلها قدامه اديهم وجعتهم من كتر التصفيق………..بدأ يتكلم انه راجل عارف الاسلام كويس وعارف انه مش دين ارهاب وانه دين سماحه وان العرب والمسلمين زمان هما اللي طوروا العلم وهما اللي ساعدوا اوروبا في بدايه ثورتهم الصناعيه وان اول بلد اعترفت بامريكا اساسا كانت المغرب في سنه 1796 ودي كانت مقدمته علشان تفهم انه جاي معاك مش ضدك.

*بدأ بقا الباشا الكلام الجد وقالك انا اه مش ضد الاسلام ( بط ) انا ضد التشدد في الاسلام واستغلاله بطريقه خاطئه من قبل فئه قليله لتنفيزالعمليات الارهابيه وترويع المدنيين ( طيب جاب ايه جديد عن اللي قبله مش عارفين كل الجديد انه بس صاغ كلامه بطريقه جميله مش زي بوش اللي كان بيعمم كلامه عن الاسلام كله بشكل عام هو خصص كلامه عن التشدد بس معرفناش التشدد اللي هو حيتعامل معاه وقصده عليه ده حيبقا التشدد اللي هو شايفه من وجهه نظره ولا اللي من وجهه نظرنا احنا ؟ ربك عالم بالنيات بقا ).

*بعد كده دخل في قضيه جديده وقالك لن اسمح بظهور اسلحه نوويه في ايران ( بط ) حفتح طاوله الحوار معاهم لايجاد حلول ترضي جميع الاطراف…………( برده جاب ايه جديد مفيش غير انه قالك افتح طاوله الحوار انما ان ايران تمتلك سلاح نووي ده مستحيل زي اللي قبله مقال او انه يتكلم عن السلاح النووي الاسرائيلي ده مستحيل برده زي كل الرؤوساء اللي قبله اللي معلقوش ولو تعليق صغير علي السلاح النووي الاسرائيلي يعني الراجل لغايه دلوقتي معملش اي حاجه جديده اهو ) .

*بعد كده دخلك علي القضيه الفلسطينيه وقالك انا عارف ان الفلسطينين يا حرام عايشين عيشه مهينه وتقريبا كل يوم بيتعرضوا لمواقف تهين كرامتهم من السلطات الاسرائيليه ( بط ) لو عاوزين يعيشوا عيشه حلوه والقشيه تبقا معدن معاهم يبطلوا  اعمال العنف اللي بتعملها حركات العنف في فلسطين وقالك عن حماس انا عارف ان في ناس بتأيدها بس لازم يبطلوا العنف ده ويعترفوا بدوله اسرائيل يعني من الاخر يبطلوا مقاومه واضاف بكل قوه ان علاقه امريكا باسرائيل غير قابله للكسر ( فاهمين يا اصحابي يعني متحلموش واحب اقدم اهداء لحبيبتي اسرائيل واقولها متخفيش انا مش ناسيكي طبعا في عقل باله الكلام ده)…………بس الشهاده لله اول مره يقول حاجه جديده شويه هنا لما علق علي المستوطنات الاسرائيليه وقالك انها لازم تقف علشان عمليه السلام تكمل في مسارها السليم اللي قابله مكنوش بيقلوها ولو كانوا بيقلوها بتبقا من تحت لتحت.

*بعد كده اتكلم عن الديمقراطيه في العالم وانه حيقف دايما مع الشعوب المقهوره ودايما حيبقا ضد الحكومات القمعيه (يعني اي حد حيفكر يلعب معايا حيبقا حكومه قمعيه وشعبه مقهور وحياخد علي راس اهله لغايه ميبانله صاحب).

*بعد كده اتكلم عن العراق ومش عارف ليه حسيت مجرد احساس من كلامه كده انه زي ميكون بيعتذر عن غباء الرئيس اللي قبله اللي هو بوش اللي دخل في حوار وحرب ولا ليها لازمه وقال ان اخر عسكري امريكي حيخرج من العراق علي 2012 ان شاء الله …………. نسي يقول زي المفتش كرمبو في اخر الحلقه بتاعته ( وابقوا قابلوني في 2012 ان شاء الله ) .

*وبعد كده دخل في قضيه المرأه وانها لازم تتعلم ولازم توصل لاعلي القيادات ولو حتي الرئاسه ولازم ندعمها وهكذا.

وهنا انتهي خطابه ……..وناقش عده مواضيع مهمه لينا وليه ……….بس محستش الصراحه في كلامه ان في تغير في اي سياسه من سياسات امريكا عن الرئيس اللي قبله ……….هو هو نفس الكلام اللي كان بيتنفز قبل كده حيتنفز تاني……… بس الصراحه الاختلاف الوحيد في شكل الكلام الخارجي……….. مزوقه حلو وعطيهولك في علبه شيك وبيقولك اتفضل بالف هنا وشفا تفتح تلاقي العلبه مليانه فول تفهم من الهديه انك حمار ……….. انما بوش بيه كان بيقولك انتا حمار في وشك فكنا بنضايق منه ( البرستيج مهم )…………..يعني من الاخر انا شايف ان اوباما لبسنا الطراطير فوق روسنا وحطنا في جيبه واحنا فرحانين ومبسوطين ولله معلم كبييييييييييير واستاز ورئيس قسم وربنا يسترها علينا من كلمه ( بط ) دي لاني بجد بخاف جدا من الناس الاذكيه دول .

( ويجعله عامر ان شاء الله )

اسمحولي اقدملكم شويه معلومات خفيفه كده عن حاجات حصلت في الخطاب حتعرفكم قد ايه الراجل ده ذكي :

  • صفق الحاضرون لأوباما منذ وصوله وحتى نهاية خطابه 25 مرة.( ربنا يزيد ويبارك )
  • استخدم اوباما كلمتين بالعربية: شكرا ، السلام عليكم .( حلو اوي كده بوسوا اديكوا وش وضهر )
  • استشهد أوباما بثلاث آيات من القرآن الكريم على الأقل، منها “(اتقُوا اللهَ وَقُولُوا قَوْلا سَدِيداً)”  واستشهد بآية قرآنية أخرى( “مَن قَتَلَ نَفْساً بِغَيْرِ نَفْسٍ أَوْ فَسَادٍ فِي الأَرْضِ فَكَأَنمَا قَتَلَ الناسَ جَمِيعاًومَنْ أَحْيَاهَا فَكَأَنمَا أَحْيَا الناسَ جَمِيعاً” )……….وايضا اضاف آيه قرأنيه اخري وهي ( ” يَا أَيهَا الناسُ إِنا خَلَقْنَاكُم من ذَكرٍ وَأُنثَى وَجَعَلْنَاكُمْ شُعُوباً وَقَبَائِلَ لِتَعَارَفُوا. “)
  • وصل إلى مطار القاهرة في تمام التاسعة، وعقب نزوله من طائرته الخاصة استقل سيارة خاصة تابعة للسفارة الأمريكية لقصر القبة لمقابلة مبارك.( فرافيرو انا جاااااااااااااااااااااااااي )
  • لم يخضع اوباما أو الوفد المرافق له لإجراءات الكشف عن ارتفاع  درجة الحرارة وعلامات أنفلونزا الخنازير،رغم أن الولايات المتحدة من الدول الموبوءة بالفيروس بحسب منظمة الصحة العالمية (وانا اقول ال13 حاله دول جات منين ادينا عرفنا اهو )
  • ثلاثة آلاف جندي امريكي تولوا حراسة اوباما بالقاهرة  ( وحياتكوا عندي 20 صعيدي حلوين كده من الصعيد الجواني عندنا لو حبوا يقوموا بيهم ولا كانوا خدوا في اديهم غلوه )
  • من 100 على 500 مليون  جنيه مصري تكلفة ترتيبات الزيارة بحسب مصادر مصرية ( طبعا في منهم سبوبه حلوه طالعه علي سويسرا متخفوش بيحوشولنا هناك )
  • يغادر أوباما إلى درسدن بألمانيا في السادسة مساء لزياره الهولوكوست او المحرقه اليهوديه اللي حصلت ايام الحرب العالميه التانيه واللي عملها كان هتلر بيه ( متخفيش انا مش ناسيكي)  طبعا لازم يقدم فروض الطاعه لحبيبته علشان متقولش عليه انه حيطلع من تحت جناحها ولا حاجه
Advertisements

26 تعليق

  1. عمر بجد حبيت اكون اول حد يهنيك على الموضوع ده بجد موضوع جميل وانت كده بتفتح عيون حد كان ممكن يتخدع فى الكلام النتذزق بيتاعه بس انت شكلك كده مبتحرمش اهنيك على شجاعتكو

  2. ههههههههههههههههههههههه ربك بيقف مع الغلابه يا سمسه واحنا غلابه………………وبجد متشكرين جدا علي دخولك وعلي الكومنت بتاعك ……………. ويا رب تفضلي منورانا كده دايما ……………..وصدقيني كده كده علي الكلام الجميل اللي هو قالوا ده ومهما قلنا انه كلام متزوق وخلاص الناس برده حتفتضل تسمعله لانهم غلابه ومحتاجين اي قشه يتعلقوا بيها حتي لو كانت مجرد سراب……………. بجد ربنا يسترها علينا منه

  3. براااااااااااااااااااااااااااااااااااااافو يا بو عمر دا نت سياسي و لا السياسيين و محلل و لا المحللين ليكم وحشة و الله …طبعا في الأول أتمنالكم نجاح باهر في الإمتحانات ده لو ماتصدرتش أوراقكم بعد المقال السياسي ده ..بس المهم إنك كشفت اللثام عن الحقيقة كاملة ..أصل العرب دايما ينضحك عليهم بالمظاهر و لأنهم طيبيين كثير أو أغبياء أكثر بيصدقوا بسرعة و كأنهم مش عارفين إنو سياسات أمريكا مابتتغيرش بتغير الحكام لأنوا أمريكا دولة مؤسسات لها سياسة خارجية براغماتية ثابتة مش زيينا دول أفراد بتتسير حسب مزاج و هوى صاحب الجلالة و الفخامة و القداسة …لا خطة و لا اتجاه ثابت و مصلحة الآخرين قبل مصالحنا …الله يعوض علينا …….
    سلااااااااااام و كل التحية لكل ناس السلم ………………………………….
    رايي/الجزائر

    • ولله انتي اللي واحشتينا يا رايي ………..ووحشتنا كومنتاتك وردودك الجميله علي مواضيعنا…………واحمد ربنا ان موضوعي عجبك ونال استحسانك…………..وبالفعل انتي معاكي حق لان للاسف بعد مخلص الرئيس اوباما خطابه اكتشفت ان في ناس كتييييييييييير جدا اعجبت بيه جدا وبسياسته الجديده اللي حيطبقها وبعدالته اللي حيطبقها علي شعوب المنطقه…………..في الاول مستغربتش لما لقيت الكلام ده طالع من لسان راجل الشارع العادي لانه ممكن يكون مخدوع بالكلام الجميل اللي اتقال ماخدش باله من اللي ورا السطور………….. بس استغرابي زااااااااااد جدا لما سمعت الكلام ده من ناس سياسيين قدام ومحللين ليهم تقلهم في مجال الاعلام …………الصراحه حسيت اننا فعلا لبسنا الطراطير خلاص وانضحك علينا خلاص ………….بس فعلا اقسملك اني خايف جدا من اوباما ويمكن خايف منه اكتر مما كنت خايف من بوش لان اوباما ذكي جدا ويقدر يتحكم في الامور كويس ويقدر يطوع الظروف لتنفيز طلباته هو ربنا يسترها علينا بجد………..وفي الاخر بجد اشكرك علي زيارتك المستمره للبلوج بتاعنا …………… واتمني تفضلي منورانا كده دايما وميحرمناش من كلامك ابدا…………….وفي الاخر الف مليون مبروك للجزائر فوزها الكبير علي منتخب الفراعنه اللي مش رجاله وعقبال متشرفونا في كاس العالم ان شاء الله

  4. ya abo 3mr ya gamed 😀
    kalamak 7ilw awy ya basha wallahy teslm 2idak
    bas ya basha bardo howa mayhmnash fe 7aga el mohm a7na han3mil a linfsna el mafrod manstnash 7aaga min 7ad wala nitry2 3ala kalmo manta 2oltaha howa amriky w elmohm 3ndo baldo
    sibak anta khlina fe mowdo3 el 2nflwnza dah lazim ni3mil ta72i2:D

    • واحشني ولله يا معلمي……………هو اينعم امريكي وبيدور علي مصلحه بلده بس في نفس الوقت يهمنا كلامه…………..لان مفيش سلام حيحصل من غيره في المنطقه …………..وممكن اوي يولعلك المنطقه بكره لو فكر انه يعلن حرب علي ايران…………وممكن اوي يدمرلك صوره الاسلام في العالم اكتر واكتر ويخليك تعيش لواحدك والناس كلها تخاف تقرب منك…………….ده غير انه في ايده معظم الخيوط الاقتصاديه والسياسيه والدبلوماسيه وكل حاجه في ايده هو وهو المتحكم فيها…………..يعني مينفعش نقول ملناش دعوه بيه خالص ………….لو كان رئيس جزر الهاواي كنا قلنا يتحرق بجاز واحنا مالنا……………انما مع الشخصيه دي خصوصا لازم يبقا مالنا ومالنا ومالنا ……………ولازم نحاول نخليه جمبنا وفي صفنا بالتصرفات مش بالكلام وبس…………….وبجد منور البلوج بتاعنا يا بسوم وربنا يخليكي ليا وتسال عليا دايما كده……………. وبالنسبه للخنازير اللي عماله تعطس في وشنا اكيد الدور جاي عليها متقلقش

  5. MY CONGRATULATIONS L EL MAWDO3 EL GAMED DA YA 3MR .BGD ENTA 7ALLELT EL 7’TAB KOLLO KOIS AWE W 3RFT T2RA EL SHA7’SEYA DE KOIS AWE AWE .3GBNY EL NO2AT ELLY ENTA KTBTHA FE EL A7’R DE ,T7ES ENNHA EL 7AGAT EL MST7’BBYA WARA2 L SETOR .
    W LW 3LA EL SASTAMA , KOLLO DLW2TY B2A MASHY B EL SASTAMA W EL KOL BY7AWEL YTTB3 NZAM EL SASTAMA 3SHAN YWSAL L ELLY HWA 3WZO , MA BALAK B2A DA RA2ES AMERICA ,DOCTOR W RA2ES KESM EL SASTAMA , YA RET NB2A NOSSO FE EL SASTAMA .3AMATAN EL NAS MMKN TKON SDD2T KLAMO 3SHAN HEYA 3LA R2YAK 3’LABA W 3’R2ANEN W MSTANNYEN 2SHAYA YT3LL2O FEHA .
    BS FE EL AWL W EL A7’ER HEYA SYASA W AKED HWA 7YTB3HA W YKMML MASERET ELLY 2BLO . AKED MSH 7Y7’ROG 3N EL 7’AT EL MARSOM LO YMSHY 3LEH .BS M3 E7’TLAF EL OSLOB

    • ازيك يا بسبوستي…………….واحشاني ولله موووووووووت……………الحمد لله طبعا ان الموضوع عجبك وده رف كبير ليا انك تقريه بنفسك ويعجبك كمان( ده كتير اوي ولله )…………………ههههههههههههههه وطبعا عيب عليكي انك تقولي يا ريت نبقا نصه في السستمه……………….يا بنتي احنا مصريين احفاد الفراعنه احسن ناس بتسستم وبتحور وبتجيب من الاخر…………….انتي بس اللي لسه متعودتيش …………..متخفيش حديكي كورسات……………..وبجد الف شكر ليكي علي الكومنت الجميل ده واتمني تفضلي منوراني كده علطول

  6. Honestly Great ….i think you’re smarter than all of them ,So you should be the president of Egypt…i liked the way how you look at the people.. looks awesome keep going much luck much happiness
    M. ABU ALSOUD 

  7. تشكر يا صاحبي علي الكلام الجامد ده …………….بس ونبي بلاش حكايه الرئيس دي ……………..انتا مستغني عني ولا ايه يا عم……………..انا نفسي ابقا رئيس سكك حديد مصر حلو اوي كده لو يرضوا يعني…………….وبجد الف شكر علي دخولك وعلي انك نورتلنا السلم بتاعنا …………….واتمني اشوفك علطول كده وتنورنا كده دايما يا معلمي

  8. عودتي الليلة لبيست للتعليق و لكنها للتبريك فمبروك على الفراعنة الأداء البطولي و الرجالي أمام السمبا و الله استمتعنا و بان الظلم اللي وقع على المعلم شحاتة من الصحافة المصرية المتحاملة عليه ……….ألف مبروك ….و اعذروني لأن كلامي مش متعلق بالموضوع …………………………..
    رايي/ الجزائر

    • الله يبارك فيكي يا رايي….و معلش اعذرينا….ما هما كمان بينقوا الماتشات اللي مالهاش لازمة و يتألقوا فيها….
      بش كويس انهم شرفونا انهارده….فضيحة الجزاير كانت بينا و بين بعض….انما لو كان حصل حاجة انهاردة الفضيحة كانت حتبقى عالمية

      • ولله احنا مبروك علينا التألق في كاس القارات………….زوانتوا مبروك عليكم وصولكوا لكاس العالم……………..واتمني بجد انكوا تشرفونا في جنوب افريقيا

  9. الله يبارك فيكى يارايي
    والحمدلله رجالتنا متعونا…بس بالنسبة للمعلم حسن شحاته
    هو اول واحد عارف….انه حتى بعد اللى عملوا من بطولة افريقيا مرتين
    والاداء اللى عملوه امبارح….مع ذلك عند اول هزيمة
    هيتشتم والدنيا تتقلب عليه
    ويتنسالوا كل ده…..هى بلدنا كده 😀

  10. يا جمااااااااااااااااعة ليه إنتوا متشائمين كده ، المتأهل لكاس العالم لسه مش معروف و باقينا أربع مباريات …المهم في الأخير يتأهل بلد عربي الجزائر أو مصر و ماننساش طبعا التوانسة و المغاربة و السعوديين أو البحرينيين ….
    و ان شاء الله راح تتحفونا ساعتها بمقالات رياضية رائعة كالعادة ……….
    دمتم سالمين حول السلم
    رايي/الجزائر

    • ههههههههههههههههههههههههه ……………… انتي لسه عايشه في احلام القوميه العربيه دي يا رايي…………..علي العموم بجد انا اتمني ان الاقوي ما بينا هو اللي يوصل علشان يششرف الكوره الافريقيه وكمان يسمع العالم ان في عرب عايشين هنا بيعرفوا يلعبوا كروه ………………وبجد انتي منورانا ومشرفانا ويا رب تفضلي منوره البلوج عندنا كده دايما

  11. عايشة و حعيش في الأحلام دي الوقت صفر الحكم نهاية مباراة مصر /إيطاليا …..مبروووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووك مصر 0/1 مبروووووووووووووووووووووووووووووووووووووووووووووووووووووووووووووووووووووك كده اللعب و لا بلاش ….كسرنا أنف إيطاليا…………….براااااااااااااااااااااااااااااااافوووووووووووووووووووووو

    رايي/الجزائر

  12. شكرا رايي
    والله يبارك فيكى….الرجالة فرحونا وشرفوا مصر والعرب وافريقيا
    واحلى حاجة فيهم ان عمر الفرحة مانستهم السجدة اللى بعد كل انتصار

    • اه…..شكلهم نسيوا يتوضوا قبل ماتش أمريكا
      😀

  13. بلاش تريقة يا Echo Of Silence الولاد عملو اللي عليهم بس التعب نال منهم …المهم أنهم حققوا شيئ سيتذكره العالم ..و احنا أول الواقفين مع المنتخب المصري في مواجهة أي تلللللللللللللللللللللللللللللميحات من إيااااااااااااااهم و انت عارف…؟؟؟

    الظاهر إن بقية أهل السلم باستثناء ” أبو عمر ” خايفين يدخلوا غمار السياسة لذلك تأخرت مقالاتهم لحد دي الوقت و احنا بدينا ننسى زيارة أوباما …أو يكونوا لسة بيستنوا نتائج الإمتحانات…ماتخافوش انشاء الله كلكم ناجحين إن شاء الله و لا يهمكم ………..
    دمتم و دام السلم يا أحلى ناس سلم
    رايي /الجزائر

    • يسلم لسانك يا رايي…………….كان نفسي تدخلي من زمان وتقولي الكلمتين دول يمكن الشباب تحس شويه ويقعدوا علي اجهزتهم بدل ميشيتوا يكتبوا مواضيعهم………………بجد يا رايي انا زهقت من كسلهم ………….. اديهم علي دماغهم شويه يمكن يحسوا شويه

  14. واش هذا يا ناس السلم وينكم؟؟ طولتوا الغيبة و لا حابين تنسونا في هذا السلم و الله من مدة و أنا داخلة خارجة و خارجة داخلة من دون فايدة …و أنا قررت أحرض “أبو عمر” على وضع قوانين للسلم و عقوبات عشان ماتطنشوناش و تتجاهلون لوقت طوبل و إذا كانت السياسة مش عجباكم غيرو الموضوع و ارحمونا ……………..
    من على باب السلم ..رايي/ الجزائر

  15. ولله خنقوني يا رايي……………..انا بجد خلاااااااااااااص علي اخري منهم كل يوم اقولهم اكتبوا ولو مش عاوزين الموضوع ده خلينا نغيروا وخلاص…………….بس تقولي ايه بقا للكسل اللي مودي الدنيا كلها في داهيه……………دول ميجوش غير بالتهزيئ يا رايي اديهم شويه في جنابهم……………وربنا كريم وقادر علي المعجزات………..قادر يقعدهم علي الجهاز يكتبوا مواضيع للبوست بدل ام الشات اللي حياكل عقلهم ده

  16. و الله يا أبو عمر الظاهر إن أصحابنا تخلوا عن البلوغ نهائيا لذلك الأفضل إنك تتبنى البلوغ لحالك و تسميه “القاعد ع السلم” و تمتعنا بمقالاتك الرائعة و خليك من الجماعة اللي لما يتخلصوا من حمى الشات أكيد حيونسونا في البلوغ و رغم ذلك أنا عاوزة كل إيمايلاتهم عشان أهزء كل واحد فيهم لو مارضاش يرجع ع السلم و انت عارف عنواني مستنياك ..
    رايي/الجزائر

    • ولله يبقا عملتي فيا خدمه العمر لو هزقتيهم واحد واحد وعطيتي لكل واحد فيهم علي دماغه………….لاني بجد غلبت معاهم وطلع عين اهلي منهم…………..ايميلاتهم كلهم حتلاقيها في ( احنا مين ) في اول الصفحه………..وبجد ولله يا رايي انا وحشتني الكتابه جدا وواحشتني تعلايقاتك وردودك المستمره علينا………….وبجد اشكرك شكرا جزيلا انك لسه معانا ومستمره في متابعه البلوج بتاعنا وبتحاولي مع شويه البروتات اللي ربنا رزقني بيهم دول …………..(يا رب انتا عارف انا نفسي اقول ايه )

  17. هاااى يارايي
    عملا ايه؟…..ان شاءالله تكونى تمام
    انا عارف والله اننا مقصرين
    بس فى حالة على السلم اليومين دول محدش فينا فاهمها
    بس مش الشات زى ما ابوعمر بيقول
    بس ان شاء الله قريب اوى هنرجع نشتغل تانى
    عموما ده ايميلى:
    Laughstory_as@hotmail.com
    وقريب هيبقى في مواضيع جديدة
    عشان ترجعى تمتعينا بتعليقاتك
    وعلى فكرة انا بدأت اشتغل على بلوج جديد
    http://www.m3sl.wordpress.com
    ياريت تزوريه وتقوليلى رأيك


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬514 بنى آدم
  • أحسن مشاركات

  • التصنيفات