خيراللهُم اجعله خير … مكتب أبيض زي الفل , ومفروش على أحلى ستايل شفته ولا البيت الأبيض … وصورة المعلم ابراهام لينكولن متعلقة …. ده بيت مين اللي بيحب امريكا اوي اوي كده… مش عارف.وتشيرت أنا بحب امريكا اللي أنا لابسه ده مش عارف جه منين.
بحاول اجمع معالم الحلم الامريكاني ده … أنا فين ولا أنا أنا مين أساسا في الحلم . مش عارف. في عز حالة الذهول اللي أنا فيها باب الاوضة يتفتح ومين داخل عليا …. يا حلاوة يا ولاد . ده أوباما.
واقف ومش عارف افكر. أقول إيه ولا أعمل إيه حتى . ربنا يكرمه ابن الحلال ساعدني بأنه افتتاح الحديث وسلم عليا وقال لي أهلا بيك في المكتب البيضاوي. مديت ايدي وسلمت وأنا فرحان اوي بإنه فاهم إني محتاس ورديت عليه السلام. وبدأت المفاجآت تهل عليا زي المطرة. أول سحابة كانت في تحاول لون وشه , سؤاله ليَّ بلهجة شبه حادة ” كنت عايز تقبلني ليه؟؟” … بص يا باشا من الآخر كده أنا حلمت إني اقابلك عشان نفسي اعرفة إنت فين . معانا ولا علينا . بيعنا ولا شرينا؟؟ بصراحة كده ماحدش فاهملك حاجة ومش عارفين نمشي وراك ولا هتدينا على قفانا زي اللي قبلك؟
أوباما: وأنا ليه أبقى معاكم ؟ وليه أبقى معاهم ؟
العبد لله: ما أنت رئيس أكبر دولة في العالم. يعني عليك مسئولية أكبر من حدود دولتك. بعيد عن الأمام المتحدة والكلام اللي زي الفل ده. إنت اللي بتعمل سلام والحرب. صح ولا أنا غلطان؟؟؟
أوباما:وده معناه إني مدورش على مصلحتي؟؟
العبد لله:لا طبعا . بس إنت المفروض إن مصلحتك مع استقرار. مع إن كل واحد ياخد اللي ليه ويعمل اللي عليه . وده اللي إنتي مش بتعملوه من زمان لا بوش ولا اللي قبل بوش. يا ترى بقى إنت ناولنا على إيه ؟ بجد نفسي أعرف.
أوباما: أنا جي ادورعلى مصلحتي . ومصلحة بلدي فين واليومين دول أنتم شريك مثالي ليَّ . أنا بحاول أطلع من ازمة مالية طاحنة بلدي وأنتم عندكم كل اللي أنا عايزه من أول البترول لحد الزباين بتشتري أي حاجة . وفي نفس الوقت هم أصحاب مكان هنا . مسيطرين , يعني أنا محتجلكم وفي نفس الوقت مقدرش استغنى عنهم ؟ شفت بقى أنا بتعب قد إيه ؟
العبد لله : يعني تفتكر إنك هتقدر توزن المعادلة دي ؟
أوباما:هخسر من عندكم وهخسر من عندهم , وهكسب من عندكم وهكسب من عندهم . فاهم حاجة؟
العبد لله : بصراحة لأ
أوباما: بكرة تفهم وساعتها ابقى افتكرني … اتفقنا؟
العبد لله: اتفقنا
أوباما : طيب إنت إيه رأيك في الفكرة؟
العبد لله : بصراحة, وبعد عن تعصب لقوميتى وديني… حق مشروع وفكرة جامدة.وعشان تبقى عارف برده . أنا مش المفروض ابقى محايد للدرجة دي بس أنا باقولك رأيي كاني لا أنا مع دول ولا دول . فاهم قصدي.
أبوعمر: قوم يا زفت عشان ننزل الفراعنة … يلا أبوصلاح مستنينا هناك… إنت يا زفت… يا هباب
بحاول أصحى من النوم ومش عايز اقنع نفسي إن الحلم الجميل ده خلص … واتصدم بإني ابص على الكنبة وألاقي تيشرت أنا بحب امريكا اللي كنت لابسه في الحلم موجود…
” يا ولاد اللعيبة” أنا ماكنتش بأحلم…. يا عممممممممممممممممممررررر
أظن دلوقتي سبب التأخير اتعرف….مرة تانية اسفيين.
8 تعليقات
Comments RSS TrackBack Identifier URI
اللى قعدوا ع-السلم 
آآآآآآآآآآآآآآآآآآآآآآآآآآآآآآآآآآآه يا مافي يا ريتني كنت وياك في الحلم أصلي كان عندي كم سؤال مش و لا بد لأوباما الحليوة …بس و الله ده حلم و لا كل الأحلام و انت جبت فيه المفيد و خليت أوباما يكشف لينا سر الخلطة اللي بيطعمهانا على القفا و الجماعة بيستطعموها و فاكرين الشيخ أوباما جاي يحررهم من غباءهم أتاري هو جاي يديهم على دماغهم بسوط المنفعة و البراغماتية اللي مابيعرفش غيرو ….بس ياريتك مريت في الحلم على الحمقى المشدوهين بأوباما الأب الروحي للمغفلين العرب و اديتهم سؤالين على جنابهم تخليهم يدوروا مايشفوش حاجة ….
و الله مقال زي العسل و دامت أحلامك لخدمة الشعوب العربية …………………
رايي/الجزائر
عزيزتي رايي
أولا أنا مبسوط جدا إن أول تعليق على البوست يجي منك إنتي وإنتي أكترحد زعلان مننا.وثانيًا اقولك الانسان لو اعتماد على أي حد غيره عشان يعحاله أي مصلحةأو حلم أو حتى يجيبله حقه يبقى مش هيعرف يعمل أي حاجة في حياته , اللي بيتعلم إنه يعتمد على غيره في حاجة هيعيش معتمد على غيره في كل حاجة .صح ؟؟
على فكرة اقري آخر كام سطر في البوست عشان في فكرة بعيده شوية عن موضوع الأحلام ده.
مرة تانية بعتذر عن التأخير وشكرا لكي يا رايي.
إيه يا عم الحلم ده كل واحد واحلامه بقى أنا بحلم بـمهند مثلا بخاف على نفسي بقى أوباما إيه اللي احلم به ده 🙂
بص أنا لحد دلوقتي مش قادرة افهمه يعني هو كلامه كان كويس وعرف إزاي يدخلنا عشان احنا شعب عاطفي شوية وبيتأثر بالكلام وبالقران بس ممكن يكون فعلا أحسن من اللي قبله وممكن تبقى دي سياسة وتفكير على كبير شوية
(أوباما اسود في بيت الابيض ليه فرحنا وعملين ظيطه أحمد زي الحاج أحمد بس احنا دماغنا عبيطة )
كده كده احنا لازم نستنى ونشوف حيعمل إيه بس اللي مفيش اختلاف عليه إن مصلحته فوق أي حاجة
وكويس إن عمر جالك قبل متحلم بـحد تاني والقانون ياخد مجرة 🙂
أنا عارفة إنك ما كنتش تحلم من أول قراءة للمقال بس حبيت كثير فكرة الحلم رغم أنك فركشتها في الأخير المهم أن المقال عجبني كثير و الفكرة وصلت…………. …………………………………..و يعطيك ألف عافية
رايي/الجزائر
يابني ماتحلم ولا روح في أي حتة
لازم يعني تقول أنا قاعد فين
ربنا يستر عليّا……عشان شكلكم هتودوني في داهية
يا عم ده انتا كنت بره وكنت قاعد علي الفراعنه ومحضرتش حاجه……………….المصيبه فيا انا اللي كنت معاه وكمان انا اللي صحيته من النوم……………يعني ممكن اوي يكون الحاج اوباما كان لسه عاوزه ونا اخدته منه بغصب عنه وشكله حيوديني في ستين داهيه …………… حد يحلم بالراجل ده طيب احلم علي قدك…………..لا بس نايس بوست يا واد يا تيح………….وعقبال متنزلوا بالبوستات بعد كده بسرعه يا رب
المقال جيد ولكن ينقصك مراجعة المقال بدقة حيث إنه توجد بعض الأخطاء الناتجة عن سرعة الكتابة مثل :
العبد لله:لا طبعا . بس إنت المفروض إن مصلحتك مع استقرار. مع إن كل واحد ياخد اللي ليه ويعمل اللي عليه . وده اللي إنتي(انتم) مش بتعملوه من زمان لا بوش ولا اللي قبل بوش. يا ترى بقى إنت ناولنا على إيه ؟ بجد نفسي أعرف.
أوباما: أنا جي(جاى) ادورعلى مصلحتي . ومصلحة بلدي فين واليومين دول أنتم شريك مثالي ليَّ . أنا بحاول أطلع من ازمة مالية طاحنة بلدي وأنتم عندكم كل اللي أنا عايزه من أول البترول لحد الزباين بتشتري أي حاجة . وفي نفس الوقت هم أصحاب مكان هنا . مسيطرين , يعني أنا محتجلكم وفي نفس الوقت مقدرش استغنى عنهم ؟ شفت بقى أنا بتعب قد إيه ؟
WHERES THE ENGLISH SECTION !!!! Make one quick !! or else i won’t visit your website ever again 😛 I love what you’re doing guys … so cute 🙂 – Suz [mavrox] abcdefghijklmnopqrstuvwxyz