23 يوليو 2009

3alam 2
يا سلام على الأجازة وأيام الفراغ.. إحساس عظيم إن ميبقاش وراك أي حاجة في أي حاجة .. عالصبح كده لقت نفسي زهقان من اسكندرية والحر والمصيفين البيئة الماليين البلد عاملين زي الدبان..
ألوو.. صباح الفل يابو صلاح … يلا بينا نطلع الساحل ولا إيه الكلام ؟ قشطة يابو فتحي يلا بينا .. نروح عندك في بورتو ولا عندي في جولف… مش فارقة كتير يا مان . يلا بينا من هنا .. طب هكلم أبوعمر واتفق معاه. سلام يابو صلاح
ألوو… صباح الجوافة يابو عمر… يلا بينا بورتو.. لا لا فكك يابو فتحي … يلا بينا عالعين السخنة .. يا أبوعمر مشوار طويل … أنا مش قادر على السواقة . ومين قال لك إنك هتسوق يا مان.. احنا هنطلع بالطيارة … آه صحيح يابو عمر لا خلاص يلا بينا . ابعتلنا العربية بقى أنا وأبو صلاح .. وهنشوفك عند الطيارة. سلام….
واتقابلنا فعلا عند الطيارة … ويلا بين عالسخنة…
وهناك اكتشفنا إن محدش فينا معاه مليم أحمر …وإن أحمد عز لما قال ان الشعب المصري عايش في رفاهية كان بيهجص …
المهم التصرفنا ولمينا القرشين الي يروحنا لاهالينا. دورنا على مواصلة نركبها تودينا بيتنا … زحمة وطوابير عشان تركب ميكرباص وده لما ربنا يجرها علينا وواحد يوصل الموقف.. وتلاقي الناس كلها اتلمت عليه واللي يركب من الازاز واللي يزق الراجل العجوز اللي قدامه ويركب
واحنا راكبين واحد معانا كان رايح القليوبية جاله مكالمة عرف فيها إن اخوه الصغير مات من التيفود لا حول ولا قوة إلا بالله (الوفاة الاولى بالتيفود في مصر!!) ماسكت الجورنال بتسلى فيه عقبال مانوصل القاهرة ألاقي الوزير بيتهم المقاولين العرب بالاهمال اللي اتسبب في نشرالتيفود… يا سلااام !!
ببص في آخر صفحة في الجورنال ألاقي صورة للسفير المصري وهو بيقطع تورتة عيد الثورة مع نيتينياهو وشيمون بيريز..حاجة تفرح والله … ونعم السياسة يا حكومة ( استطلاع راي: 71 % من الشعب راضي عن سياسات الحكومة المصرية!!!!!).
رميت الجورنال عشان فعلا مرارتي اتفقعت …وغمضت عني وقررت إني أنام شوية … وكما هي العادة حلمت
حلمت بالملكية من تاني .. حلمت بنفسي لابس البدلة والطربوش .. حلمت بسعد زغلول ومصطفى النحاس اللي كانوا دايما في صراع مع الملك عشان هم كانوا مفروضين عليه من الشعب … بالانتخاب.. حلمت بالجنيه المصري لما كان أغلى من الجنيه الاسترليني ومن الدولار. حلمت بانجلترا لما كانت عليها لينا فلوس.
بصراحة … ويمكن ناس كتير تعترض على اللي أنا بقوله .. ويمكن اتهزأ ومش بعيد اتسجن .. أنا مش بحب الثورة … لانها شوية شعارات ومبادئ على الفاضي… بصراحة .. أنا مش بحب عبد الناصر. اللي ساعد الجزائر على المغرب. مش بحب عبد الحكيم عامر بكل فضيحه… مش بحب الظباط سرقوا قصور العائلة المالكة.. اللي ضايعه السودان… اللي عملوا الانفتاح.
كنا دولة محتلة بس كان لينا مكان في العالم وكفاية إن مصر من الدول 45الموقعة على البروتوكول بتاع الأمم المتحدة.. وكنا هنتحرر هنتحرر… وكانت السويس كانت راجعة بالقانون وعافية على الكل كمان كام سنة… كان زماني دلوقتي خلصت الجامعة وشغال في الحكومة زي الباشا.. وبقبض مرتب بالشيء الفلاني كل شهر …
وانتهى بيَّ الحلم إني ألاقي نفسي تاني في العربية البيجواللي مليانة ناس على الآخر والواحد مش عارف ياخد نفسه فيها..وصحابي حواليا..والله الحمد لله إن في حاجة جنبي تصبرني على الثورة…وجيل الثورة اللي مش ناوي يخلص ده …
عظيمة يا مصر يا أرض البصل….

Advertisements

5 تعليقات

  1. Great but take care when u got killed Egypt won’t cry for u

    • rabna yesbrak ya abny 3ala el sowra w el 3mloha 😀
      teslm 2idak ya basha 🙂

  2. ولا اعرفه يا باشا ولله………………انا طول عمري بقول علي الواد ده عميل وجاسوس وزنديق………….حتودينا في داهيه يا ابو فتحي…………..لا بس بجد نايس بوست بغض النظر عن اللي جوه البوست…………..وعلي فكره انا عزلت من علي الفراعنه وعزلت من بيتي وسبت اسكندريه …………….علشان محدش يدور عليا …………….ولا اقولك انا حقول رأيي بقا ومليش دعوه انا شايف ان كلامك في حاجات كتير سليمه يا ابو فتحي ( ورزقي ورزقك علي الله يا صاحبي )…………..وان لله وان اليه راجعون

    • howma dol ya basha beto3 el ………….
      ana 3mlt el 3lya w gebtohom aho

  3. سلاااااااااااااام ….
    آسفة على التأخير بس الظروف و صيف و أياموا ….بس و الله باين إنها واصلة معاك لحد الجنون يا مافي و بان إنك من أعداء الثورة الليتساوي اعداء الشعب يعني إنت كوم و الشعب المصري المقدس للثورة كوم ثاني و حتى أبو عمر أصبح بيشك إنك جاسوس أو عميل و أنا والله خايفة عليك من صحابك دول و بعرض عليك الإقامة بالجزائر لما ينفوك …….
    بس المقال و الله جااااااااااااااااااااااااااااااااااامد خصوصي السياسة اللي بتتبعها دولنا في استغباء الشعوب و استحمارها و نشر الإحصائيات المغلوطة إنو كلو تمام و الدنيا كلها رايحة للجحيم ………….
    أحييك على المقال ده و دمت زي مانت مافي الثائر
    رايي/الجزائر


Comments RSS TrackBack Identifier URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

  • عدد اللي عدوا ع-السلم

    • 15٬514 بنى آدم
  • أحسن مشاركات

  • التصنيفات