الحب الضائع

هيسنا كتيييييييييير واتجننا كتييييييييييير واتكلمنا في الانتماء وفي الجنان وفي اللبس والاستيلات اتكلمنا معاكم في مواضيع كتير فعلا بس لما قعدت فكرت شويه كده مع نفسي اكتشفت اننا مكتبناش في مواضيع نكد قبل كده……….. نكد من اللي بيجي علي الوتر وبيخلي الدموع تنزل سيول من العين ……….. طبعا النكد اللي من النوع ده ميجيش غير من مواضيع معينه بس ………يعني مثلا وانتا في البيت ابوك طلبت معاه يغلس عليك شويه حتعيط؟ ……….. لا

وانتا في شغلك مديرك استقصدك حبتين حتعيط؟ ………..  لا

برده………. لو كنت متجوز وجاتلك سفريه بره البلد حتبعد فيها عن مراتك حتعيط ؟……….ده انتا حتاخدها جري بدل متستني الطياره

انما بقا موضوع زي موضوع الحب الفاشل ده اللي بيجيب من الاخر يا معلم………….ويا سلام بقا لو كان الحب الفاشل ده هو اول حب في حياتك………..يا عيني علي الاكتئاب اللي حيلبس اهلك ……….وللاسف اللي قعدوا علي السلم قرروا ان كل واحد فينا يفتح قلبوا الاسبوع ده ويسيح لنفسه علي اكتر قصه حب فاشله في حياته وكان العبد لله هو الضحيه الاولي……………واليكم  التفاصيل :-

اولا انا شاب مصري كنت عايش في الكويت واخدت ثانويه عامه من هناك وجيت هنا دخلت كليه هندسه وللاسف انا وحيد والدي ووالدتي………علشان كده يمكن كان مقفول عليا شويه وانا هناك مكنتش بقدر اعيش حياتي واخرج واشوف الناس كتييييير لان اهلي كانوا بيخافوا عليا اوي من اصدقاء السوء اللي هما بقوا ملايكة بالنسبالي دلوقتي .

ما علينا المهم ان علاقاتي بالجنس الاخر اتاخرت اوي لاني بدات فيها مع بدايه دخولي الكليه……..في مره قاعد علي النت عادي زي ما الدنيا كلها بتقعد عليه وكنت علي موقع شات من اشهر مواقع الشات المصريه ايامها قاعد بضيع وقت عادي……..لقيت فجاه واحده قدامي مسميه نفسها ( مصريه بالكويت ) وبحكم اني كنت عايش في الكويت وانا في الاصل مصري . شدني الاسم فقلت اتعرف عليها…………واتعرفنا واتكلمنا واخدنا ايميلات بعض وارقام بعض وطبعا هي كانت في الكويت وانا كنت في مصر بس ده مكنش ليه اي تأثير ايامها في صداقتنا……….وعلاقتنا استمرت عادي لغايه موصل الصيف باجازته وكنت كده كده مسافر الكويت لاهلي فاتفقنا اننا نشوف بعض . ( اكيد كنت شايف صورها قبل كده بس طبعا انك تشوف الانسان اللي قدامك فيس تو فيس بيبقا اجمل بكتير) .

المهم اتفقنا علي مكان المقابله اللي هو كان مول علي شارع الخليج اسمه ( مارينا مول ) وانا كان معايا واحد صاحبي ربنا يمسيه بالخير كان اسمه اسامه وهي كانت جايه مع اهلها يعني مكنتش حقعد معاها انا كنت مجرد اني حشوفها بس……… كنا متفقين اني حشوفها في الدور التاني وطبعا اخوكم لبس اللي علي الحبل بقا وكنت عامل فيها جون ترافولتا في زمانه وواقف قدام السلم الكهربا مستني القمر لما يطل………. وفجاه ظهرت قدامي بجد مش حقدر اوصفلكم مدي الجمال والحسن اللي كانت فيه حسيت اني شايف قدامي حوريه من حوريات الجنه اللي بنحلم عمرنا كله اننا نشوفهم بس……….بجد انا اتسمرت قدام السلم مش قادر لا اتحرك ولا اتكلم ولا اعمل اي حاجه كل اللي قادر اني اعمله اني ابصلها واحلم من جوايا انها جايه تقف قدامي واحضن اديها بايدي وابص في عنيها عمري كله بجد مكنتش عاوز من الدنيا اكتر من كده………. بس طبعا اسامه باشا قام بالواجب وصحاني من احلي حلم وقالي البت قاعده هناك اهي وبتبصلك انتا واقف هنا ليه……….قلتله معاك حق و قعدت اتنطط قدامها زي فرقع لوز علشان تعرف ان انا اللي العين عليه مش اسامه لتتلغبط بينا ولا حاجه وتبقي مصيبه………المهم اليوم عدا علي خير وشوفتها ودوبت فيها دوب وهي شافتني ويومها بليل سمعت منها اجمل كلمه سمعتها في حياتي كلمه( بحبك )…………..ياااااااااااااااااااه علي الشعور اللي جالي ساعتها لو قلتلكم اني بجد عرفت ساعتها يعني ايه انك تحس انك طاير فوق السحاااااااااااااااااااااب حتقولوا عليا كداب بس فعلا حسيت بالشعور ده حسيت اني اسعد مخلوق علي وجه الكوره الارضيه كلها ………..بس طبعا قلت اعمل فيها عمو التقيل واستنا عليها شويه ( وانا من جوايا كنت بموت في دباديب اهلها اساسا ) .

المهم الحياه مشيت علي الحال ده وطبعا مستحملتش وبعدها بيومين علطول قلتلها اني بحبها جدا ………..وعشت معاها اجمل حياه ممكن الانسان يعيشها …………سمعت منها اجمل كلام ممكن الانسان يتمني يسمعه حسيت معاها بشعور الحب الحقيقي اللي نابع من القلب حبيت شخصيتها العنيده وطبعها المودي جدا ورومنسيتها وجمالها وصوتها وشكلها واستايلها بجد حبيت فيها كل حاجه ……….وطبعا لاني بحكم التربيه راجل شرقي حبتين كان لازم اسستمها علي نظامي انا يعني لو في حاجه في تصرفتها انا شايف انها مش كويسه يبقا خلاص متتعملش تاني طقم مش لذيذ يبقا ميتلبسش تاني وكده يعني وطبعا ده كان بيخلق مشاكل بينا زي الفل بس كانت مشاكل لذيذه عامله زي الملح في الاكل مبنقدرش ناكل الاكل من غيره ……….واجمل حاجه بعد اي مشكله كنا بنقضي لحظات جمييييييييييييييييييييييله اوي وانا بصالحها وهي بتدلع عليا وبعد كده نقضي مع بعض اجمل لحظات رومانسيه سوا وكأننا لسه مقابلين بعض دلوقتي.

بشكل عام وبدون الدخول في تفاصيل اكتر من كده علشان منلغبطش في الكلام قضيت معاها بجد اجمل صيف . ونزلت مصر بعدها وعلاقتنا كانت مستمره يا اما عن طريق النت يا اما عن طريق التليفون المهم اننا كنا تقريبا طول الوقت مع بعض وكنا كل فتره يا انا بسافر يا هي بتيجي مصر وبنشوف بعض من وقت للتاني ومكنش الموضوع ده فارق معايا .

اه انا نسيت اقولكم اني اتعرفت عليها وانا في اعدادي هندسه وعلاقتنا استمرت ما يقارب ال4 سنين بس اكتر واجمل فتره قضيتها معاها كانت قبل منفترق بشويه بسيطه لان كانت جاتلي الفرصه اني اسافر الكويت ترم كامل يعني 4 شهور……….. بجد مش حقدر اوصفلكم شعوري كان ايه في ال4 شهور دول انا بجد كنت حاسس اني عايش في الجنه كنا طول الوقت مع بعض تقريبا مبنتفرقش……….. للاسف مش حقدر احكي كل حاجه بس فعلا انا وصلت لمرحله اني كنت حاسس ان الكون ده كله ملكي كنت حاسس اني بملك الدنيا وما فيها وكنت متاكد جدا من حبها ليا ………وكنت قايل لوالدي ووالدتي عليها وكنت عارف والدتها واخوتها يعني الدنيا كانت ظريفه اوي بالنسبالنا …………بس فجاه خلص الترم التاني ونزلت بقا مصر مع اهلي.

وفجاه حسيت بتغير فظيع في التعامل………عناد عمال علي بطال في كل حاجه بقولها خناقات بتتخلق من تحت الارض حوارات بحس انها بتتحورلي بس كنت ببلعها واقول يمكن في حاجه سيبك…………وفجاه لقيت انسان غريب اسمه هيثم بيضيفني علي النت……….قلت اشوف مين ده ……

انتا مين يا عم ؟………….انا صاحب فلانه………..انتا عبيط يبني ؟……….لا انا مش عبيط……….وانتا تعرفها منين ؟……….اتعرفت عليها في مره وهي ماشيه مع صاحبتها علي الخليج…………قلت اكيد الواد ده اهبل.

رحت مكلم الانسه……… يا بنتي انتي تعرفيه؟…….. لا …………. طيب هو عرفك منين ؟ ………. عرفني من فلانه بس انا مليش اي علاقه بيه………..طبعا زي الاهبل صدقتها وروحت للواد وطلعت عين اهله……….بل ووصلت اني استنيته لما جه مصر واتخنقت معاه خناقه لرب السما وتقريبا عمري في حياتي مضربت انسان زي مضربت الكائن ده.

وفجاه اكتشفت ان هو اللي كان كلامه سليم وان هي فعلا اتعرفت عليه بحجه انها شايفه صاحبتها كلهم بيخرجوا مع حبايبهم وهي مش عارفه تخرج مع حد فاتخنقت من كده اوي……….. وطبعا اول معرفت كده رحت اواجهها علشان اتاكد من الكلام لقيتها بتطلب مني اننا نفركش علاقتنا……………. طبعا اول معرفت انها فعلا اتعرفت علي هباب ده رحت مفركش معاها علطول بس حبيت اعرف الاسباب؟

الاسباب اللي وصلتني مع اني مش شايف انها مقنعه اوي بس اضطريت اقنع نفسي بيها……… اننا بعاد عن بعض معظم الوقت……… واني عملت اخطاء معينه مكنش يصح اني اعملها وبالتالي نزلت في نظرها وحاجات من كده.

اللي يجنن بقا ان لما حد يسيب حد كان بيحبه يبقا اكيد سايبه علشان لقي حد تاني احسن منه في اي حاجه ………….انما اللي عرفته انها  بعدها باسبوعين بس سابت الكائن العجيب اللي اتعرفت عليه ده لانه وقف في نص الشارع يعيطلها علشان متسبهوش ( يا عيني علي رجالتك يا بلدي ) وقالتلي بعضمه لسانها انا متاسفه اني سيبتك لاني فعلا مقدرتش الراجل اللي كان معايا بس عرفت قيمتك بعد معرفت العيل اللي عرفته ده…………بس للاسف  كان خلاص بقا كل شئ راح وانقضي وطبعا مش حقدر احكيلكم مدي الحزن والاحساس الزباله اللي عشت فيه بعد كده والاكتئاب اللي مسكني .

بس بعدها قعدت مع نفسي شويه وفكرت بعقلي اكتشفت ان اللي بعمله في نفسي ده لا حيقدم ولا حياخر ………..ابتديت اخرج شويه بشويه واشوف حياتي والحمد لله ربنا قدرني وخرجت من المحنه دي وشوفت حياتي تاني………..وعاوز اقولكم ان علاقتي بيها لسه مستمره بس في اطار الصداقه والعشره اللي كانت بينا يعني بنتكلم من وقت للتاني………… بنسأل علي بعض ………كده يعني.

وأدي الدنيا ماشيه واحنا بنجري وراها لا عارفين نحصلها ولا عارفين نقف نستني غيرها …………..وربنا يخليلنا السلم اللي احنا قاعدين عليه …………استأزنكم  دلوقتي بقا  لان الاكتئاب وصل ………..حكتأبلي اسبوعين كده وحرجع تاني …………..استنوني …..

( منك لله يا ابو صلاح علي الموضوع اللي اقترحته ده )

19 تعليق

Comments RSS TrackBack Identifier URI