إسأل مجرب ولا تسأل حبـيـــب

من غير فضايح
بما إني مش بحب الفضايح وبحب الموضوعية وبما إني معجب بمعظم مواضيعكوا اللي فاتت وكل مرة كان نفسي اكتب وقلمي يشوف النور “أو بالمفهوم الديجيتال كيبوردي يشوف النور” وبما إني شايف نفسي بقى فيلسوف عصري وأواني وسفير الكلام أيام الكلية -كانت أجمل أيام- وبما إن الحاج Echo of Silence مرضيش ياخد المقال ده عني وينشره بنفسه وخلاني أكتب باسمي… فأنا أتمنى أكون ضيف خفيف بقى عالسلم ولو إني نفسي أرتاح وأقعد معاكم كتير…

نخش فالموضوع بقى “الحب” الحب نفسه.. أصلي حقولقوا حاجه هو لو حب يبقى مش حيفشل… ممكن نقول إن أبو عمر مفشلش لأنه لسه لحد النهارده بيكلمها – الله أعلم بيكلمها هيا بس وللا بيكلم أمة محمد كلها – بس أهي العلاقة موجودة، آه هيا وقفت عند حد معين وموصلتش للنهاية المتوقعة بس هيه لسه فيه فرصة أكيد وتتصلح فيها الأمور، مين عالم، إعذروني لأني مؤمن بإن الجواز هو نهاية طبيعية لأي حب – مش مأساوية يا متشائمين – بس بقى يا عيني عالصبر، الصبر مفتاح الفرج والله.

“إن أكبر غلطة يرتكبها الرجل في حق نفسه، هو أن يتزوج من حبه الأول” –
د/ مصطفى محمود الراجل الطيب الجامد جدا – الله يشفيه ويعفو عنه – قال البق الجامد ده في كتابه “في الحب والحياة” – لازم تقروه لو عاوزين تحبوا وتتحبوا – قالك لأن الحب الأول أفلاطوني بحت عفيف كله أحلام وردية طايرة فوق في السما لدرجة إنك لو فكرت في حبيبتك كأنثى تشتهيها ممكن تلوم نفسك إيه قلة الأدب ديه إزاي أفكر فيها بالشكل ده.. يعني حب فشنك مش مكتمل المعاني ماهي لامؤخذه مش لوحة فبرواز
وللا تي شيرت فيه عرق بيكهام عاوز تعلقه عالحيط لحسن يتبهدل أوخايف تلبسه لحسن يتغسل ويروح العرق…

نرجع لعم مصطفى بيقولك إن الحب ده بينتهي بصدمة بس بتفوق البني آدم ويدخل بقى على مرحلة جديد ويحب تاني بس المرة ديه بيكون متفتح ويتكعبل كعبلة تانية وهوب الحب اللي بعده بقى يكون كامل النضج والمعاني بالقلب والعقل – حب كامل الدسم – وده يخليني أرجع أقولكوا إن الحب الحقيقي مش بيفشل إنما التجارب هيه اللي ممكن متكملش زي ما احنا متوقعين علشان هيا ناقصها حاجات كتير، إبراهيم الفقي بيقول مفيش حاجه اسمها فشل انما هي تجارب بتبوظ عشان تاخد منها خبرة تعلمك تنجح في التجارب اللي بعدها..

ده رأي دكتور مصطفى ويحترم وخصوصا بالنسبة لمعظمنا اللي ماشي يحب على روحه وبيقع في تجارب كتير، بس مش بيعجن يعني بيحب من طرف واحد وياخد بعضه بهدوء أو بيحب حب متبادل ويفترق بعده، لا بيعك ولا فاتحها عالبحري وعامل قلبوا سبيل.

إنما في رأي تاني.. للي عاوز السمو.. للي بيعتبر إن الحب من غير أوان والحب عمال على بطال والحب رايح جاي وبلد هنا وبلد هناك، وهم كبير بيضيع علينا فرصة الاستمتاع بالزواج أو الحب الحقيقي اللي بيبتدي فبيت، مش لازم بيت الزوجية إنما بيت الأسرة، بيت تدخله تحب في النور مش في بير السلم، بيت تتنقل منه بحب عمرك على بيتك علشان تبنوا حياه كامله مليانه حب، حب زوج لزوجته وزوجه لزوجها، حب أم لجنين في بطنها وحب أب لمولود على إيده شايل إسمه، حتة عجينة هشه كده يشكلوها زي مايحبوا، تخلد حبهم.

حتحب مره والتانية والتالتة وتتجوز الرابعة، وبعدين؟؟ كل ما يحصل منها حاجه تقول ياه ديه فلانه كان ممكن متعملش كده معايا، ياه عالموقف ده فلان التاني كان ممكن ينبسط أكتر ويحسسني بقيمة اللي عملته ده علشانه، ويبدأ العقل الباطن يفكر لحد ما فجأه وغصب عنهم مش بإرادتهم يكره مراته وهو مش عارف ولا هيا ليها ذنب، أو تكره جوزها ومتعرفش تعيش معاه حياه مستقره، ده كان رأي عمرو خالد للي فاتح قلبه عالبحري ويجري ورا الحب..

هو إنتوا يا بشمهندسين لما جيتوا تدخلوا كلية الهندسة كنتوا عاوزين تدرسوا هندسة كعلم وللا عاوزين بالعلم ده تبقوا مهندسين في المستقبل واللي دخل طب وعلوم وزراعة وخدمة اجتماعية مش كان عاوز بعدها يكونوا دكتور أو عالم أو أخصائي إجتماعي حتى – رحلات بقى وليلة وكل حياتهم ترفيه -؟ طيب اشمعنى الحب؟؟ اشمعنى الحب اللي عاوزينوا نتعلموا ومش عاوزين الهدف الكبير الطبيعي إننا نكون أسرة ده حتى ربنا هو اللي خلق لنا من أنفسنا أزواجا لنسكن إليهم، أيوا ويا سلام على عظمة ربنا سبحانه وتعالى وجماله لما يقولنا “هن لباس لكم وأنتم لباس لهن” ياااااااااااااه من كتر الحب حتكونوا كل حاجه لبعض.

حد فكر لو قال لواحدة كلمة بحبك حيقول لمراته اللي بيحبها بجد إيه؟؟ ولو قالها حتكون كلمة معبرة نقية وللا حاجه اتقالت لأي حد، سيبكوا من ان الجواز ده حاجه وحشه افرض حبيتها أو حبتيه بجد تميزيه بإيه؟؟ آه في أفعال وعلاقات مختلفة بس يا ترى الكلام حيكون مختلف إزاي وأجمل كلمة اتقالت لأي حد أو كذا حد كذا مرة، ده بغض النظر عن ناس تانية وحشة علاقتهم ولعياذ بالله كانت علاقة زوج وزوجة خرجت من الطهر والعفة للي أفظع من كده، ليه عاوزين ندخل الكلية واحنا لسه فابتدائي ما نستني لما نذاكر ونعدي مرحلة مرحلة عشان ننجح، ليه نحب على روحنا ما ممكن نحب فوقت الحب، ولحد ما يجي الأوان مطلوب مننا حب أكبر، حب ربنا وحب سيدنا محمد صلى الله عليه وسلم وآباءنا واخواتنا والناس، صدقوني والله العظيم ده اللي حيرقى بحبنا الأصيل الحب اللي بيحلم بيه أي واحد وواحدة لدرجة أسمى معاني الحب، علشان حيكون حب طاهر من قلوب نضيفة لسه شباب متبهدلتش في مدرسة الحب ووقعت ومقدرتش تتخرج وتبقى زوج عطووف وأب حنين، زوجة رقيقة وأم رائعة.

بجد ابعدوا عن الحب اللي فغير أوانه، ابعدوا عن العلاقات اللي ملهاش نهاية واضحة، وقفوا العلاقات الجميله اللي شايفينها حتنجح بالجواز لحد ميكون الأمور تحت النور أو اجروا بسرعة خدوا الخطوة وربنا عمره ما حيبخل عليكم برزق أو أي حاجه تحتاجوها في سبيل انكم مش عاوزين تغضبوه أو تعملوا حاجه غلط وتبهدلوا نفسكم وتبهدلوا ولاد الناس معاكم، واوعوا الشيطان يخليكوا تتشائموا وتشوفوا الدنيا سودا بالعكس والله ربنا كريم أوي وعمركك ما ممكن تتخيل كرمه وحتفضل تسأل نفسك بعدين هو أنا وصلت لكل اللي أنا فيه إزاي وأنا كنت شايفه مستحيل.. أصل اللي بأمره كل شئ كان معاك ما فارقكش لحظه عشان انت مكنتش عاوز تعمل حاجه تغضبه،،

تعالوا نعاهد نفسنا، نعاهد ربنا إننا نعيش بالحب وللحب بس في النور،،، لو بجد عاوزين الحب…. الحب نفسه..

توقيع
Pharaoh Artist

20 تعليق

Comments RSS TrackBack Identifier URI